प्रेरितां 14

इकुनियुस च पौलुस कने बरनबास

1इकुनियुम नगरा च येढ़ा हुआ भई सै यहूदियां रे सभा घराँ च सौगी-सौगी गये, कने इयां गल्लां कित्ती यां भई यहूदियां कने यूनानियां चते मतयां विश्वास कित्या। 2पर विश्वास नीं करने औल़यां यहूदियें अन्यजातियां रे मन विश्वासी भाईयां रे बरोधा च भड़काये कने वरोध पैदा करित्या।

3कने पौलुस कने बरनबास बौहत दिनां तका तित्थी रये, कने प्रभुये रे भरोसे पर हिम्मता ने गल्लां कराँ थे; कने प्रभुये तिन्हांरे हत्थां ते बड़े-बड़े चमत्कारी नशाण दस्सीने कने नोखे काम्म करीने ये साबित कित्या भई अनुग्रह रे बारे च तिन्हांरा सन्देश सच्चा था। 4पर नगरा रे लोकां च फूट पईगी, तिसते कितणे त यहूदियां खौ कने कितणे इ प्रेरितां खौ हुईगे।

5ताहली जे अन्यजाति कने यहूदी लोक तिन्हांरी बेज्जति कने तिन्हां पर पत्थर मारने खातर अपणे सरदाराँ समेत तिन्हांरे पिच्छे दौड़े, 6तां सै ये गल्ल जाणीगे, कने लुकाउनिया प्रदेशा रे लुस्त्रा कने दिरबे नगराँ च, कने नेड़े-तेड़े रियां जगहां जो नट्ठीगे, 7कने तित्थी खुशखबरी सुनाणे लगे।

लुस्रा कने दिरबे च

8लुस्त्रा नगरा च इक माहणु बैठिरा था, तिसरे पैराँ च ताकत नीं थी। सै जन्मा तेई लंगड़ा था कने कदीं मनी चलीरा था। 9सै पौलुसा जो गल्लां करदे सुणया राँ था पौलुसे तिसखा नज़राँ गड्डीने देख्या भई तिस्सो ठीक हुणे रा विश्वास आ, 10कने बड़िया अवाज़ा च गलाया, “अपणे पैराँ रे भार सिधा खड़ा हुई जा।”

11लोकें पौलुसा रा येढ़ा काम्म देखीने लुकाउनिया रिया भाषा च ऊच्चिया अवाज़ा च गलाया, “देबता माहणुआं रे रुपा च हुईने अहांले उतरी गरे।” 12तिन्हें बरनबासा जो ज्यूस,#14:12 ज्यूस यूनानियां रा मुख्या देबता था कने पौलुसा जो हिरमेस#14:12 हिरमेस यूनानी देबते रा सनेहा देणे औल़ा गलाया काँह्भई सै गल्लां करने च माहिर थे। 13ज्यूस रे तिस मन्दरा रा पुजारी सै जे तिन्हांरे नगरा रे सामणे था, बल़द कने फूल्लां रा हार फाटका पर लयाई ने लोकां सौगी बल़ि करना चाँह था।

14पर बरनबासे कने पौलुस प्रेरिते ताहली जे ये सुणया, तां तिन्हें बौहत परेशान हुईने अपणे कपड़े फाड़े कने भीड़ा च जाईने, जोरा ने गलाणे लगे, 15“हे लोको, तुहें क्या करया रायें? अहें बी तां तुहां साई दुख-सुख भोगणे औल़े माहणु ये कने तुहांजो खुशखबरी सुणाया रायें भई तुहें इन्हां बेकार चिज़ां ते लग्ग हुईने जिऊंदा परमेशरा ले औआ, तिने अकाश कने धरती कने समुद्र कने जो किछ तिसच आ बणाया। 16तिने पिछले बगता च सब्बीं जातियां जो अपणे-अपणे रस्तयां पर चलने दित्या।

17“तां बी परमेशरे अप्पूँजो बगैर गवाह ते नीं छडया पर सै भलाई करदा रैया, कने अम्बरा ते बरखा कने फल़ां औल़यां मौसमां जो देईने तुहांरे मना जो भोजन कने खुशिया ने भरदा रैया।” 18येढ़ा बोलीने भई तिन्हें लोकां जो बड़िया मुश्कलें रोकया भई सै तिन्हांरे खातर बलिदान नीं करो।

19पर किछ यहूदियें अन्ताकिया कने इकुनियुम नगरा ते आईने लोकां जो अप्पूँ खा करील्या, कने पौलुसा पर पत्थर मारे, कने तिस्सो मरीरा समझीने नगरा ते बाहर घसीटी ने लईगे। 20पर तां जे चेले तिसरे चऊँ पासयां आईने खड़े हुये तां सै उट्ठीने नगरा च गया कने दुज्जे दिन बरनबासा ने सौगी दिरबे गाँवां जो चलिग्या।

सीरिया रे अन्ताकिया जो बापस औणा

21कने पौलुस कने बरनबास तिस नगरा रे लोकां जो खुशखबरी सुणाईने, कने बौहत सारे चेले बणाईने, लुस्त्रा कने इकुनियुम कने अन्ताकिया नगरा जो वापस आईगे, 22कने हरेक नगरा रे चेलयां रे मना जो मजबूत करदे रहे कने ये उपदेश देआं थे भई विश्वासा च बणीरे रौआ; कने ये बोलां थे, “अहांजो मते दुख सहीने परमेशरा रे राज्जा च जाणे मिलणा।”

23कने पौलुस कने बरनबासे हरेक कलीसियां चते विश्वासी लोकां जो चुणीने तिन्हां खातर प्राचीन बणाये कने उपवास कने प्राथना करीने तिन्हांजो प्रभु यीशुये जो सौंपीत्या, तिस पर जे तिन्हें विश्वास कित्तिरा था। 24कने सै पिसिदिया प्रदेशा चियें हुन्दे हुये पंफूलिया प्रदेशा च पुज्जे; 25फेरी पिरगा नगरा च वचन सुणाईने अत्तलिया नगरा च आये,

26कने तित्थी ते सै जहाजा पर अन्ताकिया नगरा जो वापस गये, ऊत्थी सै तिस कम्मां खातर सै जे तिने पूरा कित्तिरा था परमेशरा रे अनुग्रह च सौंपी ने गये। 27तित्थी पुज्जी ने तिन्हें कलीसिया रे लोकां जो कट्ठा कित्या कने दस्या भई परमेशरे तिन्हां सौगी हुईने कितणे बड्डे-बड्डे काम्म कित्ते, कने परमेशरे अन्यजाति लोकां जो कियां यीशु मसीह पर विश्वास करने रे लायक बणाया। 28कने पौलुस कने बरनबास चेलयां सौगी बौहत दिनां तका रै।

Currently Selected:

प्रेरितां 14: KFSNT

Highlight

Copy

Compare