मरकुस 10

तलाका रे बारे मन्झ यीसू रा उपदेस

(मत्ती 19:1-12; लूक. 16:18)

1फेरी यीसूए कफरनहूम सैहरा ले निकली किन्हें यहूदिया ईलाके रा बन्ना पार करी किन्हें यरदन दराऊआ रे पारली तरफ आया। होर भीड़ तेस वाले दबारा कठी हुई गयी, होर से हमेसा साहीं तिन्हा जो उपदेस देंदा लग्या।

2तेबे फरीसी लोक तेस वाले आई किन्हें तेसरी परखणी करणे रे कठे तेस ले पूछेया, “क्या मूसा री व्यवस्था रे मताबक ये ठीक आ कि मर्ध आपणी लाड़ी जो तलाक देई सक्हा?”

3यीसूए तिन्हा ले पूछेया, “कि मूसे तुस्सा जो क्या हुक्म दितिरा?”

4तिन्हें जवाब दितेया, “मूसे बोल्या की त्याग पत्र देई किन्हें आपणी लाड़ी जो छाडी सक्हा ऐं।”#10:4 व्य. 24:1-3

5यीसूए तिन्हा किन्हें बोल्या कि, “तुस्से जिद्दी ऐं, एस वजहा ले मूसे नबिये तुस्सा रे कठे ये हुक्म लिख्या।”

6“पर सृस्टी रे सुर्हूआता, ले ई परमेसरे ‘मर्ध होर जन्नाने करी किन्हें तिन्हा जो बणाया।’#10:6 उत्प. 1:27, उत्प. 5:2 7‘एता कठे माह्णुंआं आपणे माऊ-बापू ले लग हुई किन्हें आपणी लाड़ी रे साउगी रैहणां। 8होर तिन्हा दुंहींया एक हूंणां।’ इधी कठे स्यों ऐबे दो नी, पर एक हूंणे।#10:8 उत्प. 2:24 9इधी कठे जेस जो परमेसरे जोड़िरा हो, तेस जो माह्णुं लग नी करहे।”

10जेबे से बादा मन्झ घरा चेले साउगी कल्हा था एता रे बारे मन्झ तेस ले दबारा पूछेया। 11तिन्हें तिन्हा किन्हें बोल्या, “जो कोई आपणी लाड़ी जो तलाक देई किन्हें दूजी किन्हें ब्याह करहे, ता से तेस्सा पैहली रे बरखलाफ व्यभिचार करहा। 12होर अगर ज्नाने आपणे लाड़े जो तलाक देई किन्हें दूजे किन्हें ब्याह करही, ता से भी व्यभिचार करहा ई।”

बच्चेया जो आसरीवाद

(मत्ती 19:13-15; लूक. 18:15-17)

13फेरी लोक बच्चेया जो यीसू वाले ल्याउंदे लगे, ताकि से तिन्हा पर हाथ रखी किन्हें तिन्हा जो आसरीवाद दे, पर चेले तिन्हा माऊ-बापू जो बक्के। 14जेबे यीसू ये देखी किन्हें आपणे चेले किन्हें गुस्सा हुई गया होर तिन्हा किन्हें बोल्या, “बच्चेया जो मेरे वाले आऊणें देआ होर इन्हा जो नांह नी करा, क्यूंकि परमेसरा रा राज एह्ड़े लोका रा आ जो बच्चे साहीं नम्र ऐं। 15हांऊँ तुस्सा किन्हें सच्च बोल्हा कि, जो कोई परमेसरा रे राजा जो बच्चेया साहीं ग्रैहण करा, तेस तेता मन्झ दाखल हूंणां।” 16होर यीसूए बच्चे गोदा मन्झ लये, होर तिन्हा पर हाथ रखी किन्हें तिन्हा जो आसरीवाद दितेया।

परमेसरा रे राजा मन्झ अमीरा रा दाखल हूंणां

(मत्ती 19:16-30; लूक. 18:18-30)

17जेबे यीसूए आपणे चेले साउगी यरुस्लेम वखा जो जाणे रे कठे आपणा सफर सुर्हू कितेया, ता एक माह्णुं तेस वाले दौड़ी किन्हें आया, होर तेसरे अगे घुटणे टेकी किन्हें तेस ले पूछेया? “हे खरे गुरु, अनंत जिन्दगी पाणे रे कठे हांऊँ क्या करूं?”

18यीसूए तेस किन्हें बोल्या, “तू मुंजो खरा कि बोल्हा? परमेसरा जो छाडी किन्हें कोई खरा नी आ। 19पर तू हुक्मा जो ता जाणहां, ‘हत्या नी करणा, व्यभिचार नी करणा, चोरी नी करणा, झूठी गुआही नी देणा, धोखा नी देणा, होर आपणे माऊ बापू री इज्जत करणी।’#10:19 निर्ग. 20:12-16, रोम. 13:9 ”

20तिन्हें तेस किन्हें बोल्या, “हे गुरु, इन्हा सभी गल्ला जो ता हांऊँ बचपना ले ई मन्नदा आईरा। क्या मुन्जो कुछ होर भी करणा पऊणा?”

21यीसू तेस वखा जो देख्दा लगया होर यीसू जो तेस पर बौह्त प्यार आया, होर तेस किन्हें बोल्या, “तेरे अंदर एक गल्ला री कमी ई, जा जो कुछ तेरा आ तेता जो बेची किन्हें गरीबा जो दे फेरी आई किन्हें मेरा चेला बण, होर तुजो स्वर्गा मन्झ धन मिलणा।”

22एस गल्ला ले तेसरे चेहरे पर दुआसी छाई गयी, होर से दुःखी हुई किन्हें चली गया, क्यूंकि से बौह्त अमीर था होर आपणी जायदाद नी बेचणा चाहन्दा था।

23यीसूए चारो तरफ देखी किन्हें आपणे चेले किन्हें बोल्या, “अमीरा रा परमेसरा रे राजा मन्झ दाखल हूंणां बौह्त कठण आ!”

24चेले तेसरी गल्ला ले बौह्त हरान हुए। एता पर यीसूए दबारा तिन्हा जो जवाब दितेया, “हे भाईयो, जो धन दौलता पर भरोसा रख्हा ऐं, तिन्हारे कठे परमेसरा रे राजा मन्झ दाखल हूंणां बौह्त कठण आ! 25ऊंटा रा सुई रे नाके मन्झा ले निकल्ना असान हुई सक्हा पर परमेसरा रे राजा मन्झ अमीरा रा दाखल हूंणां बौह्त कठण आ।”

26चेले बौह्त ई हरान हुई किन्हें आपु मन्झ बोल्दे लगे जे अमीरा रा परमेसरा रे राजा मन्झ दाखल हूंणां बौह्त कठण आ “ता फेरी केसरा उद्धार हुई सक्हा?”

27यीसूए तिन्हा जो देखी किन्हें बोल्या, “माह्णुंआं ले ता ये हुई नी सक्दा, पर परमेसरा ले हुई सक्हा; क्यूंकि परमेसरा ले सभ कुछ हुई सक्हा।”

28पतरस तेस किन्हें बोल्दा लग्या कि, “देख, आस्से ता सभ कुछ छाडी किन्हें तेरे चेले बणी गईरे ता आस्सा जो क्या मिलणा?”

29यीसूए बोल्या, हांऊँ तुस्सा किन्हें सच्च बोल्हा कि, “जिन्हें जे मेरे होर मेरे खुसी री खबरा रे कठे घर-बार या भाई-बैहण या माऊ-बापू या बाल बच्चे या जमीन छाडिरी हो, 30तिन्हा जो एस युगा मन्झ घर-बार होर भाई-बैहण होर माऊ, बाल-बच्चे होर जमीन, सौ गुणा वापस मिलणे। हलांकि मेरे चेले हूंणे री वजहा ले एस संसारा मन्झ रैहन्दे हुए स्यों स्ताए जाणे, आऊणें वाले युगा मन्झ तिन्हा जो अनंत जिन्दगी मिलणी। 31पर बौह्त जो ऐबे खास हुन्घे तिन्हा बादा मन्झ खास नी हूंणां होर जो ऐबे खास नी ऐं तिन्हा बादा खास हूंणां।”

आपणी मौता रे बारे मन्झ यीसू रा त्रीजी बारी दसणा

(मत्ती 20:17-19; लूक. 18:31-34)

32यीसू, चेले होर दूजे लोक यरुस्लेम सैहरा जो जांदे लगिरे थे। जेबे स्यों पैंडे मन्झ थे, यीसू तिन्हारे अगे-अगे जाया करहा था: चेले हरान हुंदे लगे होर जो लोक तेसरे पीछे चल्या करहा ऐं थे, स्यों डरदे लगे। तेबे यीसू तिन्हा बारा चेले जो लग लई गया, फेरी से तिन्हा किन्हें आपणे मरणे रे बारे मन्झ गल्ला करदा लग्या। 33“आस्से यरुस्लेम सैहर जो जाहें, होर तेथी हांऊँ माह्णुं रा मह्ठा मुख्य याजको होर व्यवस्था स्खाणे वाल़ेया रे हाथा पकड़वाया जाणा। होर तिन्हा मुंजो मौता री सजा देणी होर अन्यजाति लोका रे हाथा मन्झ पकड़ाई देणा। 34होर तिन्हा मेरा मजाक डूआणा, होर मेरे पर थूकणा, होर मुन्जो कोड़े मारणे, होर हांऊँ मुकाई देणा, होर मां त्रीजे ध्याड़े जिउंदे हुई जाणा।”

याकूब होर यहून्ना री अर्ज

(मत्ती 20:20-28)

35तेबे जब्दी रे मह्ठे याकूब होर यहून्ना तेस वाले आई किन्हें बोल्दे लगे, “हे गुरु, आस्से ये चाहें कि, जो आस्से तेरे ले मांगे, सेई तू आस्सा रे कठे कर।”

36होर यीसूए तिन्हा किन्हें बोल्या, “तुस्से क्या चाहें कि हांऊँ तुस्सा रे कठे करूं?”

37तिन्हें तेस किन्हें बोल्या, “आस्सा जो ऐं हक दे कि जेबे तुध महिमा मन्झ आऊंणा ता आस्से तेरे साउगी बैठे, एक ओरली वखा जो होर दूजा परली वखा जो।”

38यीसूए तिन्हा किन्हें बोल्या, “तुस्से नी जाणदे कि, क्या मान्घ्हा ऐं? जो दुखा रा डोंगा हांऊँ पीणे वाल़ा आ; क्या तुस्से पी सक्हा ऐं होर मौता रा बपतिस्मा जे मा लेणा क्या तुस्से लई सक्हा ऐं?”

39तिन्हें तेस किन्हें बोल्या, “आस्सा ले हुई सक्हा।”

यीसूए तिन्हा किन्हें बोल्या, “जो दुखा रा डोंगा हांऊँ पीणे वाल़ा आ, तुस्सा भी पीणा; होर जो मौता रा बपतिस्मा हांऊँ लैणे वाल़ा आ, से तुस्सा भी लैणा। 40पर मुन्जो ये बोलणे रा हक नी आ कि मेरे ओरली वखा जो परली वखा जो केस बैठणा, परमेसरे आपणे चुणिरे लोका रे कठे तेह्ड़ी जगहा त्यार कितिरी।”

41ये सुणी किन्हें, दसा रे दस चेले तिन्हा दुंहीं भाईया याकूब होर यहून्ना पर गुस्सा हुए। 42होर यीसूए स्यों सभ आपु वाले सादे, होर तिन्हा किन्हें बोल्या, “तुस्से जाणहां ऐं कि, जो अन्यजाति लोका रे हाकम समझे जाहें, स्यों तिन्हा पर राज करहा ऐं। होर जो बडे ऐं, स्यों तिन्हा पर हक जताहें। 43पर तुस्सा मन्झ एह्ड़ा नी आ, जो कोई तुस्सा मन्झ बडा हूंणां चाहां से तुस्सा रा सेऊआदार बणे। 44होर तुस्सा मन्झ जो कोई मुखिया बणना चाहे, तेस जो सभिरा गुलाम बणना जरूरी आ। 45क्यूंकि हांऊँ माह्णुं रा मह्ठा इधी कठे नी आईरा कि, मेरी सेऊआ किती जाए, पर इधी कठे आईरा कि, हांऊँ आपु दूजे री सेऊआ करूं, होर कईया रे छुटकारे रे कठे आपणी जान देऊँ।”

काणे बरतिमाई रा ठीक हूंणां

(मत्ती 20:29-34; लूक. 18:35-43)

46होर यीसू होर तेसरे चेले यरुस्लेम सैहरा वखा जो सफर करदे हुए ऐबे यरीहो सैहरा मन्झ आये। तेबे स्यों होर एक बडी भीड़ यरीहो छाडी किन्हें जाया करहा ई थी, ता तिमाई रा मह्ठा बरतिमाई नांऊँआं रा एक काणा भिखारी, सड़का रे बाढे बैठिरा था। 47जेबे काणे भिखारिये ये सुणेया कि नासरता रा यीसू तेथी ले हुई किन्हें जाया करहा; से हाका पाई किन्हें बोल्दा लग्या, “हे राजा दाऊदा रे मह्ठे (यीसू राजा दाऊदा रे बंसा रा था) यीसू मेरे पर दया कर।”

48कई लोके से प्रुआचेया कि से चुपचाप रह, पर से होर ज्यादा चिंगदा लग्या कि, “हे राजा दाऊदा रे मह्ठे, मेरे पर दया कर।”

49तेबे यीसू रुक्या होर बोल्या, एस जो मेरे वाले ल्याउआ, “होर लोके तेस काणे जो सादी किन्हें तेस किन्हें बोल्या, हिम्मत कर, उठ खड़ा हुई जा, यीसू तुजो सादेया करहा।” 50जेह्ड़ा चोगा तिन्हें ढकिरा था तेस जो सट्टी किन्हें एकदम उठेया होर यीसू वाले आई गया।

51होर यीसूए तेस किन्हें बोल्या, “तू क्या चाहां कि हांऊँ तेरे कठे करूं?” होर काणे तेस किन्हें बोल्या, “हे गुरु, हांऊँ बस इतना चाहां कि हांऊँ देख्दा लगी जाऊं।”

52यीसूए तेस किन्हें बोल्या, “चली जा, ते विस्वास कितेया इधी कठे तू ठीक हुआ।” होर से झटपट देख्दा लग्या, होर से यीसू साउगी पैंडे मन्झ चली पया।

Currently Selected:

मरकुस 10: MJLNT

Highlight

Copy

Compare