1 ABAKORINTO 14

Ebiegwa bi’obobani na ebi’ogokwana ase emenwa

1Rigia obwanchani, teema mono konyora ebiegwa bi’Omoika; kobua mono ase ebi, monyare kobana. 2Naki oyogokwana ase omonwa otamanyekaneti, tari gokwana nabanto, korende na Nyasae, ekiagera onde tari okomoigwa, korende nigo agokwana amang’ana a bobisi ase Omoika. 3Korende ere oyokobana, nigo agokwana ase abanto amang’ana ay’okobaagacha, na kobaremia, na kobabeka chinguru. 4Oyogokwana ase omonwa otamanyekaneti nigo akweagacha ere omonyene; korende oyokobana nigo akoagacha ekanisa. 5Inche nigo ndigetie inwe mwensi mokwane ase emenwa, korende kobua mono ng’a monyare kobana. Ere oyokobana nomonene kobua oyogokwana ase emenwa, otatiga omonto aonchore, erinde ekanisa eagachwe.

6Gaki baminto, kondache asemore na gokwana ase emenwa, inki ndabagwenere, onye aya ngokwana takoba amang’ana ’okomaanorerwa gose obong’aini, gose obobani, gose okworokereria? 7Nonya nebinto bitari nobogima, buna ekeroria, gose obokano, onye tibikorua eriogi rire nogwatananekana, naki eramanyekane ngotera ki gokobugigwa ase ekeroria gose obokano? 8Naende onye egetureri gekobugigwa na gosokia egeturi getamanyekaneti, ning’o orabe ang’e ase esegi? 9Naboigo nainwe motakwaneti ring’ana rikoigweka, ring’ana riria rigokwanwa, naki riramanyekane? Naki igo morakwane ase embeo bosa. 10Inyora ng’a nere emenwa ere ne chingencho chinyinge ase ense, gose onde tari nonya noyomo, otari nengencho yaye. 11Onye tinkomanya engencho y’omonwa oria, nimbe buna omogeni asare ere oyogokwana, na ere nabe buna omogeni asende. 12Naboigo nainwe, ekiagera morigetie mono koba abanto bare nebiegwa bi’Omoika, rigia mono momente koba nabio, erinde moagache ekanisa.

13Ase ayio, ere oyogokwana ase omonwa otamanyekaneti tiga asabe aegwe ekeegwa gi’okoonchora. 14Naki kondasabe ase omonwa otamanyekaneti omoika one nigo ogosaba, korende obong’aini bwane tibori kwama. 15Inki rende ekio? Nindigetie nsabe ase omoika, naende nindigetie nsabe ase obong’aini. Nindigetie ntere ase omoika, naende nindigetie ntere ase obong’aini. 16Aande onye aye ogotogia Nyasae ase omoika, nere oyoikaransete otamanyeti, naki araitabe “Amina” ase ogoaka kwao ng’a mbuya mono, na ere tamanyeti aya ogokwana? 17Naki nekeene, aye gwatogirie buya, korende oria oyonde taagachiri. 18Namoakeire Nyasae ng’a mbuya mono, ekiagera ngokwana ase emenwa kobua inwe mwensi; 19korende nanchire gokwana amang’ana atano ase ekanisa ase obong’aini bwane, inyare kworokereria abande, kobua gokwana amang’ana chilifu ikomi ase emenwa etamanyekaneti.

20Baminto, timoba buna abana abake ase ebirengererio biaino; ase obobe mobe abana ebing’werere, korende ase okomanya kwaino mobe abanto abanene. 21Ase amachiko nigo arikire, “Omonene otebire: Ase abanto b’emenwa etamanyekaneti, na ase ebikoba bi’emenwa y’abageni ninkwane nabanto aba. Nonya nabo tibakonyigwera.” 22Gaki emenwa eyio nekemanyererio, tari ase abegenete, korende ase abategeneti. Korende obobani nekemanyererio, tari ase abategeneti, korende ase abegenete. 23Gaki onye ekanisa yonsi, egosangererekana amo, na mwensi mogokwana ase emenwa, erio abanto ba isiko bagocha, gose abategeneti, Inee, tibagoteba ng’a nigo more chibarimo? 24Korende onye bonsi bakobana, omonto otegeneti ogocha, gose omonto o isiko, orokigwe na bonsi ng’a nomomochi are, agambigwe na bonsi; 25naboigo obobisi bw’enkoro yaye bobe maiso marore; na igo aragwe maumama, na gosasima Nyasae, atore ng’a ekeene Nyasae nigo are ase egati yaino.

Omosangererekano bw’ogosasima nogwenerete koba ase omoroberio omuya

26Naki rende baminto? Komogosangererekana amo, kera oyomo nare nogotera, gose okworokereria, gose okomaanorerwa, gose gokwana ase omonwa, gose koonchora, amang’ana onsi tiga akoreke ase okoagacha ekanisa. 27Onye omonto ogokwana ase omonwa otamanyekaneti, bakwane babere gose batato boka, korende kera omonto ase ribaga riaye, na oyomo aonchore. 28Korende onye oyokoonchora taiyo, tiga oyogokwana ase omonwa akire ase ekanisa, ekwanere bweka omonyene naende akwane na Nyasae. 29Ababani bakwane babere gose batato, na abande barenge amang’ana aya bakwana. 30Korende oyonde oikaransete karaigorerwe ring’ana, oria bwe ritang’anitiga akire. 31Naki inwe mwensi namonyare kobana oyomo ase oyomo, erinde bonsi banyare kweorokereria, na bonsi baremigwe. 32Emeika y’ababani nigo ekoigwera ababani. 33Naki Nyasae tari Nyasae bw’eburuburu, korende oyo bw’omorembe.

Buna ere ase chikanisa chionsi chi’abachenu, 34abakungu bakire ase chikanisa. Naki tibari ne ribaga ri’ogokwana, korende baigwere buna amachiko agoteba. 35Onye barigetie kweorokereria ring’ana, tiga baborie abasacha babo inka. Naki nobosooku omokungu gokwana ase ekanisa. 36Inee! Ring’ana ria Nyasae nasemore riarwete, gose ninwe mweka riaikerete?

37Omonto karerore ng’a nomobani are, gose noyo bw’Omoika, tiga amanye ng’a aya nabarikeire namachiko ’Omonene. 38Onye omonto tarigeti koyamanya, tiga abe omoriri. 39Ase ayio baminto, rigia mono okobana, gose timokana ogokwana kw’emenwa. 40Amang’ana onsi akoreke ase obuya na ase omoroberio.

Currently Selected:

1 ABAKORINTO 14: EKEGUSIIBBLE

Highlight

Copy