“पर हांऊँ तुस्सा सुणने वाल़ेया किन्हें बोल्हा कि, आपणे दुसमणा किन्हें प्यार रखा; जो तुस्सा किन्हें नफरत करहे, तिन्हारा भला करा। जो तुस्सा जो स्राप दे, तिन्हा जो तुस्से आसरीवाद देआ: जो तुस्सा री बेज्जती करहे, तिन्हारे कठे प्रार्थना करा। तेरे मुंहा रे सीधी तरफ तुजो चांडा मारे, ता तेस वखा जो आपणे मुंहा रा दूजा पासा भी फेरी दे, तेस जो कुरता लैणे ले भी नी रोक। जो कोई तुध ले मांगे, तेस जो दे; होर जो तेरी चीजा लई ले तेस ले दबारा वापस नी मांग। होर जेह्ड़ा तुस्से चाहें कि लोक तुस्सा साउगी करहे, तुस्से भी तिन्हा साउगी तेह्ड़ा ई करा।”
“अगर तुस्से आपणे प्यार रखणे वाल़े किन्हें ई प्यार रखघे, ता तुस्सा री तेता मन्झ क्या बड़ाई हुई? क्यूंकि पापी भी आपणे प्यार रखणे वाल़ेया किन्हें प्यार रख्हा ऐं। होर अगर तुस्से आपणे भलाई करणे वाल़ेया साउगी ई भलाई करहा ऐं, ता तुस्सा री तेता मन्झ क्या बड़ाई हुई? क्यूंकि पापी भी ता एह्ड़ा ई करहा ऐं। होर अगर तुस्से तिन्हा जो धुआर देहां ऐं, जिन्हा ले दबारा वापस पाणे री आस रखो, फेरी किधियो लोक तुस्सा री तारीफ करहे? क्यूंकि पापी पापिया जो धुआर देहां ऐं, ताकि तितना ई फेरी दबारा वापस पाई सको। बल्कि आपणे दुसमणा किन्हें प्यार रखा, होर तिन्हारा भला करा: होर दबारा वापस पाणे री आस नी रखी किन्हें धुआर देआ; होर तुस्सा जो बड़ा इनाम मिलणा। होर तुस्सा परमप्रधाना रे बच्चे बणना, क्यूंकि से तिन्हा पर जो धन्यावाद नी करदे होर बुरे ऐं से तिन्हा दुहींया पर तरस करहा। जेह्ड़ा तुस्सा रा बापू दया करणे वाल़ा, तिहां ई तुस्से भी दया करणे वाल़े बणा।”
“केसी रा न्याय मत करहा ता तुस्सा रा भी न्याय नी हूंणा। दोस मत लगाऊआ, ता तुस्सा पर भी दोस नी लगाया जाणा। माफ करा, ता तुस्से भी माफ किते जाणे। देई करा, ता तुस्सा जो भी दितेया जाणां: लोका तुस्सा जो पूरा नापी किन्हें, दबाई-दबाई किन्हें होर हिलाई-हिलाई किन्हें दली किन्हें तुस्सा री फाल्हे मन्झ पाणा, क्यूंकि जेस नापा किन्हें तुस्से नाप्हा ऐं, तेस ई नापा किन्हें तुस्सा रे कठे भी नाप्या जाणा।”
फेरी यीसूए तिन्हा किन्हें एक उदाहरण बोल्या, “क्या काणा, काणे जो पैंडा दसी सक्हा? क्या तिन्हा दुहिंआं गढे मन्झ नी पऊणा? चेला आपणे गुरु ले बडा नी आ; पर जेबे तेस सिद्ध हुई जाणा, ता तेस आपणे गुरु साहीं बणी जाणा। तू किधियो आपणे भाई री छोटी जे गलती जो देख्हा, होर आपणी बडी गलती तुजो नी सूझ्दी? होर जेबे तेरी आपणी गलतिया कितनी बडी ई, ता तू आपणे भाई जो किधियो बोल्हा कि ‘हाऊँ तेरी छोटी जे गलती ठीक करूं।’ ओ पाखंडी, पैहले आपणी गलतिया जो सुधार, तेबे तु तेसरी मदद करी सक्हा कि से आपणी गलतिया जो सुधारी सको।”
“कोई खरा डाल नी आ, जो बुरा फल ल्याए, होर ना ता कोई बुरा डाल आ, जो खरा फल ल्याए। हरेक डाल आपणे फला ले पछ्याणया जाहाँ; क्यूंकि लोक झाकड़ा ले अंजीर नी तोड़दे, होर ना झड़बेरी ले अंगूर। खरा माह्णुं मना रे भण्डार ले खरी गल्ला काढा; होर बुरा माह्णुं मना ले भण्डार ले बुरी गल्ला काढा; क्यूंकि जो मना मन्झ भरीरा, सेई मुंहा पर आई जाहाँ।”
“जेबे तुस्से मेरा ग्लाईरा नी मन्नदे, ता तुस्से मुंजो हे प्रभु, हे प्रभु किधियो बोल्हा ऐं? जो कोई मेरे वाले आहूँआं होर मेरी गल्ला सुणी किन्हें तिन्हा जो मन्हां, हांऊँ तुजो दस्हा कि से केस साहीं आं। से तेस माह्णुं साहीं आं, जिन्हें जे घर बनाणे रे टैमा जमीन डुघी खणी किन्हें चट्टाना प्रयाल्हे नींऊ पाई, होर जेबे बाढ़ आई ता धारा तेस घरा पर लगी, पर तेस जो हिलाई नी सकी; क्यूंकि से पक्का बणीरा था। पर जो सुणी किन्हें नी मन्नदा, से तेस माह्णुं साहीं आं, जिन्हें जे जमीना प्रयाल्हे बगैर नींऊँआं रा घर बणाया। जेबे तेस पर धारा बजी, ता से झटपट पई गया; होर से पई किन्हें सत्यानास हुई गया।”