1 कुरिन्थियों 14
14
भबिष्यवाणी कने होर-होर भाषां
1इक्की दुज्जे जो प्यार करने री कोशिश करा, कने आत्मिक वरदान्नां री बेसब्रिया ने इच्छा करदे रौआ, खास करीने भविष्यवाणिया रे बरदान्न। 2काँह्भई सै जे होरीं-होरीं भाषा च गल्लां कराँ सै माहणुआं ने नीं पर परमेशरा ने गल्लां कराँ; इस खातर भई तिसरियां गल्लां कोई नीं समझदा, काँह्भई सै भेता रियां गल्लां आत्मा च हुईने बोलां। 3पर सै जे भविष्यवाणी कराँ, सै माहणुआं जो तिन्हारी तरक्की, प्रोत्साहन, कने तसल्लिया रे खातर बोलां।
4सै जे होरीं भाषा च गल्लां कराँ, सै अपणी तरक्की कराँ; पर सै जे भविष्यवाणी कराँ, सै कलीसिया री तरक्की कराँ। 5हऊँ चाँह भई तुहें सब होरीं भाषा च गल्लां करो पर इसते बी जादा येढ़ा चांह भई भविष्यवाणी करा। काँह्भई जे होर भाषा बोलणे औल़ा कलीसिया रिया तरक्किया खातर भाषा रा मतलब नीं दस्सो तां भविष्यवाणी करने औल़ा तिसते बधी नेआ।
6इस खातर साथी विश्वासियो, जे हऊँ तुहांले आईने होरीं भाषां च गल्लां करूँ, तां इसते हऊँ तुहांरा क्या भला करगा? पर जे हऊँ प्रकाशन, ज्ञान, भविष्यवाणी, शिक्षा रियां गल्लां तुहांजो बोलूं, तां तुहांरे खातर इसरा फायदा। 7इस तरिके ने जे निर्जीव चिज़ां बी, तिन्हांते जे अवाज़ निकलां इ, तियां जे मुरली या बीण, जे इन्हांरे स्वराँ च भेद नीं हो तां सै जे बजाया जां, सै किंया पछयाणा जाणा? 8कने जे तुरहिया री अवाज़ साफ नीं हो, तां कुण लड़ाईया खातर त्यार हूणा?
9इयां इ तुहें बी जे जीभा ते साफ-साफ गल्लां नीं बोल्लो, तां जो किछ तुहां बोलणा सै कियां किसी जो समझ औणा? तां येत हवा ने गल्लां करना हुया। 10संसारा च बौहत सारी भाषां हईयां, कने तिन्हां सब्बीं रा मतलब बी हुआं। 11इस खातर जे हऊँ किसी भाषा रा मतलब नीं समझूं, तां बोलणे औल़े रिया नज़राँ च हऊँ परदेशी हुया कने बोलणे औल़ा मेरियां नज़राँ च परदेशी हुया। 12इस खातर तुहें बी ताहली जे आत्मिक वरदान्नां रिया धुन्ना च हो, तां येढ़ि कोशिश करा भई तुहांरे वरदान्नां रिया तरक्किया ते कलीसिया री तरक्की हो।
13इस वजह ते सै जे होर भाषा बोल्लो, तां सै प्राथना करो भई तिसरा मतलब बी दस्सी सक्को। 14इस खातर जे हऊँ होरी भाषा च प्राथना करूँ, तां मेरी आत्मा प्राथना कराँ इ, पर मेरी बुद्धि काम्म नीं करदी। 15इस खातर, हऊँ क्या करगा? हऊँ आत्मा ते बी प्राथना करगा, कने बुद्धिया ने बी प्राथना करगा; माह आत्मा ते बी गाणा, कने बुद्धिया ने बी गाणा।
16नैत जे तू आत्मा तेई परमेशरा रा धन्यवाद करगा, तां फेरी अज्ञानी माहणुये तेरे धन्यवादा पर आमीन किंया बोलणा? काँह्भई सै त नीं जाणदा भई तू क्या बोलां? 17तू त अच्छे तरिके ने परमेशरा रा धन्यवाद करदा हूणा, पर दुज्जे री तरक्की नीं हुंदी। 18हऊँ अपणे परमेशरा रा धन्यवाद कराँ, भई हऊँ तुहां सब्बीं ते जादा होरीं भाषा च बोलां। 19पर कलीसिया च होरीं भाषा च दस हज़ार गल्लां बोलणे ते मिन्जो ये होर बी जादा अच्छा लगां, भई दुज्जेयां जो सखाणे खातर बुद्धिया ते पांज्ज इ गल्लां बोलूं।
20अरे साथी विश्वासियो, तुहें अपणिया समझा च बालकां साई नीं बणा। फेरी बी बुराईया च त बालक रौआ, पर समझा च सयाणे बणा। 21पवित्र शास्त्रा च लिखिरा, “मांह होर भाषा बोलणे औल़यां रे जरिये, कने परदेशियां रे मुँआं ते इन्हां लोकां ने गल्लां करनियां, तां बी इन्हां मेरी नीं सुणनी,” ये प्रभु बोलां।
22इस खातर होर भाषां विश्वासियां रे खातर नीं, पर ये अविश्वासियां रे खातर चिन्ह आ, कने भविष्यवाणी अविश्वासियां रे खातर नीं, पर विश्वासियां खातर चिन्ह आ। 23तां जे कलीसिया इक्की जगह कट्ठी हो, कने सारे के सारे होरीं भाषां बोल्लो, कने सै जे भाषा नीं समझदे या किछ अविश्वासी लोक अन्दरा जो आई जो तां क्या तिन्हां तुहांजो पागल नीं बोलणा? 24पर जे सब भविष्यवाणी करने लगो, कने कोई अविश्वासी या सै जे भाषा नीं समझदा अन्दरा जो आई जो, तां तिस्सो एहसास हूणा भई सै पापी आ कने इन्हा गल्लां रे जरिये तिसरा न्याय हूणा। 25कने तिसरे मना रे भेत सामणे आई जाणे, कने फेरी तिस मूँहां रे भार पैईने परमेशरा री अराधना करनी, कने मन्नी लेणा भई सच्चीजो परमेशर तुहांरे बिच आ।
अराधना च अनुशासन
26अरे साथी विश्वासियो क्या करना चहिन्दा? ताहली जे तुहें कट्ठे हुआं ये, तां हरेक रे दिला च भजन, उपदेश, होरीं भाषां, प्रकाशन या होरीं भाषा रा मतलब दसणा रैया। सब किछ कलीसिया री आत्मिक तरक्किया खातर हूणा चहिन्दा। 27जे होरीं भाषा च गल्लां करनियां हो, तां दो या जादा ते जादा तिन्न माहणु बारो-बरतिया बोल्लो, कने इक माहणु तिसरा मतलब दस्सो। 28पर जे मतलब दसणे औल़ा नीं हो, तां होरीं भाषा बोलणे औल़ा कलीसिया च शान्त रहो, कने अपणे मना च कने परमेशरा ने गल्लां करो।
29भविष्यवक्तयां चते दो या तिन्न बोल्लो, कने बाकी लोक तिसरे वचनां जो सावधानिया ने परखो। 30पर जे दुज्जे पर सै जे बैठिरा, किछ ईश्वरीय प्रकाशन मिलो तां पैहला चुप हुई जाओ। 31काँह्भई तुहें सब इक-इक करीने भविष्यवाणी करी सक्कां ये, ताकि सब सिक्खी सक्को कने सब्बीं जो प्रोत्साहन मिली सक्को। 32कने भविष्यवक्तयां री आत्मा भविष्यवक्तयां रे वशा ची।
33काँह्भई परमेशर गड़बड़िया रा नीं, पर शान्तिया रा परमेशर आ। तियां जे पवित्र लोकां रिया सब्बीं कलीसियां चा। 34जनाना कलीसिया रिया सभा च चुप रौ, काँह्भई तिन्हांजो गल्लां करने रा हुक्म निआं, पर अधीन रैहणे रा हुक्म आ, तियां जे व्यवस्था च लिखिरा बी आ। 35जे सै किछ सिखणा चाओ, तां घरा च अपणे पतिये ते पुछो, काँह्भई जनाना रा कलीसिया च गल्लां करना शर्मा री गल्ल इ। 36क्या परमेशरा रा वचन तुहां चते निकल़ीरा? या सिर्फ तुहां तक इ पुज्जीरा?
37जे कोई माहणु अप्पूँजो भविष्यवक्ता या आत्मिक माहणु समझो, तां ये जाणी लो भई सै जे गल्लां हऊँ तुहांजो लिखां, सै प्रभुये रा हुक्म आ। 38पर जे कोई इन्हां गल्लां री तरफ ध्यान नीं देओ, तां तुहें तिसरी तरफ बी ध्यान नीं देआ।
39इस खातर मेरे साथी विश्वासियो, भविष्यवाणी करने रिया धुन्ना च रौआ कने होर भाषा बोलणे ते मना नीं करा; 40पर सारियां गल्लां सै जे कलीसिया च तुहें कराँ ये, सै सारियां ठीक ढंगा ने कने बारी-बारी कित्तियां जाओ।
Currently Selected:
1 कुरिन्थियों 14: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
