मरकुस 5
5
यीशु एक्की मैन्हु मरां बड़े भूतां केरो सायो कढते।
(मत. 8:28-34;लूक. 8:26-39)
1यीशु त तैसेरे चेले गलील समुन्दरेरे पार, गिरासेनी इलाके मां पुज़्ज़े। 2ज़ैखन यीशु किश्ती पुड़ेरां ओस्सो, त तैखन अक मैन्हु, ज़ैस पुड़ भूतां केरो सायो थियो, कब्रन मांमेइं यीशु कां मिलने अव। 3तै मैन्हु कब्रस्ताने मां रहतो थियो। (तै मैन्हु बड़ो खतरनाक थियो।) कोई तैस शंगली सेइं भी न बेन्धी सकतो थियो। 4किजोकि (पेइले बड़े बार) लोकेईं तैसेरे हथ पव शंगलन सेइं बन्धोरे थिये। पन हर बार तै हथ्थां केरि शंगलां ट्लोड़तो थियो त पव्वां केरि शंगलां केरे टुक्ड़े-टुक्ड़े केरतो थियो। कोई तैस कैबू न केरि सकतो थियो। 5तै हमेशा रात-दिहाड़ी कब्रस्ताने मां त कने पहैड़न पुड़मेइं हंठतो थियो त चिन्डां मारतो थियो, त अपने आपे घोड़न सेइं ज़खमी केरतो थियो।
6ज़ैखन तैनी मैन्हे यीशु दूरेरां लाव, त तै दौड़तां यीशु कां अव ते तैस कां मथ्थो टेको। 7-8यीशुए भूते सेइं ज़ोवं, “हे भूता, एस मैन्हु मरां निस्सी गा!” तैनी भूते ज़ोरे सेइं चिन्डां मेरतां ज़ोवं, “हे यीशु, परमप्रधान परमेशरेरा मट्ठा, मीं तीं सेइं कुन कम? अवं तीं परमेशरेरी कसम देताईं, मीं दुख न दे।” 9एल्हेरेलेइ यीशुए तैस पुछ़ू, “तेरू कुन नवं आहे?” तैनी यीशु सेइं ज़ोवं, “मेरू नवं फौज आहे, किजोकि अस बड़े आम।” 10तैखन तैनी यीशु कां बड़ी मिन्नत की, “इस इलाके मरां असन बेइर न भेज़।” 11तैड़ी पहैड़ी पुड़ सूरां केरो अक बड़ो घान च़ेरि राहोरो थियो। 12तैल्हेरेलेइ तैन भूतेईं यीशु कां मिन्नत की, “महरबानी केरतां असन उन सूरन मां भेज़ी दे ताके अस उन मां गाम!” 13तैखन यीशुए तैन्न, सूरन मां गानेरी अज़ाज़त दित्ती, त तैना भूतां तैस मैन्हु मरां निस्तां सूरन मां जेआं। तैखन सूरां केरो घान, ज़ैस मां लगभग दूई हज़ार सूर थिये, टिब्बे पुड़ेरां बिछ़ड़तां अकदम समुन्दरे मां डुबतां मेरि जे। 14ज़ैखन सूरां केरे च़ारनेबालेईं एन हेरू, त तैना डेरि जे। तैनेईं तैट्ठां नेशतां नगरे मां त कने आसे पासेरे ड्लाव्वन मां ऐह खबर शुनाई। तैल्हेरेलेइ लोक एप्पू हेरनेरे लेई तैड़ी आए। 15ज़ैखन नगरेरे लोक यीशु कां पुज़्ज़े, त तैस मैन्हु, ज़ैस मां पेइले भूतां केरि फौजेरो सायो थियो, हुनी लिगड़ां लग्गोरे त कने होशी मां लेइतां डेरि जे। 16ज़ैनेईं तैना गल्लां पेइले लेवरी थी, तैनेईं तैस मैन्हेरे बारे मां ज़ैस पुड़ भूतेरो सायो थियो त कने तैन सूरां केरे बारे मां पूरो हाल लोकन शुनाव। 17तैना यीशु कां मिन्नत केरतां ज़ोने लग्गे कि, “इश्शे इलाके मरां च़ेलि गा!”
18ज़ैखन यीशु वापस गानेरे लेई किश्ती मां च़ढ़ने लगो, त तैनी मैन्हे ज़ैस मां पेइले भूतां केरो सायो थियो, यीशु कां मिन्नत की कि, “मीं एप्पू सेइं साथी च़लने दे।” 19पन यीशुए तै एप्पू सेइं साथी च़लने न दित्तो। पन तैनी तैस सेइं ज़ोवं, “अपने घरे जो गा त कने अपने लोकन सेइं ज़ो, कि प्रभु परमेशरे तीं पुड़ दया केरतां तेरे लेई केत्रू बड्डू कम कियोरूए।” 20एल्हेरेलेइ तै मैन्हु गेइतां दिकापुलिस इलाके मां लोकन शुनाने लगो कि यीशुए मेरे लेई केत्रू बड्डू कम कियोरूए। सारे लोक ऐह गल शुन्तां हैरान भोइ जे।
यीशु याईर नंव्वेरे मैन्हेरी कुई ते बिमार कुआन्श।
(मत. 9:18-26;लूक. 8:40-56)
21तैल्ला पत्ती, यीशु फिरी किश्ती मां गलील समुन्दरेरे इस पासे वापस अव, त मैन्हु केरि बड़ी भीड़ तैस कां अकोट्ठी भोइ। यीशु समुन्दरेरे बन्ने पुड़ थियो। 22तैखन याईर नंव्वेरो मैन्हु तैड़ी अव, ज़ै यहूदी लोकां केरे प्राथना घरेरे प्रधान्न मरां अक थियो। ज़ैखन तैनी यीशु लाव, त तैसेरे पव्वन पेव। 23तैनी एन ज़ोइतां यीशुए सेइं बड़ी मिन्नत की, “मेरी निकड़ी कुई मरनेबाली आहे। तू मीं सेइं साथी एइतां तैस पुड़ अपनो हथ रख, ताके तै बेज़्झ़ोस ते ज़ींती राए।” 24एल्हेरेलेइ यीशु तैस सेइं साथी तैसेरे घरे जेव।
मैन्हु केरि अक बड़ी भीड़ यीशु पत्ती च़ली, इड़ी तगर कि लोक यीशु पुड़ बिछ़ड़ते थिये। 25तैस भीड़ी मां अक कुआन्श भी थी, ज़ैस 12 सालां केरि खून च़लनेरी बिमारी थी। 26तैसां बड़े बेइदन करां बड़ो दुख झ़ैल्लो। बिमारी ठीक भोनेरे लेई तैसां अपने सब पेइंसे खेर्च़ी दित्ते, पन तैस कोई फैइदो न भोव। पन तै होरि भी जादे बिमार भोइ जेई। 27-28तै यीशुएरे बारे मां शुन्तां अपने दिले मां ज़ोती थी, “अगर अवं सिर्फ तैसेरे लिगड़े सेइं हथ लाएली, त अवं बेज़्झ़ोईं गाली।” एल्हेरेलेइ तै मैन्हु केरि भीड़ी मां यीशुएरे पत्रेवरां आई ते तैसेरे लिगड़े सेइं हथ लाव। 29ज़ैखन तैसां यीशुएरे लिगड़े सेइं हथ लाव, त अकदम तैसेरो खून च़लनेरी बिमारी बेज़्झ़ोईं। तैसां अपनि जानी मां बुझ़ू कि अवं तैस बिमारी करां बेझ़ोरी आईं। 30यीशुए अकदम बुझ़ू कि मीं मरां शक्ति निस्सोरीए। एल्हेरेलेइ तैनी मैन्हु केरि भीड़ी मां च़ेवरे पासन मुड़तां लोकन पुछ़ू, “मेरे लिगड़े सेइं केनि हथ लाव?” 31तैसेरे चेलेईं तैस सेइं ज़ोवं, “तू हेरतस कि मैन्हु केरि भीड़ तीं पुड़ बिछ़ड़ने लग्गोरी, फिर भी तू किजो पुछ़तस कि ‘केनि मीं सेइं हथ लाव?’” 32पन यीशु तैस हेरनेरे लेई, ज़ैनी एरू कियोरू थियूं, च़ेवरे पासन तकने लगो। 33तैखन तै कुआन्श डरती ते थर्कती थी, किजोकि तै ज़ानती थी कि तैसां मूसेरो कानून ट्लोड़रोए। तै अग्गर आई ते यीशुएरे पव्वन पुड़ बिछ़ड़तां, तैस सेइं सैरी गल्लां सच़-सच़ ज़ोने लग्गी। 34पन यीशुए तैस सेइं ज़ोवं, “हे कुइये, तेरे विश्वासे, ज़ै तीं मीं पुड़ रखोरो, तैनी तू बझ़ाई। खुशी सेइं घरजो गा, ते हुनी तू एस बिमारी करां बेंच़ी जेई।”
35ज़ताली यीशु ई गल मसां ज़ोई राओरो थियो, तैखन प्राथना घरेरे लीडरेरे घरेरां किछ मैन्हेईं एइतां तैस सेइं ज़ोवं, “तेरी कुई मेरि जेवरीए, हुनी गुरू किजो तकलीफ देतस?” 36पन यीशुए तैन केरि गल न शुन्तां प्राथना घरेरे लीडरे सेइं ज़ोवं, “न डर। सिर्फ मीं पुड़ विश्वास रख।” 37यीशु ते याईर च़लने लग्गे, पन यीशुए पतरस, याकूब ते तैसेरो ढ्ला यूहन्नारे अलावा, होरो कोई एप्पू सेइं साथी एजने न दित्तो। 38प्राथना घरेरे लीडरेरे घरे मां पुज़तां यीशुए हैल्लो मच़ोरो लाव ते कने लोक बड़े लेरां देते त शोग केरते लाए। 39तैखन यीशुए घरे मां गेइतां तैन सेइं ज़ोवं, “तुस किजो रोलो मच़ातथ त लेरां देतथ? कुई मर्री नईं, पन झ़ुल्लोरीए।” 40ज़ैखन तैन लोकेईं एन शुनू, त तैना तैसेरो मज़ाक बनाने लग्गे, किजोकि तैना ज़ानते थिये कि कुई मेरि जेवरीए। तैखन यीशुए सारे मैन्हु तैट्ठां केढतां, सिर्फ कुइअरे हाज-बव त कने अपने ट्लाई चेलन सेइं साथी कमरेरे अन्तर जेव, ज़ैड़ी कुई पेवरी थी। 41तैखन यीशुए कुइयरो हथ ट्लेइतां तैस सेइं अपनि भाषाई मां ज़ोवं, “तलीता कूमी!” ज़ेसेरो मतलब कि, “हे निकड़ी कुइये, अवं तीं सेइं ज़ोताईं, खड़ी उठ!” 42अकदम कुई उठतां च़लने फिरने लग्गी, किजोकि तै कुई 12 सालां केरि थी। एन हेरतां तैना बड़े हैरान भोए। 43पन यीशुए तैन हुक्म देइतां ज़ोवं कि, “ऐह गल केन्ची सेइं न ज़ोइयथ। एस कुइये किछ खाने जो देथ।”
Currently Selected:
मरकुस 5: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
