Mat 23

Îîmenyagîrîreni mûtigatuîke ta Arimû a Watho na Afarisai

(Mar 12.38-39; Luka 11.43,46; 20.45-46)

1Jesû nîwacokire akîîra kîrîndî wa vamwe na arutwa ake atîrî, 2“Arimû a watho na Afarisai nîo mavetwe rûtha rwa gûtaûra watho wa Musa. 3Kwoguo nwa nginya mwathîkîre na mûrûmîrîre maûndû monthe marîa mamwîraga mwîke. Nwatî mûtikarûmîrîre mîtugo yao, nîûndû matiîkaga ûrîa mavunjagia. 4O maringagîrîria andû kwathîkîra mawatho marito mûno marîa mekariî ta mûrigo makuuîte. Nwatî o ene matiîtîkagîra wanarî kûmîvutia na Kîamra mamatethie. 5#Mat 6.1; Nda 15.38; Gûco 6.8 Mekaga maûndû mao monthe nîguo monwe nî andû. Nîmaramagia ithitû#23.5 Ithitû: cia Ayahudi nî tûthandûkû tûnini tûrî na karatathi ndaarî kaandîkîtwe ciugo cia îvuku rîa Ngai, na tûkovererwa ûthiû (Gûcok 6.8). ciao na nîmaracavagia mîcivi ya nguo ciao! 6Mendaga gwîkarîra itî cia ageni a gîtîîo marugarî na gwîkarîra itî cia mbere mavoerorî. 7Nîmendaga gûkethua na gîtîîo thokorî na gwîtwa ‘arimû’ nî andû. 8Nwatî mue mûtiagîrîrwe nî gwîtwa ‘arimû,’ nîûndû mue muonthe mûrî ariû a îthe ûmwe na mûrî na mwarimû ûmwe tu. 9Namue mûtiagîrîrwe nî gwîta mûndû wana ûrîkû ‘Vava’ gûkû nthî, nîûndû mûrî na îthe ûmwe tu ûrîa ûrî îgûrû. 10Wana mûtiagîrîrwe nî gwîtwa atongoria nîûndû mûtongoria wenyu nî ûmwe na nîke Mesaya. 11#Mat 20.26-27; Mar 9.35; 10.43-44; Luka 22.26 Mûndû ûrîa mûnene kûrî arîa engî gatagatîrî kenyu nwa nginya ethîrwe arî ndungata yenyu. 12#Luka 14.11; 18.14 Nake mûndû wa wonthe wînenevagia nîakaanyivua, na mûndû wa wonthe wînyivagia nîakaanenevua.

Jesû nîwamenererie ûvinga

(Mar 12.40; Luka 11.39-42,44,52; 20.47)

13“Na kaî mue arimû a Watho na Afarisai mûrî na thîna-î! Mue mvinga ino! Mue mûvingagîrîria andû matigatonye ûthamakirî wa îgûrû. Nwatî mue ene mûtitonyaga kana mûgetîkîria arîa marenda gûtonya matonye. [14Na kaî mue arimû a Watho na Afarisai mûrî na thîna-î! Mvinga ino! Mue mûveenagîrîria aka a ndigwa na mûkamacuna indo ciao cionthe, na mûgacoka mûkavoya mavoya maraca nîguo mwonwe nî andû. Nîûndû wa ûguo, mue nîmûgaatuîrwa îvera rînene.]#23.14 Mandîko mamwe matirî 23.14.

15“Na kaî mue arimû a Watho na Afarisai mûrî na thîna-î! Mvinga ino. Mue mûringaga maria na mûgatuîkania mavûrûri nîguo mûgarûre mûndû ûmwe atuîke wa ndini yenyu. Na vîndî îrîa mwamûgarûra, nîmûtûmaga atuîke wa gûgaaikua îcuarî maita maîrî ma ûrîa mue mûgaaikua.

16“Na kaî mue atongoria atumumu mûrî na thîna-î! Mue mûthomithanagia atîrî, ‘Mûndû angîîvîta na hekarû, ke tî mwove nî mwîvîto wake. Nwatî mûndû angîîvîta na thaavu îrîa îthagîrwa îrî hekarûrî ke nî mwove nî mwîvîto wake.’ 17Mue irimû ino ndumumu! Nî ndûî kîrî vata makîria; nî thaavu kana nî hekarû îrîa îtûmaga thaavu îo îtuîke nyamûre? 18Wana nîmûthomithanagia atî, ‘Mûndû angîîvîta na metha ya kîgongoona ke tî mwove nî mwîvîtwa ûcio wake. Nwatî mûndû angîîvîta na matega marîa marî metharî ya kîgongoona, ke nî mwove nî mwîvîtwa.’ 19Mue atumumu aya! Nî ndûî kîrî vata makîria, nî matega kana nî metha ya kîgongoona îrîa îtûmaga matega matuîke mamûre? 20Kwoguo mûndû ûrîa wîvîtaga na metha ya kîgongoona, evîtaga nayo wa vamwe na matega marîa marî metharî îo ya kîgongoona. 21Nake mûndû ûrîa wîvîtaga na hekarû, evîtaga nayo na akevîta na Ngai ûrîa ûtûûraga kuo. 22#Isa 66.1; Mat 5.34 Nake mûndû ûrîa wîvîtaga na îgûrû, ke evîtaga na gîtî Kîam ûthamaki Kîam Ngai, na akevîta na Ngai ûrîa ûgîkaragîra.

23 # Ala 27.30 “Na kaî mue arimû a Watho na Afarisai mûrî na thîna-î! Mue mvinga ino! Mue mûrutagîra Ngai gîcunjî gîa îkûmi Kîam manyenyi ta ma rwoga, karîmî ka nthiia, na nderamûkîa, nwatî mûtirûmagîrîra maûndû marîa ma vata megiî watho ta, kîvooto, kwîgucanîra ntha na kwîvokeka. Maûndû mama nîmwagîrîrwe nî kûmeka mûtagûtiganîria mau mengî. 24Mue atongoria aya atumumu! Mûcungaga cai nîguo mûtikamerie ngi, nwatî mûkameria ngamîîra!

25“Na kaî mue arimû a Watho na Afarisai mûrî na thîna-î! Mue mvinga ino! Mûthambagia ikombe na thaani cienyu gûkû îgûrû, nwatî ndaarî gwîcûrîte indo irîa mwonete na njîra ya gûcuunana na ya wîyendi. 26Mue Afarisai aya atumumu! Ambani mûthambie gîko kîrîa kîrî ndaarî ya gîkombe, nakuo kûu nja nîgûkwîthîrwa gwî kûtheru wana kuo.

27 # Ciîko 23.3 “Na kaî mue arimû a Watho na Afarisai mûrî na thîna-î! Mue mvinga ino! Mue mwîkariî ta mbîrîra irîa cionekaga irî nthaka ivakîtwe mûnyû, nwatî ndaarî ya cio ciîthagîrwa ciîcûrîte mavîndî na ciimba ino mboru. 28Ûguo nwa ta guo wa namue mwonekaga mûrî aro nî andû onthe, nwatî na kûu ndaarî mwîcûrîtwe nî ûvinga na mevia.

Jesû nîwarathire ûvoro wa kûverithua kwa Afarisai na arimû a Watho

(Luka 11.47-51)

29“Na kaî mue arimû a Watho na Afarisai mûrî na thîna-î! Mue mvinga ino! Nîmûtumaga mbîrîra mbaro cia arathi na mûkagemia mbîrîra cia andû arîa maarî athingu. 30Mue mugaga atîrî, ‘Kethîrwa nîmwatûûraga mwoyo vîndî ya methe menyu, mûtingîagwatanîre nao kûûraga arathi. 31Kwoguo mue nîmwîtîkagîra atî mûrî a rûciaro rwa andû arîa maaûragire arathi! 32Thiîni mbere vi na mûrîkie wîra ûrîa wambîrîrue nî methe menyu! 33#Mat 3.7; 12.34; Luka 3.7 Mue njoka na ciana cia njoka! Mûkaavota atîa kûûra nîguo mûtikathiî îcuarî! 34Kwoguo, nîngaamûtûmîra arathi, andû aûgî na arimû. Amwe nîmûkaamaûraga, engî mûmambe mûtîrî na acio engî mûmarivîre mavoerorî na ivoko; mûcoke mûmengate kuuma îtûûra rîmwe kûthiî rîrîa rîngî. 35#Kîam 4.8; 2Maû 24.20-21 Kwoguo, nîngaamûverithia nîûndû wa kûûraga andû onthe arîa athingu, kuuma kûûragwa kwa Habili nginyagia kûûragwa gwa Zakaria mûrû wa Barakia, ûrîa mwaûragîre gatagatîrî ka hekarû na metha ya kîgongoona. 36Nie nîramwîra nama atî, andû a rûciaro rûrû nîmakaaverithua nîûndû wa maûndû mau monthe macûku, marîa mue na methe menyu mwaneka!

Wendo wa Jesû kûrî andû a Jerusalemu

(Luka 13.34-35)

37“Jerusalemu, Jerusalemu! We nî ûragaga arathi na ûkariva na mathiga andû arîa onthe Ngai agûtûmîra! Nî maita megana nie nanenda gûcokanîrîria andû aku vamwe, wata ûrîa ngûkû îcokanagîrîria tûciiû rungu rwa mathagu mayo nwatî ndwanambîtîkîria! 38#Jer 22.5 Kwoguo hekarû yaku nîgaatiganîrua na îkare îrî ntheri. 39#Tha 118.26 Nie nîramwîra nama atî mue mûtikaamona nginyagia rîrîa mûkaauga atîrî, ‘Ngai arorathima ûrîa ûûkîte na rîîtwa rîa Mwathani.’”

Currently Selected:

Mat 23: KKB

Highlight

Copy