1 ABAKORINTO 16

Ogosangererigwa kw’ebiegwa ase abataka ba Yerusalemu

1Bono ase amang’ana ’ogosangererigwa kw’ebiegwa ase abachenu, buna nachigete abanto be chikanisa chia Galatia, nainwe mokore boigo. 2Ase kera rituko rie ritang’ani ri’echuma, kera oyomo asemore abe okogacha mwaye ensemo ase eki anyorire, koreng’ana buna aranyare, erinde ebiegwa tibisangererigwa ekero nachire. 3Inche kondaike nimbatome ne rirube aba morachore, baire ebiegwa biaino goika Yerusalemu. 4Onye ngwenerete ngende inche, rirorio nabagende amo nainche.

Amang’ana ’omonto omonyene na ogotigara buya

5Korende ninchiche asemore, nyuma konaetire egati ya Makedonia, ekiagera nindengereretie goeta egati ya Makedonia. 6Aande gose nimenye amo nainwe, gose nimenye seino ekero ki’obokendu, monyare gonkooba ekero kende gionsi aase ndigetie kogenda. 7Naki tindigeti kororana nainwe ase ogoeta gwoka, ekiagera ninganetie komenya seino egeka getai geke, Omonene karanche. 8Bono nimenye ase Efeso goika rituko rinene ria Pentekosti; 9naki naigoreirwe egesieri ekegare kerarente okwama, korende abange mbareo bakong’amereria.

10Ekero Timotheo arache, rigereria ng’a amenye amo nainwe atari nobwoba, ekiagera nigo agokora emeremo y’Omonene buna inche. 11Gaki monto onde tamochaya, korende momokoobe ase omorembe, erinde airane asende, ekiagera nimoganyete amo nabaminto.

12Korende ase amang’ana ’Apolo oyominto, nigo namosorora mono achiche asemore amo nabwo baminto bande, korende ere tarigeti gocha bono. Nachiche karanyore ribaga.

13Renda, motenene bokong’u ase okwegena kwaino, mobe abasacha, mobe ne chinguru. 14Amang’ana aino onsi akoreke ase obwanchani.

15Bono baminto, mwamanyire ng’a abanto ba nyomba mwa Stefana nigo barenge abe ritang’ani koonchoka agwo Akaya; na barabwo bebekire ase emeremo y’ogokorera abachenu. 16Nabasoroire baigwere abanto buna aba, na kera omonto oyogokora emeremo amo nabarabwo ase ogwechanda. 17Inche nagokire ase ogocha gwa Stefana na Fortunato, na Akaiko, ekiagera bamentete amange aya naremeire korwa asemore. 18Naki mbansasogetie ase omoika one, na emeika yaino yonsi. Gaki bainyore mono abanto buna abwo.

19Abanto be chikanisa chi’Asia babakwanirie. Akwila na Priskila babakwanirie mono ase Omonene, amo nekanisa ere ime ase enyomba yabo. 20Abaminto bonsi babakwanirie. Kwanania na konyunyuntana ase obochenu.

21Oko nogokwania kwane inche Paulo ase okoboko kwane omonyene. 22Monto onde bwensi otamwancheti Omonene nabe oragererigwe. Inchuo, Omonene oito!#16:22 Omonwa bw’Egesiiria nigo ogoteba “Marana tha” 23Obuya bw’Omonene Yeso bobe amo nainwe. 24Obwanchani bwane bobe amo nainwe mwensi ase Kristo Yeso.

Currently Selected:

1 ABAKORINTO 16: EKEGUSIIBBLE

Highlight

Copy