जकर्याह 9
9
इस्राएलेरो दुश्मन्न करां बच़ाव
1हद्राक मुल्खेरे बारे मां यहोवारू ज़ोवरू भारी वचन, ज़ैन दमिश्क नगरे पुड़ पेलू। किजोकि यहोवारी नज़र मैन्हु केरे पासे ते इस्राएलेरे गोट्लां केरे पासे लगोरीए; 2हमात प्रदेशेरे पासे ज़ैन दमिश्क नगरेरे नेड़े, ते सोर ते सीदोन नगरां केरे पासे, एना त बड़े अक्लमन्दन। 3सोरे त अपने लेई अक मज़बूत क़िलो बनाव, ते धूड़रे सिक्कां केरि ज़ेरि चाँदी, ते सड़कां केरि च़िकरारू ज़ेरू बड़ू रोड़ू सोन्नू अकोट्ठू रखोरूए। 4पन हेरा, परमेशर तैस नगरे होरि केरे अधिकारे मां केरि देलो, ते तैसेरू घमण्ड ट्लोड़तां समुन्दरे मां छ़ेडी देलो; ते तैन नगर अग्गी मां भस्म भोइ गालू।
5एन हेरतां अश्कलोन नगर डेरि गालू, ते गाज़ा नगरे दुख भोल्हो, ते एक्रोन नगर भी डेरि गालू, किजोकि तैसेरी उमीद ट्लुटी गाली; ते फिरी गाज़ा नगरे मां राज़ो न रालो ते अश्कलोन नगर बरबाद भोइ गालू। 6ते अश्दोद नगरे मां बखले लोक बेस्सी गाले; एस तरीके सेइं अवं पलिश्ती लोकां केरू घमण्ड ट्लोड़तां छ़डेलो। 7अवं तैसेरे एशी मरां शिकारेरो खून ते भिट्टी चीज़ां कढेलो, तैखन ज़ै तैन मरां बच़ेलो, तैस जो परमेशरेरो मैन्हु ज़ोले, ते यहूदा मां हाकिमेरो ज़ेरो भोल्हो, ते एक्रोनी लोक यबूसी लोकां केरे ज़ेरे भोइ गाले।#2 शमू. 5:6-7;1 इति. 11:4-6. 8परमेशर ज़ोते, तैखन अवं तैस सेनारे वजाई सेइं ज़ै नेड़ेरां गाली ते फिरी वापस एज्जेली, अवं अपने भवनेरे आसे-पासे डेरो लेइतां रालो ते सताने बालो फिरी तैन केरे सामने न गालो, किजोकि अवं इन्ना गल्लां हेजू भी हेरताईं।
सिय्योनेरो एजनेबालो राज़ो
9हे सिय्योनेरी कुइये #9:9 सिय्योनेरी कुइये सिय्योनेरे लोकखूब खुशी भो, हे यरूशलेमेरी कुइये#9:9 यरूशलेमेरी कुइये यरूशलेमेरे लोक जयजयकार केर! किजोकि तेरो राज़ो तीं कां एज्जेलो; तै सच़्च़ोए ते छुटकारो तैसेरे हथ्थे मांए, तै दीने, ते गधे पुड़ सुवारे; बल्के जुवान गधे पुड़ सुवारे।#मत. 21:5;यूह. 12:14-15. 10यहोवा ज़ोते, अवं एप्रैमेरे रथ#9:10 एप्रैमेरे रथ इस्राएलेरे रथ ते यरूशलेमेरे घोड़े नाश केरतां छ़डेलो, ते जंगरे धनुषां केरे टुक्ड़े किये गाले, तै गैर कौमन सेइं शैन्तरी गल्लां केरेलो। तैसेरी हुकूमत एक्की समुन्दरे करां होरि समुन्दरे तगर भोल्ही, ते फरात दरियाए करां लेइतां धेरतरे कूने-कूने तगर भोल्ही।#इफि. 2:17;भज. 72:8.
यहोवा अपने लोकन बच़ालो
11तू भी शुन, किजोकि मेरे करारेरे खूनेरे वजाई सेइं, मीं तेरे कैदी लोक बगैर पैने खड्डे मरां कढोरेन।#निर्ग. 24:8;मत. 26:28;1 कुरि. 11:25. 12हे उमीद रखनेबाले गुलामाव वापस अपने क़िले मां एज्जा; अवं तुसन अज़्ज़े ज़ोताईं कि अवं तुसन बदले मां दुगनू सुख देइलो।
13किजोकि मीं धनुषेरे ज़ेरे यहूदा च़ैढ़तां तैस पुड़ तीरेरो ज़ेरो एप्रैमे लेवरोए। अवं सिय्योनेरे रानेबालन यूनानेरे लोकां केरे खलाफ खड़े केरेलो। 14तैखन यहोवा तैन पुड़ लेइहोलो, ते तैसेरो तीर बिजलरो ज़ेरो छुटेलो; ते परमेशर यहोवा नरशिंगो बज़ेइतां दक्षिण मुल्खेरे तूफानेरो ज़ेरो भोइतां च़लेलो। 15सेना केरो यहोवा तैन ढाली सेइं बच़ालो, ते तैना अपने दुश्मना केरो नाश केरेले, ते तैन केरे छ़िंगलोटेरे घोड़न पुड़ पव रखेले; ते तैना पीतां एरी शौर केरेले ज़ेन्च़रे लोक शराब पीतां केरतन, ते तैना कुटोरेरे ज़ेरे या वेदरे कूनेरे ज़ेरे भरे गाले।
16तैस वक्ते तैन केरो परमेशर यहोवा तैन्न अपने लोकां केरे रूपेरी भैड्डां-छ़ेल्ली सेमझ़तां तैन्न पुहालेरो ज़ेरो खतरे करां बच़ालो; तैना ताजेरी मणि ठहरतां तैसेरी ज़मीनी करां बड़े उच्चे पुड़ चमकते राले। 17तैसेरू बड़ू सुख, ते बड़ी शोभा भोल्ही! तैसेरे जुवान लोक अन्न खेइतां, ते कुइयां नंव्वो दाछ़रो रस पीतां मज़बूत भोल्ही।
Currently Selected:
जकर्याह 9: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
