प्रेरितां 16

पौलुसा रा तिमुथियुस जो सौगी लेणा

1फेरी सै दिरबे कने लुस्त्रा नगरा च बी गया, तित्थी तिमुथियुस नौआं रा इक चेला था। सै जे यहूदी विश्वासी जनाना रा पुत्र था, पर तिसरा पिता यूनानी था। 2सै लुस्त्रा कने इकुनियुम नगरा रे विश्वासियां च ईज्ज़तदार माहणु था। 3पौलुस री इच्छा थी भई सै तिसने सौगी चलो; कने सै जे यहूदी लोक तिन्हां जगहां च रौआं थे तिन्हां रिया वजह ते तिने तिसरा खतना कित्या, काँह्भई सै सब जाणाँ थे, भई तिसरा पिता यूनानी था।

4पौलुस कने तिसरे साथी नगर-नगर जान्दे हुये सै तिन्हां विधियां जो सै जे यरूशलेम नगरा रे प्रेरितें कनें प्राचीनें दस्सी रियां थिआं, मनणे खातर चेलयां जो दस्दे जां थे। 5इयां कलीसिया रे लोक विश्वासा च पक्की हुन्दी गई कने तादाता च हर दिन बधदी गई।

त्रोआस च: पौलुस रा दर्शण

6सै फ्रूगिया कने गलातिया प्रदेशा चते हुईने गये, काँह्भई पवित्र आत्मे तिन्हांजो आसिया प्रदेशा च वचन सुनाणे ते मना कित्या। 7तिन्हें मूसिया प्रदेशा रिया सीमा रे नेड़े पुज्जी ने, बितूनिया इलाके च जाणा चाया; पर पवित्र आत्मे तिन्हांजो जाणे नीं दित्या। 8इस खातर सै मूसिया प्रदेशा चियें हुईने त्रोआस बन्दरगाह च आये।

9तित्थी पौलुसे राति जो इक दर्शण देख्या भई इक मकिदुनी प्रदेशा रा इक माहणु खढ़िरा कने तिसने विनती करीने गलाया राँ, “समुद्रा रे पार जाईने मकिदुनिया प्रदेशा च औआ, कने अहांरी मदद करा।” 10तिसरे येढ़ा दर्शण देखदे इ अहें झट मकिदुनिया प्रदेशा च जाणा चाया, येढ़ा समझीने भई परमेशरे अहौं तिन्हांजो खुशखबरी सुनाणे खातर सद्दीरा।

फिलिप्पी च: लुदिया रा मन बदलना

11इस खातर त्रोआस नगरा रिया बन्दरगाह ते जहाज खोल्ली ने अहें सिधे सुमात्रा रे टापुये कने दुज्जे दिन नियापुलिस बन्दरगाह च आये। 12ऊत्थीते अहें फिलिप्पी नगरा च पुज्जे, सै जे मकिदुनिया प्रदेशा रा खास नगर आ तित्थी जे कई रोमी नागरिक रैं, कने अहें तिस नगरा च किछ दिन तका रहे। 13विस्रामा रे दिन अहें नगरा रे फाटका ते बाहर नदिया रे कनारे येढ़ा समझीने गये भई तित्थी यहूदियां री प्राथना करने री जगह हुंगी, कने बैठीने सै जनानां जे तित्थी कट्ठियां हुई रियां थिआं, तिन्हांने गल्लां करने लगे।

14लुदिया नौआं री थुआतीरा नगरा री बैंगणी कपड़े बेचणे औल़ी परमेशरा री इक भगतणी सुणया राँ थी। परमेशरे तिसारा मन खोल्या भई सै पौलुसा रिया गल्लां पर चित लगाओ। 15तां जे तिसे अपणे घराने समेत बपतिस्मा लया, तां तिसे अहांने विनती किति, जे तुहें मिन्जो प्रभुये री विश्वासी समझां यें तां, चलीने मेरे घरा च रौआ, “कने सै अहांजो मनाई ने लई गई।”

पौलुस कने सीलास जेल्ला च

16ताहली जे अहें प्राथना करने रिया जगह च जाया राँ थे, तां अहांजो इक दासी मिली तिसच जे भविष्य दसणे औल़ी बुरीआत्मा थी; कने भविष्य दसणे ते अपणे मालकां खातर बौहत कमाई करी लेयां थी। 17सै पौलुसा रे कने अहांरे पिच्छे आईने रड़ाणे लगी, “ये माहणु परमप्रधान परमेशरा रे दास ये, सै जे अहांजो छुटकारे री कथा सुणवांये।” 18सै बौहत दिनां तका येढ़ा इ करदी रई; पर पौलुस दुखी हुआ, कने मुड़ीने तिसा बुरीआत्मा जो गलाया, “हऊँ यीशु मसीह रे नौआं ते हुक्म देआं भई इसा चते निकल़ी जा।” कने सै तिस इ बगता निकल़ीगी।

19तां जे तिसारे मालकें देख्या भई अहां रिया कमाईया री आशा चलीगी, तां पौलुस कने सीलासा जो पकड़ीने चौका च प्रधाना ला खिंजी ने लईगे; 20कने तिन्हांजो जज्जा ला लईगे कने गलाया, “ये लोक सै जे यहूदी ये, अहांरे नगरा च बड़ा हल्ला मचाई रायें; 21कने येढ़ियां रितियां दस्या रायें, तिन्हांजो ग्रहण करना कने मनणा अहां रोम नगरा च रैहणे औल़यां रे खातर ठीक निआं।”

पौलुस कने सीलास रा जेल्ला च पाया जाणा

22तां लोकां री भीड़ पौलुस कने सीलासा रे बरोधा च कट्ठे हुईने आये, कने जज्जे तिन्हांरे कपड़े उतारी ने, तिन्हांजो बैंत मारने रा हुक्म दित्या। 23बौहत बैंत मरवाई ने तिन्हें तिन्हांजो जेल खाणे च पाईत्या कने दरोगे जो हुक्म दित्या भई तिन्हांजो चौकसिया ने रखो। 24तिन्हें येढ़ा हुक्म लईने तिन्हांजो अन्दरलिया कोठड़िया च रखया कने तिन्हांरे पैर लकड़िया री बेड़ियां ने जकड़ीते।

पौलुस कने सीलासा रा जेल्ला ते छुटणा

25अधिया राति रे बगत पौलुस कने सीलास प्राथना करदे परमेशरा रे भजन गाये राँ थे कने कैदी तिन्हांरी सुणया राँ थे। 26इतणे च अचानक बड्डा हिलण हुआ, येत्थी तका भई जेलखान्ने री निऊँआ तका हिली गी, कने ताहलूं इ सब दरवाजे खुलीगे; कने सब्बीं रे बन्धन खुलीगे।

27दरोगा जागीग्या, कने जेलखान्ने रे दरवाजे खुले देखीने समझया भई कैदी नट्ठीगे, इस खातर तिने तलवार कड्डीने अप्पूँजो खत्म करना चाहया। 28पर पौलुसे उचिया अवाज़ा च गलाया, “अप्पूँजो मत मारदा, काँह्भई अहें सब येत्थी ये।”

29तां सै लम्फ बाल़ीने अन्दरा गया, कने पौलुस कम्बदा-कम्बदा सीलासा रे अग्गे पैराँ पई गया;

30कने तिन्हांजो बाहर ल्याईने गलाया, “हे सज्जनो, छुटकारा पाणे खातर हऊँ क्या करूँ?” 31तिन्हें गलाया, “प्रभु यीशु मसीह पर विश्वास कर तां तू कने तेरे घराने जो छुटकारा मिलणा।”

32कने तिन्हें तिस्सो कने तिसरे सारे घरा रे लोकां जो प्रभुये रा वचन सुणाया। 33राति जो तिन्हें तिस इ वगत तिन्हांजो नेईने तिन्हांरे जख्म धोये, कने तिने अपणे लोकां समेत ताहलूं इ बपतिस्मा लई लया। 34तां तिन्हें तिन्हांजो अपणे घरा च नेईने तिन्हांजो रोटी खाणे दित्ति, कने अपणे सारे घराने समेत परमेशरा पर विश्वास करीने खुशी मनाई।

35ताहली जे अगला दिन हुआ तां हाक्में सपाईयां जो येढ़ा बोलीने भेज्या भई तिन्हां माहणुआं जो छड्डी दे। 36दरोगे ये गल्लां पौलुसा ने बोलियां, “हाक्में तिज्जो छड्डी देणे रा हुक्म दित्तिरा। इस खातर शान्तिया ने निकल़ीने चली जा।”

37पर पौलुसे तिन्हांने गलाया, “तिन्हें अहां रोमी माहणुआं जो बिणा दोषा ते लोकां रे सामणे मारया कने जेल्ला बी पाया। हुण अहां चुप-चाप काँह निकल़ी जाणा? येढ़ा नीं करना; पर सै अप्पूँ आईने अहांजो बाहर निकल़ो।” 38सपाईये ये गल्लां हाकमा ने कित्तियां, कने सै येढ़ा सुणीने भई ये रोमा रे नागरिक ये, डरीगे, 39कने आईने तिन्हांते माफी मंगी, कने बाहर नेईने विनती किति भई नगरा ते चली जाओ।

40सै जेलखान्ने ते निकल़ीने लुदिया रे घरौ गै, कने विश्वासियां ने मिलीने तिन्हांरा हौंसला बधाया, फेरी ऊत्थीते चलीगे।

Currently Selected:

प्रेरितां 16: KFSNT

Highlight

Copy

Compare