श्रेष्ठगीत 4
4
लाड़ो
1हे मेरी ट्लारी तू खूबसूरत आस, तू खूबसूरत आस,
तेरी एछ़्छ़ी तेरे निकाबे हैठ दूई कबूतरां
केरे ज़ेरि आन,
ते तेरो दोग छ़ेल्ली केरो ज़ेरोए,
ज़ैना गिलाद पहाड़ेरे ढलाने पुड़ झ़ुलोरिन।#कह. 5:19.
2तेरे दंत भैड्डां केरि केन्नी केरे ज़ेरेन, ज़ैन केरि उन्ना बरधेवरिन,
ज़ैना निहानेरे बाद तालाबे मरां बेइर निसने लेगोरिन, ते हर एक्की भैड्डी जोड़ी बच्चेन,
ते तैन मरां केन्चेरो साथी नईं मरोरो।
3तेरे ओठ लाल रंगेरी डोरारे ज़ेरेन,
ते तेरू आशी भी रोड़ूए,
ते तेरी कनपेट्टी तेरे निकाबे हैठ
अनारेरे अध्धे-अध्धे टुक्डां केरे ज़ेरिन।
4तेरू गल दाऊदेरे मीनारेरू ज़ेरूए,
ज़ै हथियारां केरे लेई बनोरो भोए, ज़ैस पुड़ हज़ार ढालां टेंगोरी भोन,
ते तैना सब जंगी मड़दां केरि ढालन।
5तेरी दूईये छैती हिरनरे जोड़ी बच्चां केरे ज़ेरिन,
ज़ैना सोसनेरे फूड़न मां च़रते भोन।
6ज़ांतगर दिहाड़ी न डुब्बे, ते छाव लम्मी भोती-भोती मिटी न गाए,
तांतगर अवं जल्दी गन्धरसेरे पहाड़े ते लोबानेरे पहैड़ी पुड़ च़लो गेइलो।
7हे मेरी ट्लारी, तू बड़ी खूबसूरत आस,
ते तीं मां कोई नुक्स नईं।#इफि. 5:27.
8हे मेरी दुल्हन, तू मीं सेइं साथी लबानोनेरां,
तू मीं सेइं साथी लबानोनेरां च़ली एई,
तू अमानारी च़ोटी पुड़ेरां
सनीर ते हेर्मोनेरी च़ोटी पुड़ेरां,
शेरां केरि कुढन मरां, ते चीतां केरे पहाड़न पुड़ां नज़र केर।
9हे मेरी बेइन, हे मेरी दुल्हन, तीं मेरो दिल च़ोरी छ़डोरोए,
एपनी एछ़्छ़री एक्की नज़री सेइं
ते अपने गलेरे एक्की हीरे सेइं मेरो दिल घिन्नी छ़डोरोए।
10हे मेरी बेइन, हे मेरी दुल्हन तेरो प्यार केत्रो रोड़ोए,
तेरो प्यार दाछ़रे रस्से करां भी जादे रोड़ोए,
ते तेरे इत्रां केरि खुशबू सेब्भी मसालन करां भी जादे खुश्बूदारे।#यूह. 4:10;यशा. 12:3.
11हे मेरी दुल्हन, तेरे ओठन पुड़ेरां माछ़ी झ़ड़ते,
तेरी ज़िभी हैठ माछ़ी ते दुद्ध भोते;
ते तेरे लिगड़ां केरि खुशबू लबानोनेरी ज़ेरिए।
12हे मेरी बेइन, हे मेरी लाड़ी, तू अक दार बन्द कियोरी बाग आस,
ते दार बन्द कियो नाग आस, ते छाप लेवरो झरनो आस।
13तेरे मुन्केरे रोड़े अनारां केरे फलदार बागरे ज़ेरे आन,
ज़ैस मां मींधी ते जटामासी,
14जटामासी ते केसर,
लोबानेरे सब किसमां केरे बुट, मुश्क ते दालचीनी,
गन्धरस, अगर, इना सब खास-खास खुशबूदार चीज़ां भोतिन।
15तू बागां केरो नाग आस,
ते ज़िन्दगरे पैनेरो चशमो आस,
ते लबानोनेरां उन्ढे बगने लेगोरी गड्डन।
लाड़ी
16हे उत्तरेरी हवा बींझ़, हे दक्षिणेरी हवा तू च़ली एई!
मेरे बागी मांमेइं एई, ज़ैस सेइं तेरी खुशबू फैले।
मेरो ट्लारो अपने बागी मां एज्जे,
ते तैसेरे रोड़े-रोड़े फल खाए।
Currently Selected:
श्रेष्ठगीत 4: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
