मरकुस 13

यीशु ज़ोते कि यरूशलेम नगरेरे मन्दरेरो नाश भोइ गानोए।

(मत. 24:1-2;लूक. 21:5-6)

1ज़ैखन यीशु त तैसेरे चेले मन्दरे मरां निस्सी राओरे थिये, तैखन तैसेरे चेलन मरां एक्‍के तैस सेइं ज़ोवं, “हे गुरू, इड़ी हेर! केत्रे बड्डे-बड्डे घोड़न सेइं बनोरी दिवारां कने केत्रू रोड़े भवन आहे!” 2यीशुए तैन सेइं ज़ोवं, “हुन्ना त तुस एना बड्डे-बड्डे घोड़न सेइं बनोरे भवनन लहतथ, पन एक्‍की दिहाड़े इड़ी घोड़े पुड़ घोड़ भी न रालो, यानी सब नाश भोइ गालू!”

आखरी दिहाड़ां केरे निशान

(मत. 24:3-14;लूक. 21:7-19)

3तैल्‍ला पत्ती, यीशु ज़ैतून नंव्वेरे पहैड़ी पुड़ च़ेढ़तां पार मन्दरेरे सामने बिश्शो। तैखन पतरस, याकूब, यूहन्ना ते अन्द्रियास यीशु कां अलग गेइतां तैस केरां पुछ़ने लग्गे, 4“असन ज़ो कि एना गल्‍लां केइस भोनिन? तैन दिहाड़ी केरो कुन निशान आहे, ज़ैखन एना सब गल्‍लां पूरी भोनिन?” 5तैखन यीशु तैन सेइं ज़ोने लगो, “खबरदार राथ कि कोई तुसन धोखो न दे। 6किजोकि बड़े मैन्हु मेरे नंव्वे सेइं एइतां ज़ोले कि, ‘अवं मसीह आईं।’ ते तैना बड़े मैन्हु धोखो देले। 7ज़ैखन तुस लड़ाई ते कने लड़ाइयां केरि अफवाह शुनेले, त तुस घबरेइयथ न, किजोकि लड़ाइयां केरू भोनू ज़रूरी आहे, पन एस दुनियारो अन्त अकदम न भोल्हो। 8किजोकि एक्‍की ज़ातरे लोक होरि कौमरे लोकां केरे खलाफ लड़ाई केरले, त अक मुल्ख होरि मुल्खेरे खलाफ लड़ाई केरेलो। हर ठैरी भुंज़ल एज्जेले, त काल पेलो। एन सब त सिर्फ मुसीबतां केरि शुरुआत आहे।

9“पन तुस अपने बारे मां खबरदार राथ, किजोकि लोक तुसन सभां केरे हवाले केरले, प्राथना घरन मां नेइतां मडेले, त तुस मेरे वजाई सेइं गवर्नरन ते कने राज़न कां खड़े किये गाले, ताके तुस तैन केरे सामने मेरे गवाह भोथ। 10पन इस युगेरो अन्त भोनेरे पेइले एरू भोनू ज़रूरी आहे कि परमेशरेरे राज़्ज़ेरे बारे मां खुशखबरी सैरी कौमां केरे लोकन शुनेई गाए।”

11ज़ैखन लोक तुसन नेइतां आदालतां केरे हवाले केरले, त पेइले फिक्र न केरथ त न सोचथ कि अस कुन ज़ोमेले, पन ज़ैन किछ परमेशर तुसन तैस घड़ी ज़ोनेरे लेई ज़ोवं गालू, तैन्ने ज़ोइयथ। किजोकि ज़ोनेबाले तुस नईं, पन पवित्र आत्मा तुश्शे ज़िरिये ज़ोलो। 12ढ्ला (ज़ै मीं पुड़ विश्वास न केरे, तै) अपने ढ्लाए मारनेरे लेई हवाले केरेलो। त बाजी भी अपने मट्ठे तेन्च़रां हवाले केरेलो, ते बच्‍चे अपने हाज-बव्वेरे खलाफ भोइतां तैन्न मैरी छ़डेले। 13मीं पुड़ विश्वास केरनेरे वजाई सेइं सारे लोक तुसन सेइं नफरत केरले, पन ज़ै मरने तगर विश्वासे मां बनोरो रालो, तैस परमेशर मुक्ति देलो।

यीशु एजने बैली मुसीबतरे बारे मां ज़ोते।

(मत. 24:15-28;लूक. 21:20-24)

14तैल्‍ला पत्ती, यीशुए तैन सेइं ज़ोवं, “बड़ी बुरी गन्दी चीज़, ज़ै नाश केरचे, एजनेबाली आहे। तै भिट्टी चीज़ तैस जगाई पुड़ खड़ी भोल्ही, ज़ैड़ी तैसारू खड़ू भोनू जाइज़ नईं। बड़े पेइले दानिय्येल नेबे तैस चीज़रे बारे मां ज़ोवरू थियूं। (ज़ै कोई एन पढ़े, तै ऐह गल समझ़े।) ज़ैखन तुस तै चीज़ी तैड़ी खड़ी लाहेले, त तैखन ज़ैना लोक यहूदिया इलाके मां रहतन, तैना बच़नेरे लेई पहाड़न पुड़ नेश्शी गान। 15ते अगर कोई मैन्हु अपने घरेरे छती पुड़ भोल्हो, त तै अकदम तैट्ठां नेश्शी गाए, ते अपने घरेरां किछ नेने अन्तर न गाए (ताके वक्त बरबाद न भोए)। 16ते अगर कोई मैन्हु ऊडारे मां कम केरि राओरो भोल्हो, त तै भी अकदम तैट्ठां नेश्शी गाए। तै अपना लिगड़ां भी नेनेरे लेई पत्रोवं न एज्जे। 17तैन दिहाड़न मां ज़ैना दोज़ींती त दुद्ध पियाती कुआन्शां भोल्ही, तैन केरे लेई अफ़सोस! (किजोकि तैन केरे लेई बड़ी मुश्किल भोल्ही।) 18ते तुस प्राथना केरा कि एन हिवंतड़ेरे दिहाड़न मां न भोए। 19किजोकि तैन दिहाड़न मां लोकन बड़ी मुसीबत भोल्ही, कि दुनियारी शुरुआती करां देंती ज़ैन परमेशरे बनोरीए, अज़ तगर एरी मुसीबत नईं एवरी। ते एरी ज़ेरि मुसीबत फिरी कधी न भोल्ही।”

20“अगर प्रभु परमेशर तैन मुसीबतरे दिहाड़न न घटाए, त कोई मैन्हु भी न बच़ेलो। पन परमेशर अपने च़ुनोरे लोकां केरे वजाई सेइं तैन दिहाड़न घटालो। 21तैस मुसीबतरे दिहाड़न मां, अगर कोई तुसन सेइं ज़ोए कि, ‘तक्‍का, मसीह इड़ी आहे!’ या ‘तक्‍का, उड़ी आहे!’ त विश्वास न केरथ। 22किजोकि झूठे मसीह ते कने झूठे नबी एज्जेले। तैना लोकन धोखो देनेरे लेई निशान ते कने चमत्कारेरां कम्मां हिराले, कि अगर भोइ सके, त तैना परमेशरेरे च़ुनोरे लोकन भी धोखो देले। 23एल्हेरेलेइ, तुस होशियार राथ! हेरा, मीं तुसन सैरी गल्‍लां भोनेरे पेइले ही ज़ोवरिन।”

यीशुएरू दुबारां एजनू

(मत. 24:29-31;लूक. 21:25-28)

24तैल्‍ला पत्ती, यीशुए तैन सेइं ज़ोवं, “तैन दिहाड़न मां, तैस मुसीबतरे वक्तेरे पत्ती,

‘दिहाड़ो कालो भोइ गालो,

त चाँदनी लौ न देली,

25त अम्बरेरां तारे बिछ़ड़ने लग्गेले,

त अम्बरेरी सैरी शेक्ति#13:25 शेक्ति: मतलब कि शैतान त कने शैतानेरी दुष्ट फौज हिल्‍लेली।’”

26“तैखन लोक मैन्हेरे मट्ठे (यानी मीं) बड़ी शेक्ति त कने बड़ी महिमा सेइं साथी धेरती पुड़ जो बिदलारी मां एजते हेरेले। 27तैखन अवं अपने स्वर्गदूतन सारी दुनियाई मां भेज़तां धेरतरे हर पासेरां अपने च़ुनोरे लोकन अकोट्ठे केरेलो।”

फैगेरे बुट्टे करां अक सबक शिख्खा।

(मत. 24:32-35;लूक. 21:29-33)

28तैल्‍ला पत्ती, यीशुए तैन सेइं ज़ोवं, “फैगेरे बुट्टेरे मिसाली करां अक सबक शिख्खा! ज़ैखन तैसेरी डैलड़ी नर्म भोइतां, त नंव्वां पट्लां निसने लगतन, ते तुस बुज़्झ़ी छ़डतथ कि गेर्मेरो मौसम एजनेबालो आहे। 29एसेरो ज़ेरो, ज़ैखन तुस एना गल्‍लां, ज़ैना मीं ज़ोई, भोते हेरेले, त तुस बुज़्झ़ी छ़ड्डा कि मैन्हेरू मट्ठू, यानी अवं बड़े नेड़े पुज़ोरोईं। 30अवं तुसन सेइं सच़ ज़ोताईं कि ज़ांतगर एना सैरी गल्‍लां न भोल्ही, तांतगर एना लोक, ज़ैना हुन्ना ज़ीतेन, तैना न मरेले। 31अम्बर त कने धरती टेली गाली, पन मेरी गल्‍लां कधी न टेलेली।”

यीशुएरे वापस एजनेरे लेई तियार भोइ गाथ।

(मत. 24:36-44)

32तैल्‍ला पत्ती, यीशुए तैन सेइं ज़ोवं, “मेरे वापस एजनेरे दिहाड़ेरे बारे मां, या तैस वक्तेरे बारे मां कोई भी न ज़ाने कि तै कताली भोल्हो, सुर्गेरे स्वर्गदूते भी न ज़ानन त परमेशरेरू मट्ठू यानी अवं भी न ज़ैनी, पन सिर्फ मेरो बाजी परमेशर ज़ानते। 33एल्हेरेलेइ, मेरे वापस एजनेरे लेई हमेशा तियार राथ, ते प्राथना केरते राथ, किजोकि तुस न ज़ानथ कि तै वक्त कताली एज्जेलो। 34मैन्हेरे मट्ठेरू, यानी मेरू वापस एजनू तैस मैन्हेरू ज़ेरू आहे, ज़ै अपनु घर छ़ेडतां होरे मुल्खे जो गाते। गाने करां पेइले, तै अपने नौकरन कुजेइतां अपने घरेरी रखवाली केरनेरो अधिकार देते, ते हर एक्‍की अपनु-अपनु कम देते, त दारे पुड़ रखवाली केरनेरे लेई संत्री बींझ़ो रानेरो हुक्म भी देते, किजोकि तै कधी भी वापस एज्जी सकते।”

35“एसेरे ज़ेरे, तुस भी हमेशा मेरे वापस एजनेरे लेई तियार राथ, किजोकि तुस न ज़ानथ कि घरेरो मालिक यानी अवं कताली वापस एज्जेलो। शायद ड्लवझ़ी या एध्धी राती या कुकड़ेरे बांग देनेरे मौके या झ़ेज़्झ़ां। 36एल्हेरेलेइ तियार राथ! एरू न भोए कि अवं अचानक एइतां लेईं कि तुस तियार नईं। 37ज़ैन अवं तुसन सेइं ज़ोताईं, तैन्ने सारे मैन्हन सेइं भी ज़ोताईं कि, ‘हमेशा तियार राथ!’”

Currently Selected:

मरकुस 13: BHDNT

Highlight

Copy

Compare