2 कुरिन्थियों 12

पौलुसा जो दिव्य दर्शण

1हुण मिन्जो गर्व करने इ पौणा हलाँकि इसच मेरा कोई फायदा नींआ, पर मांह हुण दर्शणां कने प्रकाशनां रे बारे च गर्व करना सै जे प्रभुये मिन्जो दित्तिरे। 2हऊँ येढ़े इक माहणुये जो जाणाँ सै जे मसीह रा विश्वासी आ, तिस्सो जे चौदा साल पैहले तिज्जे स्वर्गा तक चक्कील्या गया। मिन्जो ये पता नींआ भई सै माहणु शरीरा सौगी या आत्मा च, पर इसा गल्ला जो सिर्फ परमेशर इ जाणाँ।

3हऊँ ये भीं ते बोलां, भई हऊँ जाणाँ इस माहणुये जो तिज्जे स्वर्गा तक चक्कील्या गया था, पर हऊँ ये नीं जाणदा भई शरीरा सौगी या आत्मा च, वल्कि इसा गल्ला जो सिर्फ परमेशर इ जाणाँ। 4कने येढ़ियां गल्लां सुणियां सै जे गलाणे रियां नीं; कने तिन्हांजो दुज्यां लोकां ने गलाणा माहणुये रे खातर ठीक निआं। 5येढ़े माहणुये पर मांह घमण्ड करना, पर अपणी कमजोरियां जो छड्डिने, अपणे बारे च घमण्ड नीं करना।

6काँह्भई जे हऊँ घमण्ड करना चाऊँ तां बी मांज मूर्ख नीं बणना, काँह्भई मांह सच्च बोलणा; पर हऊँ रुकी जां, ताकि येढ़ा नीं ओ भई तियां जे कोई मिन्जो देखां या माहते सुणां, मिन्जो तिसते बधीने समझो।

शरीरा च कन्डा

7पर तिन्हां अदभुत दर्शणां रे बारे च मिन्जो बौहत गर्व नीं हूणा चाहिन्दा, तिन्हौं जे परमेशरे मिन्जो दस्सीरा। इस खातर मेरे शरीरा च इक कन्डा चुभाया गया था भई शैतान्ना रा इक दूत मिन्जो बौहत पीड़ा देओ, ताकि हऊँ घमण्ड नीं करूँ।

8इसा समस्या रे बारे च मैं प्रभु यीशुये ने तिन्न बार विनती कित्ती भई सै इस कण्डे जो माह चते नकाल़ी लो। 9पर प्रभुये मिन्जो बोल्या, “तेरे खातर मेरा अनुग्रह काफी आ; काँह्भई कमजोरिया ची मेरी सामर्थ जादा हुआं इ,” इस खातर हऊँ अपणिया कमजोरिया पर खुशिया ने गर्व कराँ, ताकि मसीह री सामर्थ मांह च वास करदी रौ। 10इसा वजह ने हऊँ मसीह रे खातर कमजोरियां, बेज्जतियां, गरीबिया, सताव कने कष्टां च खुश रैयां। काँह्भई ताहली जे हऊँ कमजोर हुआं तांई मसीह रिया सामर्था च मजबूत हुआं।

इक प्रेरित रे लक्षण

11हऊँ मूर्खां साई नाटक करी रां, पर येढ़ा करने रे खातर मिन्जो तुहें मजबूर कित्या; तुहां लोकां जो मेरी सपारस करनी चाहिन्दी थी, हलाँकि हऊँ किछ निआं, पर तुहांरे तिन्हां महान प्रेरितां, ते हऊँ किसी बी तरिके ने छोट्टा निआं। 12ताहली जे हऊँ तुहांजो सौगी था तां मैं ये साबित कित्या भई हऊँ इक प्रेरित आ। काँह्भई मैं धैर्य सौगी तुहांरे बिच कई चिन्हां कने अदभुत कम्मां कने सामर्था रे काम्म कित्ते। 13मैं होर कलीसियां रे खातर क्या कित्या सै जे मैं तुहांरे खातर नीं कित्तिरा? सै येआ भई मैं तुहांजो पैसयां ने मदद करने खातर परेशान नीं कित्या। इस खातर, किरपा करीने इसा गल़तिया रे खातर मिन्जो माफ करयां।

14देक्खा, तुहांले औणे जो हुण हऊँ तिज्जी बार त्यार आ, कने तुहौं खर्चे ते परेशान करने रा मेरा इरादा नींआ। हऊँ तुहांरी धन-दौलता लेणे री कोशिश नीं करी रां, पर तुहांरी मदद करने जो आया रां, काँह्भई बच्चयां जो अपणे माता-पिता रे खातर कोई बचत करने री जरूरत नीं हुन्दी बल्कि अपणे बच्चयां रे खातर माता-पिता जोई बचत करनी हुआं इ। 15सै जे किछ मेरले आ तिस्सो तुहांरे खातर बड़िया खुशिया ने खर्च करगा, कने तुहांरी मदद करने रे खातर अपणा जीवन बी देई देन्गा। जे हऊँ तुहांजो जादा प्यार रखां, तां भला तुहें मिन्जो घट प्यार कियां करी सक्कां ये।

16तुहें सैहमत ये भई हऊँ तुहांरे खातर कोई बोझ नीं था, पर होर लोक सोच्चां ये भई मैं चलाक आ कने तुहांजो धोखा दित्तिरा, सै जे झूठ आ। 17हऊँ तुहांते अपणे खातर पैसा पाणे जो तीतुस या होर किसी रा इस्तेमाल नीं कित्या। 18मैं तीतुस ने विनती करीने तिस सौगी तिस विश्वासी भाईये जो तुहांले भेज्या, पर तितुसे तुहांजो कोई धोखा नीं दित्या। पर तीतुस कने मैं इक तरिके ने कने इक मकसदा ने व्यवहार कित्या। 19हुण तुहें क्या सोच्ची रायें भई इक्की लम्मे बगता ते अहें तुहांरे सामणे अपणा बचाव करी रायें? पर अहें त परमेशरा रे सामणे मसीह रे चेले रे रुपा च बोल्ली राँये। मेरे प्यारे मित्रो, अहें सै जे किछ बोल्ली राँये, तुहौं विश्वासा च मजबूत करने खातर इ बोल्ली राँये।

20काँह्भई मिन्जो डर आ भई ताहली जे हऊँ तुहांले आऊं, तां किति तुहांजो तेढ़ा नीं पाऊँ, तेढ़ा जे पाणा चाँह था, कने तुहें बी मिन्जो तेढ़ा इ पावा तेढ़ा जे पाणा चाँये। मिन्जो डर आ भई तुहांरे बिच मिन्जो किति लड़ाईया, जल़ण, गुस्सा, विरोध, हिरख, चुगली, घमण्ड कने बखेड़े नीं मिलो। 21मिन्जो डर आ भई ताहली जे हऊँ फेरी तुहांजो मिलणे आऊं, तां तुहांरे सामणे मेरा परमेशर किति मेरी बेज्जति नीं करो, कने मिन्जो तिन्हां बौहत लोकां रे खातर बिलाप नीं करने पौ, तिन्हेंजे पैहले पाप कित्तिरा था, कने गन्दे काम्म, कने व्याभिचार, कने भोग-विलासा च डुब्बीरे मन नीं फिराया।

Currently Selected:

2 कुरिन्थियों 12: KFSNT

Highlight

Copy

Compare