यूहन्ना 20

खाली कब्र

(मत्ती 28:1-8; मरकुस 16:1-8; लूका 24:1-12)

1मगदल गाँवां री मरियम त्वारा रे दिन सबेरके जुन्ना रे अन्‍धेरे ची किछ होर जनानां ने कब्रा पर आई, कने तिन्हें पत्थरा जो कब्रा रे दरवाजे परा ते हटिरा देख्या। 2फेरी सै जनानां दौड़ीने शमौन पतरस कने दुज्जे चेले लौ गई, सै जे यीशुये रा प्यारा था, तिन्हांले आईने गलाया, सै प्रभुये रिया लाशा जो कब्रा ते निकाल़ीने लईगे; कने अहें नीं जाणदियां, भई तिस्सो किति रखी दित्या। 3फेरी पतरस कने दुज्जा चेला कब्रा खौ दौड़े। 4कने सै दोन्नों सौगी-सौगी दौड़या राँ थे, पर दुज्जा चेला पतरसा ते अग्गे दौड़ीने पैहले कब्रा पर पुज्या। 5कने झुकीने कफणा रे कपड़े पैईरे देक्खे : तां बी सै अन्दरौ नीं गया। 6तां शमौन पतरस बी सै जे तिसरे पिच्छे आयाराँ था, पुज्जीग्या, कने कब्रा रे अन्दर चलिग्या। तिने देख्या भई तित्थी कफ़णा रे कपड़े पईरे। 7कने सै कपड़ा तिसने जे तिसरा मुँह ढक्कीरा था, कफ़णा रे कपड़े ते लग, दुज्जिया जगह तैह लगीरा रखोईरा था। 8फेरी दुज्जा चेला सै जे कब्रा पर पैहले पुज्जीरा था, सै बी कब्रा च गया, कने तिने देखीने विश्वास कित्या भई यीशु मूईरयां चते जिऊंदा हुईगरा। 9सै अजें तक बी पवित्रशास्त्रा रे तिस बचना जो नीं समझी पाए थे, भई, “तिसरा मूईरयां चते जिऊंदा हूणा जरूरी था।” 10फेरी सै चेले अपणे-अपणे घरा जो चलीगे।

मरियम मगदलिनी जो दर्शण

(मत्ती 28:9,10; मरकुस 16:9-11)

11मरियम रोंदी-रड़ांदी कब्रा ते बाहर खढ़ीरी थी, रोंदी-रोंदी सै कब्रा च अन्दरा खौ जुल्की। 12तित्थी जे यीशुये री लाश रखीरी थी, तिसा जगह तिसे चिट्टे कपड़े पैहनीरे, दो स्वर्गदूत देखे, इक तिसरे सरहाणे खौ कने दुज्जा तिसरे पैंदा खौ, बैठिरा था। 13तिन्हें तिसाजो पुच्छया, भैहण तू काँह रोया राईं? तिसे जबाब दित्या, सै मेरे प्रभुये रिया लाशा जो चक्की ने लई गये, कने पता मनी या भई तिन्हें तिस्सो किति रखीत्या? 14येढ़ा बोलीने सै घुम्मी कने तिसे यीशुये जो खढ़िरा देख्या, पर सै पछयाणी नीं सक्की भई सै यीशु इ हाया। 15यीशुये तिसाजो गलाया, “तू काँह रोया राईं? तू किस्सो टोल्या राईं?” ये सोची ने भई सै माली आ, तिसे यीशुये ने गलाया, जे तू यीशुये रिया लाशा जो चक्कीने लेई गरा तां मिन्जो दस्सी दे, तैं तिसजो किति रखीरा, मांह तिसा लाशी जो लई जाणा। 16यीशुये तिसाजो गलाया, मरियम, सै पिच्छे खौ घुम्मी कने तिसे इब्रानी भाषा च गलाया, “गुरू।” 17यीशुये तिसाजो गलाया, मेरयां पैराँ ने लिपटी ने मिन्जो मत रोक, काँह्भई हऊँ अजें तक पिता ले नीं गईरा, तू मेरे भाईयां लौ जा, कने तिन्हांजो दस हऊँ अपणे परम पिता कने तुहांरे परम पिता, अपणे परमेशर कने तुहांरे परमेशरा ले जाया रां। 18मगदल गाँवां री मरियमे जाईने चेलयां जो दस्या, “मैं प्रभुये जो देख्या” कने ये गल्लां यीशुये इ तिसाजो बोलियां थी।

चेलयां जो दिखणा

(मत्ती 28:16-20; मरकुस 16:14-18; लूका 24:36-49)

19तिस त्वारा रे संजके बगता, सै जे हफ्ते रा पैहला दिन था, चेले यहूदी अगुवेयां रे डरा रे मारे दरवाजा बन्द करीने बैठिरे थे। तां यीशु तित्थी आईने तिन्हांरे बिच खड़ा हुईग्या, कने तिन्हांजो गलाया, “तुहांजो शान्ति मिलो।” 20ये बोल्लीने यीशुये अपणे हाथ कने बखिया रा जख्म तिन्हांजो दस्या। चेलयां तंजे प्रभुये जो देख्या, तां सै बौहत खुश हुईगे। 21यीशुये तिन्हांजो फेरी भीं गलाया तुहांजो शान्ति मिलो, तियां जे पिता परमेशरे मिन्जो संसारा च भेज्या तियां इ हऊँ बी तुहांजो संसारा च भेज्या रां। 22येढ़ा बोलीने तिने तिन्हां पर फूक मारी, कने गलाया, “पवित्र आत्मा जो ग्रहण करा। 23तिस माहणुये रे जे पाप तुहां माफ करी दणे, तिन्हांजो माफी मिली जाणी कने तिन्हांरे जे पाप तुहां माफ नीं करने, तिन्हां बगैर माफिया तेई रैणा।”

थोमा जो दर्शण

24थोमा सै जे बारां चेलयां चते था, कने तिस्सो जे दिदुमुस (जुड़वा) बोलां थे। तंजे यीशु आया था तां तिन्हांने सौगी नीं था। 25दुज्यां चेलयां तिस्सो बोल्या भई, “अहें प्रभुये जो देख्या।” पर तिने जबाब दित्या, “तदुआं तका जे हऊँ तिसरयां हत्थां च मेखां रे सुराख नीं देक्खी लुँ, कने तिन्हां च अपणी गुट्ठी पाईने नीं देक्खी लुँ, कने बखिया पर भाले रे सुराखा जो हात्थ नीं पाई लुँ तदुआं तक मिन्जो विश्वास नीं हूणा भई यीशु मूईरयां चते जिऊंदा हुईगरा।”

26अट्ठां दिनां बाद यीशुये रे चेले फेरी भीं घरा च कट्ठे हुये, कने थोमा तिन्हांने सौगी था। (दरवाजे पर ताला लगीरा था।) यीशु आया कने तिन्हां च खढ़ी गया, कने तिन्हांजो गलाया, “तुहांजो शान्ति मिलो।” 27फेरी तिने थोमा जो गलाया, आओ कने अपणी गुट्ठी मेरे हात्था च पाईने देख, कने अपणा हात्थ मेरे बखिया च पाईने देख। शक करना छड्डिने मांह पर विश्वास कर भई हऊँ जिऊंदा हुईगरा। 28थोमे जबाब दित्या, “मेरे प्रभु, हे मेरे परमेशरा!” 29यीशुये तिस्सो गलाया, “तैं मिन्जो देखीने मेरे पर विश्वास कित्या, पर सै लोक आशीषित ये तिन्हे जे मांह पर बिणा देखे विश्वास कित्या।”

इसा कताबा रा मकसद

30यीशुये अपणयां चेलयां जो होर बी बौहत सारे अदभुत चमत्कार दस्से, सै जे इसा कताबा च नीं लिखिरे। 31पर ये सै जे लिखे गईरे, इस खातर भई तुहें विश्वास करो भई यीशु इ मसीह आ, सैई परमेशरा रा पुत्र आ। कने तिस पर विश्वास करीने अनन्त जीवन पाओ।

Currently Selected:

यूहन्ना 20: KFSNT

Highlight

Copy

Compare