1 ABATESALONIKI 5
5
1Korende ase amang’ana ’ebiro ne chingaki, baminto, tari nengencho asemore ng’a mbarikere. 2Naki inwe abanyene mwamanyire buya kegima, ng’a rituko ri’Omonene nigo rirache buna omoibi agocha botuko. 3Ekero abanto bagoteba, “Ntore nomorembe na obotoereru”, erio nario ogosareka gokobachera mobosokano buna obororo bw’okobina bokomochera oyore morito, na tibakonyara gwetooria. 4Korende baminto, timori ase omosunte, goika rituko riria riche kobanyora mobosokano buna omoibi, 5ekiagera inwe mwensi nabana b’oborabu, na abana b’omobaso. Intwe titori ab’obotuko, gose ab’omosunte. 6Ase ayio titorara chitoro buna abande bagokora, korende torende na kwerita. 7Naki abwo bakorara chitoro nigo bakorara botuko, na abwo bagotinda nigo bagotinda botuko. 8Korende intwe abatore ab’omobaso, tobe aberiti, na tweboyie okwegena na obwanchani buna engobo y’ekioma ase ebikuba biaito, na ogosemeria kw’ogotooreka buna ekegogwa giaito gi’ekioma. 9Ekiagera Nyasae tatoragerete endamwamu, korende agatoragera tonyore ogotooreka goetera ase Omonene oito Yeso Kristo, 10oyokwete ase engencho yaito, erinde tobe moyo amo nere, kerabe tokorenda, gose tokorara chitoro. 11Ase ayio, remania inwe ase inwe, na koagachana, kera omonto noyomwabo, buna mogokora.
Ogosorora na ogokwania kw’ogokoorera
12Korende baminto, twabasoroire inwe, mosike abwo bagokora emeremo emekong’u ase egati yaino, abwo bakobaraa ase Omonene na kobakurera. 13Mobasike mono ase obwanchani, ase engencho y ’emeremo yabo. Mobe nomorembe inwe ase inwe. 14Twabasoroire, baminto, mokurere abwo bare aboro, moremie abwo berusirie moyo, mokonye abwo bare abareu, remereria nabanto bonsi. 15Rigereria ng’a onde taakana oyomwabo obobe ase obobe, korende botambe morigie gokorerana ayare amaya inwe ase inwe, na ase abanto bonsi. 16Goka botambe! 17Saba motari gotiga! 18Iraneria ng’a mbuya mono ase amang’ana onsi! Naki oko nakwo ogwancha kwa Nyasae asemore ase Kristo Yeso. 19Timorimia Omoika! 20Timochaya obobani, 21korende teema kera egento, bwata ekere ekiya, 22na eatanane korwa ase obobe bwa kera engencho.
23Nyasae omonyene omorembe abachene kegima, na inwe abanyene morendwe ase emeika, na emioyo, na emebere, na mobe motari na komocha ekero ki’ogocha kw’Omonene oito Yeso Kristo. 24Ere oyobarangeirie nomwegenwa, nakore ayio.
25Baminto, motosabere!
26Nkwanerie abaminto bonsi ase okobanyunyunta ase obochenu.
27Nabatianirie ase Omonene, ng’a rirube eri risomwe ase abaminto bonsi.
28Obuya bw’Omonene oito Yeso Kristo bobe amo nainwe.
Currently Selected:
1 ABATESALONIKI 5: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
