याकूब 1

नमस्कार

1हांऊँ याकूब, परमेसरा होर प्रभु यीसू मसीह रा सेऊआदार आ। हांऊँ ये चिठ्ठी तिन्हा यहूदी विस्वासिया रे बारा गोत्रा जो संसारा मन्झ तितर-बितर हुई किन्हें रैंहयां ऐं लिख्दा लगिरा। तुस्सा सभी जो मेरा नमस्कार।

परखे जाणे री महानता

2हे भाईयो होर बैहणो, जेबे तुस्से कई किस्मा री परीक्सा मन्झ पई जाओ, 3ता एता जो तुस्से खुसी री गल समझा, क्यूंकि तुस्से ये जाणाये कि तुस्सा रे विस्वासा रे परखे जाणे ले धीरज ज्यादा बड़ा आ। 4हर गल्ला मन्झ धीरज रखणा सिखा कि, तुस्से आत्मिक रूपा ले सिद्ध हुई जाओ होर तुस्सा मन्झ केसी गल्ला री कमी नी रहे।

5पर अगर तुस्सा मन्झा ले केसी जो बुद्धि री कमी हो, ता परमेसरा ले मांगी ले, जो बगैर सुआल कितिरे सभी जो उदारता ले देहां; होर परमेसरा तुस्सा जो देणा। 6पर पुरे विस्वासा ले मांगे, होर कुछ बैह्म नी करहे; क्यूंकि बैह्म करणे वाल़ा आदमी समुद्रा री लैहरा साहीं टिकदा नी आं, जो बागरा किन्हें बैहन्दी होर उछ्ल्दी रैंहयां। 7एह्ड़ा बैह्मी आदमी ये नी समझे कि, तेस जो प्रभु ले कुछ मिलणा, 8क्यूंकि से आदमी दोगला आ, होर आपणी कोसी गल्ला मन्झ टिकदा नी आ।

गरीब होर अमीर

9जो विस्वासी भाई बैहण गरीब ऐं, तिन्हा जो खुस हूंणां चहिए कि परमेसर तिन्हारी इज्जत करहा। 10होर जो अमीर ऐं, तिन्हा जो भी खुस हूंणां चहिए कि तिन्हें प्रभु यीसू पर विस्वास करणे री वजहा आपणे आपा जो नम्र दीन बणाई दितेया; क्यूंकि तिन्हा होर तिन्हारी अमीरी घाह रे फूला साहीं सुक्की जाणी। 11सूरज निकल्दे ई धूपा लग्हा होर घाहा जो सुकाई देहां, होर तेसरे फूल झड़ी जाहें, होर तेसरी सान चली जाहीं, तिहां ई अमीर भाई भी जो आपणे कामा जो करदे-करदे माटे मन्झ मिली जाणा।

परमेसर परखणी नी करदा

12धन्य आ से आदमी, जो परखणी मन्झ मजबूत रैंहयां; क्यूंकि तेस तेस्सा परखणी जो पार करी किन्हें अनंत जिन्दगी रा से मुकट पाणा, जेसरा देणे रा वादा परमेसरे तिन्हा कठे कितिरा, जेह्ड़े परमेसरा किन्हें प्यार करहे। 13जेबे केसी री परखणी हो, ता से ये नी बोले कि, “परमेसर मेरी परखणी करदा लगिरा,” क्यूंकि परमेसर कोई बुरी गल्ला करणे री परखणी मन्झ नी पउन्दा, होर ना से आपु केसी री परखणी करहा।

14पर हरेक आदमी आपणी बुरी इच्छा मन्झ पई किन्हें होर फसी किन्हें परखणी मन्झ पहूंआं। 15फेरी जेबे ये बुरी इच्छा बढ़ी जाहीं ता तेता ले पाप हूँआ, होर जेबे से पाप बौह्त बढ़ी जाहाँ, ता आदमी हमेसा रे कठे मरी जाहाँ। 16हे भाईयो होर बैहणो, धोखा मन्झ मत रैहन्दे।

17क्यूंकि हर एक खरा वरदान होर हर एक खरा दान बापू परमेसरा री तरफा ले आ, जिन्हें हर प्रकारा री आसमाना री ज्योतिया बणाई। होर परमेसर इन्हा ज्योतिया रे बदल्दी छाऊँआ साहीं कधी नी बदल्दा आ। 18परमेसरे आपणी ई इच्छा ले सच्चाई रे बचना रे ज्रीए आस्से आपणे बच्चे बणाईरे, ताकि आस्से तेसरी रचीरी सारी चीजा मन्झा ले खास हो, जिहां जे नाजा रे पैहले फला खास हूँआ ऐं।

सुणना होर करणा

19हे भाईयो होर बैहणो, ये गल तुस्से जाणी लेया; तुस्से सुणने रे कठे हमेसा तैयार होर बोलणे मन्झ सब्र रखणे वाले होर गुस्सा करणे मन्झ जल्दबाजी नी करणे वाले हो। 20क्यूंकि माह्णुं जेबे गुस्सा करहा ता से परमेसरा रे धर्मा रे कामा जो पूरा नी करी सकदा, जेहड़ा परमेसर तेस ले कुराणा चांहा। 21इधी कठे सारी गंदगी होर सब बुराई जो दूर करी किन्हें, परमेसरा रे तेस बचना जो बडी नम्रता किन्हें मनी लो, जो तुस्सा रे दिला मन्झ बोया गया होर जो तुस्सा रा उद्धार करी सक्हा।

22पर परमेसरा रे बचना जो मनणे वाले बणा, होर ना की सिर्फ सुणने वाले, क्यूंकि सिर्फ सुणने वाल़ा आपणे आपा जो धोखा देहां ऐं। 23क्यूंकि जो कोई परमेसरा रे बचन सुणा पर तेस जो मनदा नी आ, ता से तेस माह्णुं साहीं आ जो आपणा मुंह सीसे मन्झ देख्हा। 24होर आपणे मुंह सीसे मन्झ देखी किन्हें चली जाहाँ, होर जल्दी ई भूली जाहाँ कि से केह्ड़ा सुझ्हा करेया था। 25जो माह्णुं सिद्ध व्यवस्था पर ध्यान देंदा रैहया, जो हर माह्णुं जो पापा ले अजाद करहा ई; से माह्णुं व्यवस्था री गल्ला जो सुणी किन्हें भुल्दा नी आ पर आपणे व्यवहारा मन्झ लागू करदा रैंहयां, इधी कठे परमेसरा तेस जो तेसरे सारे कामा मन्झ आसीस देणी।

परमेसरा रे साम्हणें सच्ची होर सुद्ध भक्ति

26अगर कोई आपणे आपा जो भक्त समझे, होर आपणी जीभा ले बोलणे वाली बुरी गल्ला पर लगाम नी रखदा, से आपणे आपा जो धोखा देहां, ता तेसरी भक्ति बेकार ई। 27आस्सा रे बापू परमेसरा रे साम्हणें सच्ची होर सुद्ध भक्ति येई कि, अनाथा होर विधवा रे दुःखा मन्झ तिन्हारा ख्याल रखे, होर संसारा मन्झ हूंणे वाले बुरे कामा ले आपणे आपा जो दूर रखा।

Currently Selected:

याकूब 1: MJLNT

Highlight

Copy

Compare