कहावतां 25
25
सुलैमानेरी होरि भी ज्ञानेरी गल्लां
1सुलैमानेरी कहावतां इना भी आन;
ज़ैना यहूदारे राज़े हिजकिय्याहेरे अधिकारी लोकेईं नकल कियोरी थी।
2परमेशरेरी आदर, छ़पोरे रखने मांए
पन राज़ां केरि आदर छ़पोरी गल्लां केरो पतो लाने सेइं भोतीए।
3सुर्गेरी ऊँचाई ते धेरतरो डुग्घार
ते राज़ां केरो मन, इन ट्लेइयां केरो अन्त न मैल्हे।
4चैंदी मरां मैल दूर केरने पुड़ तै सुनारेरे लेई कम्मेरी भोइ गातीए।
5तेन्च़रे, राज़ेरे सामने सेइं दुष्टन कढने पुड़ तैसेरो तखत धर्मेरे वजाई सेइं कायम भोल्हो।
6राज़ेरे सामने अपनि बडीयाई न केरां
ते अधिकारी लोकां केरे ठारी खड़ो न भोइयां;
7तैन केरे लेई तीं सेइं इन ज़ोनू बड़ू रोड़ूए कि,
“इड़ी मीं कां एइतां बिश” ताके प्रधानां केरे सामने तीं बेइज़्ज़त न भोनू पे।
8ज़ैन किछ तीं लाहेरूए, तैन लूशी आदालती मां न आन,
आखरी मां ज़ैखन तेरो पड़ोसी#25:8 पड़ोसी होरो गवाह तीं शरमिन्दो केरेलो त तू कुन केरेलो?
9अपने पड़ोसी सेइं बेंस अकैल्ले मां केरनी
ते बखलेरो भेद नईं खोल्लनो;
10एरू न भोए कि शुन्ने बालो तेरी भी निन्दा केरे,
ते तेरी निन्दा बनोरी राए।
11ज़ेन्च़रे चैंदरे टोकरन मां सोन्नेरां च़ोइयां भोन,
तेन्च़रे ठीक वक्ते पुड़ ज़ोवरी गल्लां भोतिन।
12ज़ेन्च़रे सोन्नेरी नथ ते कुन्दनेरो गेहनो रोड़ो लगते,
तेन्च़रे मन्नेबालेरे कन्ने मां अक्लमन्देरी डांट भी रोड़ी लगतीए।
13ज़ेन्च़रे कटनेरे वक्ते हिंवेरी ठंडी सेइं,
तेन्च़रे भरोसेरे काबल दूते सेइं भी,
मालिकेरो मन ठंडो भोते।
14ज़ेन्च़रे बिदलार ते हवा बगैर बखने बेफैइदी भोतन,
तेन्च़रे झूठ-मूठ दान देनेबाली बडीयाई केरनी भोतीए।
15सबर केरने सेइं न्याय केरनेबालो मनाव गाते,
ते नर्म शब्द हेड्डन भी ट्लोड़ते।
16कुन तीं माछ़ी मैल्हू? त ज़ेत्रू तेरे लेई ठीक भोए एत्रू खानू,
एरू न भोए कि जादे खेइतां तैस उतारस।
17अपने पड़ोसेरे घरे मां बार-बार गाने करां अपने पव रोक,
एरू न भोए कि तै तंग भोइतां नफरत केरने लग्गे।
18ज़ै केन्चेरे खलाफ झूठी गवाही देते,
तै मन्ना हथोड़ो ते तलवार ते तिखो तीरे।
19आफतरे वक्ते धोखे केरनेबालेरो भरोसो,
ट्लुटोरे दंत या गिशकोरे पव्वे#25:19 गिशकोरे पव्वे लैंगड़ो बराबरे।
20ज़ेरो हिवंतड़ेरे दिहाड़न मां केन्चेरां लिगड़ां खोलना या ज़खमे पुड़ सिरको छ़डनो भोते,
तेन्च़रे परेशान मने बालेरे सामने गीत ज़ोनू भोते।
21अगर तेरो बैरी ढ्लुखोरो भोए त तैस रोट्टी खुवानी;
ते अगर तै ट्लिशोरो भोए त तैस पानी पियानू;
22किजोकि एन्च़रां तू तैसेरे दोग्गे पुड़ शरमरो मूरां केरो ढेर छ़डेलो,
ते यहोवा तीं इसेरो फल देलो।
23ज़ेन्च़रे उत्तरी हवा झ़ड़ी आनतीए,
तेन्च़रे चोगली केरने सेइं तुत्तरे पुड़ सरक पेई गातीए।
24खुल्ले डुल्ले घरे मां लड़ाई केरनेबाली कौन्शी सेइं राने करां लाएरे कूने पुड़ रानू ठीके।
25दूर मुल्खे मरां खुशरी खबर,
ट्लिशोरे लेई ठंडे पैनेरू ज़ेरूए।
26ज़ै धर्मी दुष्टेरे ज़ोने मां एइते,
तै खराब नाले ते बिगड़ोरे कुण्डेरो ज़ेरोए।
27ज़ेन्च़रे बड़ू माछ़ी खानू रोड़ू नईं,
तेन्च़रे अपनि तारीफ़ केरनी भी रोड़ी नईं।
28ज़ेसेरी आत्मा कैबू मां नईं तै एरे नगरेरो ज़ेरोए ज़ेसेरी दिवार घेरो देइतां ट्लोड़ी जेवरी भोए।
Currently Selected:
कहावतां 25: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
