मरकुस 7
7
रीति रुवाज़ ते नियम
(मत. 15:1-9)
1एक्की दिहाड़े किछ फरीसी लोक त कने शास्त्री लोकन मरां किछ लोक, ज़ैना यरूशलेम नगरेरां एवरे थिये यीशुए कां अकोट्ठे भोए। 2ते तैनेईं हेरू कि यीशुएरे किछ चेले रीति रुवाज़ेरे खलाफ अधोए हथ्थन सेइं रोट्टी खेइ राओरेन। 3किजोकि फरीसी लोक त कने सारे यहूदी लोक, ज़ांतगर हथ न धोन तांतगर रोट्टी न खाते थिये। अपने बुज़ुर्गां केरि परमपरा च़लानेरे लेई तैना एन्च़रां केरते थिये। 4ज़ैखन तैना बज़ारेरां घरे एइते थिये, ज़ांतगर तैना निहान न देन तांतगर रोट्टी न थिये खाते। होरे भी बड़े रीति रुवाज़ थिये, ज़ैना तैन केरे बुज़ुर्गन करां एवरे थिये, ज़ेन्च़रां कटोरे, घड़े, ट्लामरां भांडां रुवाज़ेरे मुताबिक धोना। 5एल्हेरेलेइ फरीसी लोकेईं त कने शास्त्री लोकेईं यीशु पुछ़ू, “तेरे चेले इश्शे बुज़ुर्गां केरि परमपरा पुड़ की न च़लन? पन तैना रुवाज़ेरे खलाफ अधोए हथ्थन सेइं रोट्टी खातन!” 6तैखन यीशुए तैन सेइं ज़ोवं, “बड़े पेइले यशायाह नेबे तुश्शे ज़ेरे पाखंडी केरे बारे मां ठीक भविष्यिवाणी कियोरीए कि परमेशरे ज़ोवं,
‘एना लोक ऐशी सेइं त मेरी बड़ी तारीफ़ केरतन,
पन एन केरे दिल मीं करां बड़े दूर आन।
7एना बेफैइदी मेरी आराधना (पूज़ा) केरतन,
किजोकि एना त मैन्हु केरि बनोरी परमपरान, परमेशरेरे हुक्मां केरे ज़ेरे लोकन शिक्षा देतन।’”
8तैखन यीशुए तैन सेइं ज़ोवं, “तुस भी तैन लोकां केरे ज़ेरे आथ, ज़ैना परमेशरेरे हुक्मन टेलतां मैन्हु केरि बनेवरी परमपरान मनतन, ज़ेन्च़रां घड़े त कने कटोरे रुवाज़ेरे मुताबिक धोने, त कने एसेरे ज़ेरे होरे भी बड़े रूवाज़न मन्तथ।” 9फिरी तैनी तैन सेइं ज़ोवं, “तुस केत्रू गलत केरतथ, कि अपने रीति-रुवाज़ मन्नेरे लेई परमेशरेरे हुक्म ट्लोड़तथ। 10किजोकि मूसा नेबे ज़ोवरूए कि, परमेशरे सारे मैन्हन ई हुक्म दित्तो कि, ‘तू अपने हाज बव्वेरी इज़्ज़त केर। त ज़ै कोई अपने हाज बव्वे जो बुरू ज़ोलो, तै ज़रूर मारो गालो।’ 11पन तुस ज़ोतथ कि अगर कोई मैन्हु अपने हाज बव्वे सेइं सिर्फ एन ज़ोए, त तैन बड़ू आहे कि, ‘मीं करां ज़ै किछ मद्दत तुसन मैल्ही सकती थी, तै पेइली बलिदान भोवरीए, यानी परमेशरे जो च़ढ़तल च़ाढ़ोरीए। एल्हेरेलेइ, अवं तुसन किछ न देइ सेखी।’ 12एरी शिक्षा देइतां तुस लोकन तैन केरे हाज बव्वां केरि किछ मद्दत केरने न देथ। 13एन्च़रां तुस अपनि परमपरा च़लानेरे लेई, परमेशरेरी गल्लां टेली छ़डतथ। एरी ज़ेरि तुस होरि भी बेड़ि गलत परमपरा मन्ते एवरेथ।”
मैन्हु ज़ुट्ठो केरनेबैली गल्लां।
(मत. 15:10-20)
14तैखन यीशुए फिरी सारे लोक एप्पू कां कुजेइतां तैन सेइं ज़ोवं, “तुस सारे लोक, मेरी गल ध्याने सेइं शुना ते समझ़ा। 15एरी कोई चीज़ नईं ज़ै बेइरां मैन्हेरे अन्तर गेइतां तैस ज़ुट्ठो केरे। पन ज़ैना बुरी चीज़ां मैन्हेरे अन्तरां, यानी तैसेरे दिले मरां बेइर निस्चन, तैन्नां तैस ज़ुट्ठो केरचन। 16अगर कोई समझ़नो चाते, त तै ध्याने सेइं शुने!”
17बादे मां, यीशु मैन्हु केरि भीड़ी मरां घरे जो जेव। तैखन तैसेरे चेलेईं तैस मिसालारे मतलबेरे बारे मां तैस पुछ़ू। 18तैनी तैन सेइं ज़ोवं, “होरि मैन्हु केरे ज़ेरे कुन तुस भी न समझ़थ? कुन तुस न समझ़थ कि ज़ै चीज़ बेइरां मैन्हेरे अन्तर गाचे, तै तैस ज़ुट्ठो न केरि सके? 19किजोकि तै तैसेरे दिले मां नईं, पन तैसेरे पेटे मां गाचे ते बादे मां पेटे मरां निस्सी गाचे!” एन ज़ोइतां यीशुए समझ़ावं कि खानेरी चीज़ कोई भी असन ज़ुट्ठो न केरे।
20तैखन तैनी अपने चेलन सेइं ज़ोवं, “ज़ैन मैन्हेरे अन्त्रेरां निस्ते, तैन्ने परमेशरेरी नज़री मां मैन्हु ज़ुट्ठो केरते, 21किजोकि मैन्हेरे अन्त्रेरां, यानी मैन्हेरे दिले मरां बुरे खियाल, बदमाशी, च़ोरी, कत्ल केरनो, 22अड्लाहे देइने गलत कम केरनू, लालच़, दुष्ट कम केरनू, बेइमानी, बदचलन, जलन, तुहीन, घमण्ड, ते बेवकूफी एच्चन। 23एना सैरी बुरी गल्लां मैन्हेरे अन्त्रेरां, यानी दिले मरां निस्तां मैन्हु ज़ुट्ठो केरचन।”
गैर-यहूदी कौमरे कुआन्शरो विश्वास
(मत. 15:21-28)
24तैल्ला पत्ती, यीशु तैट्ठां निस्तां सूर त सैदा नगरेरे आसे पासेरे इलाकेरे नेड़े अव। ते तैड़ी तै एक्की घरे मां जेव। ते तै चातो थियो कि कोई न ज़ैनी सके कि अवं इड़ी आईं। पन तै छ़ेप्पी न सको। 25तैड़ी अक कुआन्श थी, ज़ेसेरी निकड़ी कुइये पुड़ भूतेरो सायो थियो। तै यीशुएरे बारे मां शुन्तां अकदम तैड़ी आई ते तैसेरे पव्वन पुड़ पेई। 26त तै कुआन्श गैर कौमरी थी ते सुरूफिनिकी इलाकेरी थी। तैसां यीशु सेइं मिन्नत की कि, “मेरी कुइये पुड़ेरां भूतेरो सायो केढी देथ।” 27पन यीशुए तैस सेइं ज़ोवं, “पेइले बच्चन रज़ने दे, किजोकि बच्चां#7:27 एस कहावती मां, यीशु यहूदी लोकां केरि तुलना बच्चन सेइं केरते, त गैर यहूदी लोकां केरि तुलना कुतरन सेइं केरते। तैस कुआन्शारे विश्वासेरी अज़मैइश केरनेरे लेई यीशुए एन्च़रां ज़ोवं। केरि रोट्टी नेइतां कुतरन जो देनी ठीक नईं!” 28तैसां जुवाब दित्तो, “सच़्च़े, प्रभु! पन कुतरां भी मेज़े हेठोरां बच्चां केरि रोट्टन मरां बिछ़ड़ोरे टुक्ड़े खातन।” 29तैखन यीशुए तैस सेइं ज़ोवं, “मीं पुड़ तीं एत्रो विश्वास रखोरोए, एल्हेरेलेइ तू आरामे सेइं घरे जो गा। तेरी कुइये मरां भूतेरो सायो निस्सी जेवरोए।” 30तैसां कुआन्शां तैट्ठां अपने घरे वापस एइतां हेरू कि कुई खट्टी पुड़ आरामे सेइं झ़ुल्लोरी थी, त भूतेरो सायो तैस मरां निस्सी जोरो थियो।
यीशु एक्की मैन्हु ठीक केरते, ज़ै टोव्नो त कने खेख्खो थियो।
31यीशु फिरी अपने चेलन सेइं साथी सूर त सैदारे नगरेरे इलाकन मरां निस्तां, दिकापुलिस इलाके मांमेइं भोइतां गलील समुन्दरेरे नेड़े पुज़्ज़ो। 32तैड़ी किछ लोकेईं अक टोव्नो मैन्हु, ज़ै खेख्खो भी थियो, यीशु कां एन्हतां तैस सेइं मिन्नत की कि, “तू अपनो हथ एस पुड़ रख कि ऐह मैन्हु बेज़्झ़ोए।” 33यीशुए मैन्हु केरि भीड़ी मरां तै मैन्हु अलग नियो। तैखन तैनी अपनि एंगलोई तैस मैन्हेरे कन्न मां छ़ेड्डी, त अपनि एंगलोई सेइं थुक तैस मैन्हेरी ज़िभी सेइं लावं। 34तैल्ला पत्ती, यीशु अम्बरेरे पासे तेकतां ओशा छ़डो, त तैस मैन्हु सेइं अपनि (इब्रानी) भाषाई मां ज़ोवं, “इप्फत्तह!” ज़ेसेरो मतलब “खुल्ली गा!” 35अकदम तै रोड़ेच़ारे शुन्ने लगो ते तैसेरी ज़िभ भी ठीक भोइ जेई, ते तै साफ-साफ गल्लां केरने लगो। 36तैखन यीशुए तैन मैन्हन हुक्म दित्तो कि, “ऐह गल केन्ची सेइं न ज़ोइयथ।” पन ज़ेत्रू जादे यीशुए तैन्न हुक्म दित्तोरो थियो, तेत्रू जादे तैना होरि लोकन ऐह गल शुनाने लग्गे। 37यीशुएरे चमत्कारेरां कम्मां केरे वजाई सेइं, तैना बड़े हैरान भोइतां ज़ोने लग्गे, “कमाल आहे! यीशुए ज़ैन किछ भी कियूं सब किछ रोड़ू कियोरूए! तै टोव्नन शुन्नेरी ते लट्टन गल्लां केरनेरी शक्ति देते।”
Currently Selected:
मरकुस 7: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
