भजन संहिता 9
9
ज़ींत देनेरे लेई शुक्र
बज़ानेबालां केरे प्रधानेरे लेई मुतलबैयनेरे रागे पुड़ दाऊदेरू भजन
1हे यहोवा अवं पूरे दिले सेइं तेरू शुक्र केरेलो;
ते अवं तेरे सब चमत्कारेरे कम्मां केरे बारे मां ज़ोइलो।
2अवं तेरे वजाई सेइं खुश ते मघन भोल्हो,
हे परमप्रधान परमेशर, अवं तेरे नंव्वेरू भजन ज़ोइलो।
3मेरे दुश्मन हैरतां पत्रोवं बेदलोले,
तैना तेरे सामनेरां ठोकर खेइतां नाश भोतन।
4किजोकि तीं मेरे मुकदमेरो फैसलो मेरे हक्के मां कियोरोए;
ते अपने तखते पुड़ बिशतां धार्मिकतारे मुताबिक मेरो न्याय कियोरोए।
5तीं अक-अक कौम#9:5 अक-अक कौम तैना कौमां ज़ैना परमेशरेरे न ज़ानन झ़िड़की ते बुरे लोक नाश कियोरेन;
तीं तैन केरू नवं हमेशारे लेई मिटेइतां छ़डेरूए।
6दुश्मन हमेशारे लेई बरबाद भोए;
ते तैन केरां नगरां तीं बुछ़ोड़ां,
ते तैन केरू नवं ते निशान मिटी जेवरूए।
7पन यहोवा हमेशारे लेई अपनो तखत तियार कियोरोए,
तैनी अपनो तखत न्यायेरे लेई तियार कियोरोए;
8ते तै सच़्च़ैई सेइं दुनियारो न्याय केरेलो,
ते सच़्च़ैई सेइं मुल्खां-मुल्खां केरे लोकां केरो न्याय केरेलो।
9यहोवा तैन लोकां केरे लेई अक उच्चो क़िलो ठहरेलो ज़ैन पुड़ ज़ुलम भोते,
तै मुसीबतरे वक्ते मां उच्चो क़िलो ठहरेलो।
10ते ज़ैना तेरू नवं ज़ानतन, तीं पुड़ भरोसो रखेले,
किजोकि हे यहोवा, तीं एप्पु कां एजने बाले कधी नईं शारोरे।
11यहोवा ज़ै सिय्योने मां तखते पुड़ बिशोरोए, तैसेरू भजन ज़ोथ!
कौमां-कौमां केरे लोकन मां तैसेरे बड्डे-बड्डे कम्मां केरो प्रचार केरा।
12किजोकि खूनेरो बदलो नेनेबालो तैस याद रखते;
तै गरीबां केरि बिनती कधे न बिसरे।
13हे यहोवा, मीं पुड़ दया केर। हेर, मेरे दुश्मन मीं पुड़ ज़ुलम केरने लगोरेन,
तूए मौतरे फाटकन मरां मीं बच़ेइ सकतस।
14ताके अवं सिय्योनेरे फाटके#9:14 सिय्योनेरे फाटके यरूशलेमेरे लोकां केरे सामने कां तेरे गुणा केरू बियान केरीं,
ते तेरे दित्तोरे छुटकारे सेइं मघन भोईं।
15गैर कौमेईं ज़ै खड्डो घड़ोरो थियो, तैस्से मां तैना एप्पु बिछ़ड़न;
ज़ैन ज़ाल तैनेईं लेवरू थियूं, तैस मां तैन्ना केरो पव फेसी जेव।
16यहोवा अपनो आप बांदो कियो, तैने न्याय कियो;
दुष्ट अपने कियोरे कम्मन मां फेसी गाते। (हिग्गायोन #9:16 हिग्गायोन ध्यान सेला)
17दुष्ट पाताले मां वापस गालो,
ते कने तैना सब कौमां भी ज़ैना परमेशरे बिसरी गैतिन।
18किजोकि ज़रूरतमन्द लोक हमेशा तगर बिसरोरोए न राले,
ते न त हलीम लोकां केरि उमीद हमेशारे लेई नाश भोए।
19हे यहोवा उठ, मैन्हु प्रबल न भोइ सके!
कौमां केरो न्याय तेरे सामने कियो गाए।
20हे यहोवा, तैन डरा!
कौमां अपने आपे सिर्फ मैन्हु समझ़न। (सेला)
Currently Selected:
भजन संहिता 9: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
