कहावतां 27
27
1कालेरे दिहाड़ेरे बारे घमण्ड न केर,
किजोकि तू न ज़ानस कि सैरी दिहैड़ी मां कुन भोल्हु।
2तेरी तारीफ़ होरे लोक त केरन, पन तू एप्पु न केरां;
होरे तेरे बडीयाई केरन त केरन, पन तू अपनि बडीयाई न केरां।
3घोड़ त गिरकोए ते रेती मां बोझे,
पन बेवकूफेरी सरक, तैन दूईयन करां भी गिरकीए।
4बड़ी सरक ते क्रोधेरी हड़ाई,
पन जलनरे सामने कौन रेइ सकते?
5खुल्ली डांट छ़पोरे प्यारे करां रोड़ीए।
6ज़ैना ज़खम दोस्तेरे हथ्थे सेइं लगतन तैना भरोसेरे काबलन
पन बैरी जादे फुम्मड़ी देते।
7रज़्ज़नेरां बाद मैछ़ेरो कश भी फिक्को लगते,
पन ढ्लुखोरे भोने पुड़ सब ट्लिठी चीज़ां भी मिट्ठी लेगतिन।
8ठार छ़ेडतां घुमने बालो मैन्हु तैस च़ुड़ोलोवेरो ज़ेरोए,
ज़ै आल्हो छ़ेडतां उडरतो फिरते।
9ज़ेन्च़रे तेल ते खुशबू सेइं,
तेन्च़रे दोस्तेरे दिलेरी सही सलाही सेइं मन खुश भोते।
10ज़ै तेरो ते तेरे बाजी केरो भी दोस्त भोए तै नईं शारनो;
ते अपने आफतरे दिहाड़े, अपने ढ्लाएरे घरे नईं गानू।
प्यार केरनेबालो पड़ोसी, दूर रानेबाले ढ्लाए करां बड़ो रोड़ोए
11हे मेरे मट्ठा, अक्लमन्द भोइतां मेरो मन खुश केर,
तैखन अवं अपने निन्दा केरनेबाले जुवाब देइ सकेलो।
12अक्लमन्द मैन्हु मुसीबत एइती हेरतां छ़पते;
पन सिद्धे-सादे लोक अग्रोवं च़ले गातन ते नुकसान झ़ैलतन।
13ज़ैना बखलेरे ज़िमेवार भोतन तैसेरो कपड़ो,
ते ज़ै परदेशेरो ज़िमेवार भोए तैस करां बन्धे रख्खोरी चीज़ ने।
14ज़ै झ़ेझ़ां उठतां अपने पड़ोसी उच्चे आवाज़ी सेइं नमस्कार केरते,
तैसेरेलेइ ई लानत गनी गातीए।
15झ़ेड़रे दिहाड़े पैनेरे तेप्पु लगातार पेने,
ते झगड़ो केरनेबाली कौन्श दूईये अक्कां ज़ेरां आन;
16ज़ै तैस रोकी सके, तै हवाई भी रोकेलो ते देइने हथ्थे सेइं तै तेल ट्लालो।
17ज़ेन्च़रे लोंह लोंहे चमकाते,
तेन्च़रे मैन्हेरू तुत्तर अपने दोस्तेरे साथे सेइं चमकने बालू भोते।
18ज़ै फैगेरे बुट्टेरी हिफाज़त केरते तै तैसेरो फल खाते,
एन्च़रां सेइं ज़ै अपने मालिकेरी सेवा केरते तैसेरी आदर भोतीए।
19ज़ेन्च़रे पैनी मां तुत्तरेरी छाव तुत्तरे बांदू केरतीए,
तेन्च़रे मैन्हेरो मन मैन्हु बांदू केरते।
20ज़ेन्च़रे पाताल ते विनाश लोक,
तेन्च़रे मैन्हेरी एछ़्छ़ी भी रज़्ज़न न।
21ज़ेन्च़रे चैंदरे लेई कुठाली ते सोन्नेरे लेई भेट्ठी आन,
तेन्च़रे मैन्हेरे लेई तैसेरी तारीफ़े।
22चाहे तू बेवकूफे अन्नेरे मझ़ाटे उखले मां छ़ेडतां मसाले सेइं पीहस,
तांभी तैसेरी बेवकूफी नईं गानेबाली।
23एपनी भैड्डां-छ़ेल्ली केरि हालत रोड़ेच़ारे मन लेइतां बुझ़,
ते अपने सब जानबरां केरे केन्नी केरि हेर-गेश रोड़ेच़ारे केर;
24किजोकि जाईदात हमेशा न राए;
ते कुन राज़मुकुट पीढ़ी करां पीढ़ी तगर बनोरू रहते?
25कटोरो घास सल्लो गाते ते नंव्वो घास लेइहोते
ते पहाड़ां केरि हरियाली केटतां अकोट्ठी की गाचे;
26तैखन भैड्डां केरे बच्चां केरि उन्ना तेरे लिगड़ां केरे लेई भोल्ही,
ते किछ थाव्वे बेच़नेरे ज़िरिये नंव्वे उडारेरी कीमत दित्ती गाली;
27ते छ़ेल्लन कां एत्रू दुद्ध भोल्हु कि तू अपने टब्बरे समेत पेट भेरतां पीलो,
ते तेरी नौकरैनी भी ज़िन्दगरो गुज़ारो भोल्हो।
Currently Selected:
कहावतां 27: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
