कहावतां 20
20
1दाछ़रो रस मज़ाक बनानेबालो ते शराब हैल्लो मच़ाने बालीए;
ज़ै कोई तैसेरे वजाई सेइं टेपलोते, तै अक्लमन्द नईं।
2राज़ेरी सरक, शेरेरे गरज़नेरे ज़ेरिए;
ज़ै तैस सरकाते तै अपने प्राणे गुवाते।
3मुकदमे करां हथ खड़ो केरनो, मड़देरी इज़्ज़त ठहरतीए;
पन सब बेवकूफ लड़ने जो तियार भोतन।
4आलसी मैन्हु ठंडरे वजाई सेइं दांत न लाए;
एल्हेरेलेइ कटनेरे वक्ते तै भीख मगते, ते तैस किछ न मैल्हे।
5मैन्हेरे मने मां योजना डुग्घे पैनेरी ज़ेरिए,
फिर भी समझ़ी बालो मैन्हु तैस कढते।
6बड़े मैन्हु अपने ईमानदार भोनेरो प्रचार केरतन;
पन सच़्च़ो मैन्हु कौन हासिल केरि सकते?
7तै मैन्हु ज़ै अपने ईमानदैरी पुड़ च़लते,
तैसेरां मट्ठा ज़ैना तैस पत्ती च़लतन, तैना धन भोतन।
8राज़ो ज़ै न्यायेरे तखते पुड़ बिशते,
तै एपनी नज़री सेइं सब बुराई परखते।
9कौन ज़ोई सकते कि मीं अपनो दिल पवित्र कियो;
ते कने अवं पापे करां शुद्ध भोवरोईं?
10घटते-बद्धते तोल ते घटते-बद्धते हैटी इन दूईयन सेइं यहोवा नफरत केरते।
11मट्ठू भी अपने कम्मन सेइं पिशानू गाते,
कि तैसेरू कम पवित्र ते सिद्धू आहे, या नईं।
12शुन्नेरे लेई कन ते हेरनेरे लेई एछ़्छ़ी भोतिन,
तैना दूईये यहोवा बनेवरिन।
13निड्ली सेइं प्यार न रख, नईं त गरीब भोइ गालो;
एछ़्छ़ी खोल्ल तैखन तू रोट्टी खालो।
14घिन्नेरे वक्ते गाक, “रोड़ू नईं, रोड़ू नईं,” ज़ोते;
पन च़ले गानेरां बाद बडीयाई केरते।
15सोन्नू ते बड़े कीमती मोती त आन;
पन ज्ञानेरी गल्लां कीमती मणि ठहरोरिन।
16कोन्ची परदेशेरे लेई ज़मानत देनेबालेरां लिगड़ां ने ते बखलेरे लेई ज़ै जुवाब दह भोए तैस करां बन्धेरी चीज़ नेइतां रख।
17दगे सेइं हासिल कियोरी रोट्टी मैन्हु मिट्ठी त लगतीए,
पन बादे मां तैसेरू आशी सिक्कन सेइं भेरोई गाते।
18सब खियाल सलाही सेइं टिकोरे रहतन;
ते योजना सेइं साथी जंग कियोरी लोड़े।
19ज़ै चोगली केरतो फिरते तै भेद बांदो केरते;
एल्हेरेलेइ बकवास केरनेबाले सेइं मेल जोल न रेखथ।
20ज़ै अपने अम्मा-बाजी कोसते,
तैसेरो दीयो हिशते, ते बड़ू आंधरू भोइ गाते।
21ज़ै हिस्सो पेइलो जल्दी मैलते,
आखरी मां तैस पुड़ बरकत न भोए।
22न ज़ो, “अवं बुरैइयरो बदलो घिन्नेलो;”
बल्के यहोवा बलगतो रा, तै तीं छुटालो।
23घटते-बद्धते तोलन सेइं यहोवा नफरत केरते,
ते धोखेरी ट्लकड़ी रोड़ी नईं।
24मैन्हु केरि बत यहोवारे तरफां ठहराई गातीए;
मैन्हु अपनि बत केन्च़रे सेमझ़ी सकेलो?
25ज़ै मैन्हु बगैर विचार केरतां कोन्ची चीज़ी परमेशरे जो देनेरो वाधो केरे,
ते ज़ै मिन्नत मेनतां पुछ़ ताछ केरे, तै फंदे मां फसेलो।
26अक्लमन्द राज़ो दुष्टन छ़टते,
ते तैन पुड़ मडनेरो पेइहो च़लावाते।
27मैन्हेरी आत्मा यहोवारो दीयो आहे;
तै मनेरी सब गल्लां केरि तोप केरते।
28राज़ेरी हिफाज़त महरबानी ते सच़्च़ाइयरे वजाई सेइं भोतीए,
ते महरबानी केरने सेइं तैसेरो तखत बनोरो रहते।
29जुवाना केरि शोभा तैन केरि ताकते,
पन बुढां केरि शोभा तैन केरे सुफेद बाल भोतन।
30चोट लग्गने सेइं ज़ैना ज़खम भोतन, तैना बुराई दूर केरतन;
ते मार खाने सेइं मन शुद्ध भोइ गाते।
Currently Selected:
कहावतां 20: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
