मरकुस 3

सुक्के हत्था औल़े माहणुये जो चंगा करना

(मत्ती 12:9-14; लूका 6:6-11)

1फेरी भीं यीशु ताहली जे यहूदी सभा घरा च गये, तां तिन्हें इक सुक्कीरे हत्था औल़े माहणुये जो देख्या। 2तिन्हां चते किछ फरीसी यीशुये पर दोष लगाणे रे खातर कोई इक वजह टोल़ीरां थे, इस खातर सै तिस्सो ध्यान्ना ने देखणे लगे भई सै विस्राम रे दिन तिस्सो ठीक करगा कि नीं। 3यीशुये सुक्कीरे हत्था औल़े माहणुये जो बोल्या, “सब्बीं लोकां रे सामणे खड़ा हुई जा।” 4फेरी यीशुये फरीसियां ते पुच्छया, “क्या परमेशर अहांजो विस्राम रे दिन लोकां रा भला करने रा हुक्म देआं या बुरा करने रा? क्या सै अहांजो किसी री जिन्दगी बचाणे रा हुक्म देआं या तिसजो मारने रा?” पर सारे चुप रै। 5यीशुये तिन्हांरे अड़ियल स्वाभावा ते उदास हुईने बड़े गुस्से ने तिन्हांरी तरफ देख्या, कने तिस माहणुये जो गलाया, “अपणा हात्थ मेरी तरफ कर।” तियां जे तिने हात्थ अग्गे कित्या, सै ठीक हुईग्या। 6फेरी फरीसी इकदम यहूदी सभा घरा ते बाहर जाईने राजा हेरोद रे समर्थकां सौगी मिलीने सलाह मशवरा करने लगे भई यीशुये जो कियां मारीये।

भीड़ा रा यीशुये रे पिछे हूणा

7इसते बाद यीशु अपणयां चेलयां सौगी गलील दरयावा री तरफ चलीप्या कने गलील जिले ते इक बड्डी भीड़ तिसरे पिछे चलीपी। 8ये सुणीने भई यीशु केढ़े महान काम्म कराँ, यहूदिया कने इदूमिया जिले ते, यरूशलेम नगरा ते, यरदन नदिया रे पारा ते, कने सूर-सैदा नगराँ रे अक्खा-बक्खा रे इलाकयां ते बौहत बड्डी भीड़ तिसले आई। 9-10काँह्भई तिने मतयां लोकां जो ठीक कित्तिरा था; इस खातर जितने लोक बमारिया ने जकड़ोईरे थे, सै तिसरे नजदीक आईने तिस्सो छूणे री बौहत कोशिश करीराँ थे, ताकि सै लोक ठीक हुई सक्को। इस खातर तिने अपणयां चेलयां ने बोल्या भई, “मेरे खातर इक छोट्टी किश्ती त्यार रक्खा, ताकि लोक मेरने छोणे जो औणे रिया वजह ने मिन्जो घेरी नीं सक्को।” 11जाहलुँ बी बुरीआत्मायें यीशुये जो देक्खां इयां, सै तिसरे सामणे तिसजो आदर देणे खातर पई जांईयां, कने चीखां मारीने बोलां थिआं भई “यीशु परमेशरा रा पुत्र आ।” 12पर यीशुये बार-बार तिन्हांजो सावधान कित्या भई सै मेरे बारे च लोकां जो किछ नीं दस्सो।

बारा प्रेरितां जो नियुक्त करना

(मत्ती 10:1-4; लूका 6:12-16)

13इसते बाद यीशु नजदीक रे इक्की पहाड़ा पर गया कने तिन्हां माह्णुआं जो सद्दया तिन्हांजो जे तिने अपणे चेले बणने खातर चुणया था कने सै लोकां बिच्चा ते तिसले आये। 14फेरी यीशुये खुशखबरी सुनाणे रे खातर भेज्जे जाणे औल़े बारा लोकां जो चुणया, भई सै तिसने सौगी रैईने प्रचार करो, कने तिन्हांजो तिने प्रेरित बोल्या, 15ये बी भई तिन्हौं लोकां ते बुरीआत्मा जो नकाल़णे रा अधिकार दित्या। 16सद्दीरे इन्हां लोकां रे नौं: शमौन तिसरा नौं जे यीशुये पतरस रखया, 17जब्दिये रा पुत्र याकूब, कने याकूब रा छोट्टा भाई यूहन्ना, तिसरा नौं यीशुये बुअनरगिस रख्या, इसरा मतलब आ बद्दल़ा रे गर्जणे साई माहणु, 18कने अन्द्रियास, फिलिप्पुस, बरतुल्मै, मत्ती, थोमा, हलफईया रा पुत्र याकूब, तद्दै, शमौन सै जे यहूदी दला रा इक सदस्य था सै दल जे रोमी सरकारा रे बिरोधा च लोकां जो बिद्रोह करने रे खातर उत्साहित कराँ था। 19कने यहूदा इस्करियोति तिने जे यीशुये जो धोखा देईने पकड़वाया था।

यीशु कने बालजबूल

(मत्ती 12:22-32; लूका 17:14-23; 12:10)

20कने यीशु घरा जो आया कने येढ़ि भीड़ कट्ठी हुईगी भई सै रोटी बी नीं खाई सक्के। 21ताहली जे यीशुये रे घरा औल़यां ये सुणया, तां सै तिस्सो पकड़ने रे खातर निकल़े, काँह्भई तिन्हांजो लगया भई यीशु पागल हुईगरा। 22शास्त्री बी सै जे यरूशलेम नगरा ते आईरे थे, येढ़ा बोलणे लगे, “येत बुरीआत्मां रे मुखिये शैतान्ना रे सहारे बुरीआत्मां जो बाहर नकाल़ां।”

23इस खातर यीशु तिन्हांजो नेड़े सद्दीने तिन्हांने उदाहरणा च गलाणे लगया, “शैतान अपणिया बुरिया आत्मा जो नीं कड्डी सक्कां, 24जे इक्की देशा च रैहणे औल़े लोक इक्की दूये ने झगड़दे रैहन्गे, तां सै देश टुकड़यां च बटी जाणा। 25कने जे इक्की घरा च रैहणे औल़े लोक अप्पूँ बाटियें लड़दे रौ, तां सै परिवार टुट्टीने बिखरी जां। 26कने जे शैतान अपणा इ दुश्मण हुईने अप्पूँ चियें लड़ी जो, तां तिसरा राज कियां बणीरा रई सक्कां? तिसरा त अन्त हुई जाणा। 27पर कोई शैतान्ना साई किसी ताकतवर माहणुये रे घरा च घुसीने तिसरा समान नीं लुट्टी सकदा, तदुआं तकौ जो जे सै पैहले तिस ताकतवर माहणुये जो बन्ही नीं लओ, कने तांई सै तिसरे घरा जो लुट्टी सक्कां। 28हऊँ तुहांजो सच-सच बोलां, भई माहणुआं रिया औलादा रे सारे पाप कने निंध्या तिन्हांजो जे सै कराँ ये, परमेशरा माफ करी देणे; जे सै पश्चाताप करगे, 29पर सै जे कोई पवित्र आत्मा रे कम्मां री निंध्या करीने तिसरा वरोध करो, तिस्सो कदीं बी माफ नीं कित्या जाणा : पर सै सदा रे पापा रा अपराधी बणां।” 30यीशुये तिन्हांजो ये इस खातर बोल्या काँह्भई सै बोलां थे भई, “तिसच बुरीआत्मा।”

यीशुये री मौ कने भाई

(मत्ती 12:46-50; लूका 8:19-21)

31फेरी यीशुये री माता कने तिसरे छोट्टे भाई आये, कने बाहर खड़ीने यीशुये जो सदणे खातर किसी जो भेज्या। 32लोकां री भीड़ तिसरे अक्खा-बक्खा बैठीरी थी, तिन्हां चते इक्की माहणुये तिस्सो गलाया, “देख, तेरी माता, कने तेरे भाई-भैण बाहर तेरने मिलणा चाँये।” 33यीशुये तिन्हांजो जवाब दित्या, “मेरी माता कने मेरे भाईये साई कुण आ?” 34कने लोकां पर सै जे तिसरे अक्खा-बक्खा बैठिरे थे, देखीने यीशुये गलाया, “देक्खा, मेरी माता कने मेरे भाई येवे। 35काँह्भई सै जे परमेशरा रिया इच्छा पर चलां यें, सैई मेरी माता, मेरी बैहणीं, कने मेरे भाई ये।”

Currently Selected:

मरकुस 3: KFSNT

Highlight

Copy