गलातियो 1

नमस्कार

1-2हांऊँ पौलुस, एस्सा चिठ्ठी जो लिख्या करहा। होर हांऊँ चुणिरा चेला आ। मुंजो कुछ लोके या केसी माह्णुंऐ चुणिरा चेला हूंणे रे कठे नियुक्त नी कितेया। पर यीसू मसीह रे ज्रीए होर बापू परमेसरा रे ज्रीए हांऊँ चुणिरा चेला बणेया। परमेसरे यीसू जो मरिरे मन्झ ले जिउंदा कितेया। हांऊँ एस्सा चिठ्ठी जो गलातिया ईलाके री कलीसिया रे विस्वासी भाई बैहणा जो लिख्या करहा। होर जो विस्वासी भाई बैहण ऐबे मेरे साउगी एथी ऐं, स्यों तुस्सा जो नमस्कार बोल्हा ऐं।

3हांऊँ ये प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे। 4आस्सा रे परमेसर होर बापू री इच्छा रे मताबक, मसीह यीसूए आस्सा रे पापा रे कठे आपणे आपा जो बलिदान करी दितेया, ताकि से आस्सा जो संसारा मन्झ ऐबे बुरे काम करणे वाली सामर्था ले बचाई सके। 5हांऊँ प्रार्थना करहा कि लोक परमेसरा री महिमा जुग-जुग करदे रहे। आमीन।

कोई दूजी खुसी री खबर नी

6मुंजो हरानी एस गल्ला री कि जिन्हें परमेसरे तुस्से आपणे लोक हूंणे रे कठे मसीह रे अनुग्रह रे ज्रीए सादे, तुस्से इतनी जल्दी तेस परमेसरा ले दूर हुई गये, होर “कोई दूजे उपदेसा” जो मनदे लगे जेस जो कुछ लोक खुसी री खबर बोल्हे। 7पर कोई दूजा उपदेस ता हाया नी, पर सिर्फ मसीह री सच्ची खुसी री खबर ई। पर कुछ लोक एह्ड़े ऐं, जो मसीह री खुसी री खबरा रे मतलबा जो बदलना चाहें, होर तिन्हें तुस्सा जो धोखा दितिरा।

8पर अगर आस्से या स्वर्गा ले कोई भी स्वर्गदूत आई किन्हें तुस्सा जो सच्ची मसीह री खुसी री खबरा जो आस्से तुस्से सुणाई री, तेता रे बदले मन्झ तुस्सा जो कोई दूजा उपदेस सुणाए, ता परमेसरा तेस जो सजा दे। 9जेह्ड़ा आस्से पैहले बोली चुकिरे, तेह्ड़ा ई ऐबे हांऊँ दबारा बोल्हा कि तुस्से तेस सच्ची मसीह री खुसी री खबर जो आस्से तुस्सा जो सुणाई री थी, तेता रे अलावा अगर कोई दूजा उपदेस सुणगे, ता परमेसर तुस्सा जो सजा दे। 10ऐबे हांऊँ सिर्फ परमेसरा री राजी चाहां, होर कोई दूजे लोका री नी, होर हांऊँ केसी माह्णुंआं जो खुस करणे री कोसिस नी करदा लगिरा। अगर हांऊँ एह्ड़ा ही करदा, ता हांऊँ मसीह रा सेऊआदार नी हुन्दा।

पौलुस किहाँ चुणिरा चेला बणेया

11हे भाईयो होर बैहणो, हांऊँ चाहां कि तुस्से ये जाणी लो कि जो खुसी री खबर मैं तुस्सा जो सुणाया था से माह्णुंआं रा बणाईरा नी आ। 12क्यूंकि मैं ये गल्ला आपणे बापदादेया ले नी सीखी, होर नहीं मुंजो केसी धर्मा रे स्खाणे वाले स्खाईरी, पर यीसू मसीहे युयां गल्ला मुंजो समझाई।

13तुस्से जाणहां ऐं कि हांऊँ यहूदी धर्मा री बिधिया रे मताबक जिन्दगी जीया था, हांऊँ परमेसरा री कलीसिया रे लोका जो बौह्त स्ताहां था, होर मसीह पर विस्वास करणे वाल़ेया जो नास करणे री कोसिस करहा था। 14आस्सा रे बापदादेया रे उपदेसा जो सिखणे होर मनणे मन्झ हांऊँ आपणे उम्रा रे कई यहूदी लोका ले ज्यादा तेज था।

15-16पर परमेसरे आपणे मह्ठे जो मेरे पर जाहिर करणे रा फैसला लितेया, ताकि हांऊँ यीसू मसीह रे बारे मन्झ अन्यजाति लोका रे बीचा खुसी री खबरा रा प्रचार करूं। परमेसरे ही मेरे जमणे रे पैहले हांऊँ चुणी लितेया, होर आपणे अनुग्रह री वजहा ले तिन्हें हांऊँ आपणी तेसरी सेऊआ करणे रे कठे सादेया। यीसू मसीहे जेबे आपणे आपा जो मेरे पर जाहिर कितेया, तेता ले बाद हांऊँ केसी माह्णुं वाले सलाह लेणे रे कठे नी गया। 17होर ना हांऊँ यरुस्लेम सैहरा मन्झ तिन्हा लोका वाले गया जो मेरे चुणिरे चेले बणने रे पैहले ले ही चुणिरे चेले थे, पर हांऊँ झटपट अरब देसा जो चली गया, होर फेरी तेथी ले दबारा दमिस्क सैहरा जो वापस आया।

18फेरी तीन साला ले बाद हांऊँ पतरस#1:18 कैफा किन्हें मिलणे रे कठे यरुस्लेम सैहरा जो चली गया, होर तेस वाले हांऊँ पन्द्रा ध्याड़े तक रैंहयां। 19पर हांऊँ तेथी चुणिरे चेलेया मन्झा ले सिर्फ प्रभु रे भाई याकूबा किन्हें ही मिलेया। 20परमेसर मेरा गुआह आ कि, जो गल्ला हांऊँ तुस्सा जो लिख्या करहा, तेता मन्झ कोई भी झूठ नी आ।

21यरुस्लेम सैहरा मन्झ चुणिरे चेलेया किन्हें मिलणे रे बाद हांऊँ सीरिया ईलाके होर किलकिया ईलाके मन्झ गया। 22पर यहूदिया ईलाके री कलीसिया रे मसीही विस्वासी लोके हांऊँ कधी नी देखिरा था। 23पर स्यों लोक मेरे बारे मन्झ ये सुणदे रहे थे कि, “जो पैहले आस्सा जो स्ताहां था, ऐबे से ही यीसू मसीह री खुसी री खबरा रा प्रचार करी करहा, जेस जो से पैहले नास करणे री कोसिस करहा था।” 24इधी कठे कि जो परमेसरे मेरे कठे कितेया, तेता रे कठे स्यों परमेसरा री बड़ाई करदे रहे।

Currently Selected:

गलातियो 1: MJLNT

Highlight

Copy

Compare