2 कुरिन्थियों 9

साथी विश्वासियां खातर सहायता

1हुण यरूशलेम च विश्वासियां जो मदद करने री सेवा रे बारे च मिन्जो तुहांजो लिखणे री जरूत नीं। 2काँह्भई हऊँ मदद रे खातर तुहांरिया इच्छा जो जाणाँ, जिस रिया वजह ने हऊँ तुहांरे बारे च मकिदुनिया प्रदेशा रे रैहणे औल़े विश्वासियां रे सामणे ये बोलदे हुये गर्व करी रां, भई तुहें अखाया प्रदेशा रे लोक त पिछले साल्ला तेई मदद करने जो त्यार थे कने तुहांरिया इसा इच्छा ते तिन्हां चते मतयां जो मदद करने रे खातर प्रेरणा मिली।

3पर हऊँ इन्हा तिन्नां विश्वासी भाईयां जो तुहांले इस खातर भेज्जी राँ ताकि अहें तुहांरे बारे च सै जे गर्व दस्या, सै गल़त नीं साबित हो, पर तेढ़ा जे मैं बोल्या तियां इ तुहें यरूशलेम नगरा रे विश्वासियां री मदद करने जो त्यार रौआ। 4येढ़ा नीं ओ, भई जे मकिदुनिया प्रदेशा ते किछ विश्वासी मेरे सौगी आओ कने तुहांजो दान देणे जो त्यार नीं पाओ, तां हुई सक्कां भई इस भरोसे रिया वजह ने अहें शर्मिन्दा ओ कने तुहें बौहत जादा शर्मिन्दा ओ। 5इस खातर मैं ये जरूरी समझया भई हऊँ विश्वासी भाईयां ने ये विनती करूँ भई सै अहांते पैहले इ तुहांले जाओ कने तिस वायदा कित्ती रिया भेन्टा जो त्यार करी लो, ताकि ये जबरदस्ती नीं पर तुहांरिया इच्छा रे मुतावक दित्तिरा दान ओ।

दान कियां देणा

6इसजो याद रखा, सै जे थोड़ा बाँह, सै थोड़ा इ कटगा; कने सै जे जादा बाँह, सै जादा कट्टां। 7हर कोई बिणा किसी दुखा ते, या बिणा किसी जबरदस्तिया ते, उतणा इ देओ जितना तिसरे मने सोचया; काँह्भई परमेशर खुशिया ने देणे औल़यां ने जादा प्यार रखां। 8कने परमेशर तुहांजो जरूरता ते जादा देणे च सामर्थी आ, ताकि तुहांले दुज्यां जो देणे खातर जादा ते जादा हूणा। 9तियां जे भई पवित्रशास्त्रा च लिखिरा,

“परमेशर खुशिया ने गरीब लोकां जो दान देआं,

कने सै जे ठीक आ तिस्सो सै हमेशा कराँ।”

10काँह्भई परमेशर इ करसाणां जो ब्यू देआं कने खाणे जो रोटी देआं। तियां इ तुहांले सै किछ जे हाया परमेशर तिसजो बधान्गा, ताकि सै जे जरूरत मन्द लोक ये तिन्हांजो तुहें होर बी जादा देई सक्को। 11तुहें हर तरफा ते धनी हुणे ताकि तुहें हर मौके पर दान्नी बणी सक्को, कने ताहली जे अहें तुहांरिया उदारता रा दान जरूरत मन्द लोकां जो देन्गे, तां सै लोक परमेशरा रा धन्यवाद करगे।

12काँह्भई दान देणे रिया सेवा जो पूरा करने ते नां सिर्फ परमेशरा रे लोकां री जरूरत पूरी हुआं इ, पर सै लोक खुशिया ने परमेशरा रा बौहत धन्यवाद कराँ ये। 13तुहांरिया इस सेवा जो सबूत मनदे हुये तिन्हां परमेशरा री महिमा करनी, काँह्भई तुहें मसीह रिया खुशखबरिया जो मन्नीने तिसरे अधीन रैं, कने गरीब विश्वासियां री कने सब्बीं री मदद करने च उदारता दसदे रैं। 14हुण सै तुहांरे खातर परमेशरा ने प्राथना करी राँये कने तुहांजो देखणा चाँये, काँह्भई परमेशरे तिन्हौं आशीषित करने रे खातर तुहांजो बौहत इस्तेमाल कित्या। 15तिस दान्ना रे खातर तिसरा जे बखान नीं कित्या जाई सकदा, परमेशरा रा धन्यवाद ओ।

Currently Selected:

2 कुरिन्थियों 9: KFSNT

Highlight

Copy

Compare