रोमियो 5
5
परमेसरा किन्हें मेल मिलाप
1इधी कठे यीसू मसीह पर विस्वास करणे रे वजहा ले परमेसरे आस्से आपणी नजरा मन्झ धर्मी माह्णुं बणाए, क्यूंकि प्रभु यीसू मसीहे जो आस्सा रे कठे कितिरा जेसरे ज्रीए आस्सा रा परमेसरा साउगी मेल मिलाप हुआ। 2आस्सा रे विस्वास करणे रे ज्रीए मसीहे आस्सा पर अनुग्रह कितेया, जेसरे ज्रीए आस्से टिकीरे, होर आस्से हिम्मत होर खुसी साउगी परमेसरा री महिमा जो बांडणे रे कठे उत्सुक ऐं।
3सिर्फ येई नी, पर आस्से दुःखा जो सैहण रे कठे भी खुस हुयें, एह्ड़ा जाणी किन्हें कि दुःखा सैहण करणे ले सबर बधां। 4क्यूंकि आस्से ऐबे सिखिरा कि कियां सबर रखणा चहिए, इधी कठे परमेसरे आस्सो मंजूरी दितिरी, क्यूंकि तिन्हें आस्सो मंजूरी देई दितिरी, इधी कठे आस्सा वाले आस ई। 5होर ये आस आस्सा जो दुआस नी करदी क्यूंकि परमेसरे आस्सा जो पवित्र आत्मा दितिरी, होर से पवित्र आत्मा आस्सा रे दिला जो परमेसरा रे प्यारा किन्हें भरा।
6क्यूंकि जेबे आस्से कमजोर थे, ता परमेसरा रे नियुक्त टैमा पर मसीह यीसू आस्सा पापी लोका रे कठे मरेया। 7धर्मी माह्णुं रे कठे आपणी जान देणा लोका रे कठे मुस्किल आ, पर हुई सक्हा कि कोई माह्णुं केसी भले माह्णुं रे कठे आपणी जाण देणे रे कठे त्यार हुई जाये।
8पर परमेसर आस्सा पर आपणे प्यारा री भलाई एस तरहा जाहिर करहा कि, जेबे आस्से पापी ही थे ता मसीह यीसू आस्सा रे कठे मरेया। 9क्यूंकि मसीहे रे खून बहाई किन्हें आस्सा रे पाप रे कठे मरणे रे ज्रीए परमेसरे आस्से आपणी नजरा मन्झ धर्मी माह्णुं बणाए, इधी कठे मसीहा आस्से परमेसरा रे गुस्से ले पक्का बचाणे।
10क्यूंकि जेबे आस्से परमेसरा रे बरखलाप थे ता तेसरे मह्ठे री मौता रे ज्रीए आस्सा रा मेल मिलाप परमेसरा साउगी कुराया गया। जेबे कि मसीह ऐबे जिउंदा ये पक्की गल कि तेस आस्सा रा उद्धार करणा। 11होर सिर्फ येई नी, ऐबे ता प्रभु यीसू मसीह रे ज्रीए आस्सा रा परमेसरा किन्हें मेल मिलाप हुई गया, इधी कठे आस्से परमेसरा मन्झ खुस ऐं।
आदमा रे ज्रीए मौत, मसीह रे ज्रीए जिन्दगी
12इधी कठे जिहां कि एक माह्णुं आदमा रे ज्रीए पाप एस संसारा मन्झ आया जो परमेसरा रा पैहला बणाईरा माह्णुं था। होर आदम पाप करणे री वजहा ले से मरेया, होर इंहां ही संसारा मन्झ जिउंदे सभ माह्णुं मरी गये, क्यूंकि ये एह्ड़ी गल थी कि जिहां आदमे पाप कितेया ता सभी लोके पाप कितेया।#5:12 जेबे कि एस संसारा रे लोक आदमा रे बच्चे, जेबे आदमे पाप कितेया ता सभीए पाप कितेया, होर एस तरीके ले पापा रा स्वभाव आदमा ले सभ लोका मन्झ से स्वभाव आई गया 13परमेसरे मूसा जो व्यवस्था देणे रे पैहले ही पाप संसारा मन्झ था, पर जेथी व्यवस्था नी, तेथी पाप भी नी गिणी जांदा।
14तेबे भी आदमा ले लई किन्हें मूसा तक सभ लोके पाप कितेया, होर स्यों सभ मरी गये; एथी तक कि स्यों लोक भी मरी गये; जिन्हें जे परमेसरा रे हुक्म नी टाल्या था, जिहां जे आदमे सीधे परमेसरा ले पाईरे हुकमा जो टाल्ली दितिरा था। जेबे आदम आया ता तेसरे पापा री वजहा ले सभी लोका री जिन्दगी पर असर पया, ठीक तिहां ईं जेबे यीसू मसीह संसारा मन्झ आया ता तेसरा भी सभी लोका री जिन्दगी जो पापा ले बचाणे रा असर पया।
15पर आदमा रे पाप होर परमेसरा रे अनुग्रहा रे दाना मन्झ बौह्त फर्क आ। क्यूंकि आदमा रे पापा री वजहा ले सभ लोका मरी गये, पर एस ले बड़ी किन्हें यीसू मसीह रे ज्रीए कई लोका जो परमेसरा रा बड़ा अनुग्रह होर धार्मिकता रा दान मिलेया।
16पर परमेसरा रे दाना री तुलना आदमा रे पापा किन्हें नी किती जाई सक्दी। क्यूंकि एक माह्णुं रे पापा रे वजहा ले तेस पर होर तेस साउगी सभ माह्णुं जो सजा मिली, हालांकि आस्से बौह्त ज्यादा पाप किते पर परमेसरा रे आस्सा जो आपणा दान दितेया जिन्हें आस्से तेसरी नजरा मन्झ धर्मी माह्णुं बणाए। 17क्यूंकि एक माह्णुं आदमा रे पाप री वजहा ले सभ लोक मरी गये। पर यीसू मसीह रे ज्रीए आस्सा पर बौह्त बडा अनुग्रह हुआ, होर परमेसरे आस्से आपणी नजरा मन्झ धर्मी माह्णुं बणाए। होर यीसू मसीह पर विस्वास करणे रे ज्रीए आस्सो अनंत जिन्दगी मिलणी होर आस्सा यीसू मसीह साउगी राज करणा।
18इधी कठे जिहां आदमा रे पापा री वजहा ले परमेसरे सभ लोका जो सजा दिति, ठीक तिहां ईं यीसू मसीह रे धार्मिकता रे काम करणे रे ज्रीए सभ माह्णुं जो जिन्दगी मिली, होर स्यों परमेसरा री नजरा मन्झ धर्मी माह्णुं बणे। 19क्यूंकि जिहां एक माह्णुं रे हुक्म नी मनणे ले बौह्त लोक पापी बणे, तिहां ही एक माह्णुं रे हुक्म मनणे री वजहा ले बौह्त लोका परमेसरा री नजरा मन्झ धर्मी माह्णुं बणे।
20परमेसरे आपणी व्यवस्था मूसा जो इधी कठे दिती, ताकि लोक ये जाणी सके कि स्यों कितना भारी पाप करी चुकिरे, पर जेबे लोके होर भी ज्यादा पाप किते, तेथी परमेसरे आपणा अनुग्रह होर भी ज्यादा कितेया। 21परमेसरे ये इधी कठे कितेया क्यूंकि लोक पाप करी किन्हें मरदे लगिरे थे, पर यीसू मसीह रे ज्रीए परमेसरा रा अनुग्रह तिन्हो तेसरी नजरा मन्झ धर्मी माह्णुं बणा होर अनंत जिन्दगी देआ।
Currently Selected:
रोमियो 5: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
