मरकुस 1
1
यूहन्ना बपतिस्मो देनेबालेरो सन्देश।
(मत. 3:1-12;लूक. 3:1-18;यूह. 1:19-28)
1ई यीशु मसीहेरे बारे मां खुशखेबरारी शुरुआत आए, ज़ैन परमेशरेरू मट्ठू आए।
2(बड़े पेइले) यशायाह नेबे अपनि किताबी मां लिखोरू थियूं कि, (परमेशरे अपने मट्ठे सेइं ज़ोवं)
“शुन, अवं अपनो बिस्तार देनेबालो तीं करां पेइले भेज़ेलो।”
“तै तीं करां पेइलो गेइतां तेरे लेई बत तियार केरेलो। (यानी, लोकां केरे दिल परमेशरे लेई तियार केरेलो)”
3“तै बिस्तार देनेबालो सुनसान ठैरी मां लोकन, ज़ैना तैस कां गाले, तैन हक देइतां ज़ोलो कि
‘तुसन कां प्रभु एजनेबालोए, एल्हेरेलेइ तुस तैसेरेलेइ बत तियार केरा त कने
तैसेरेलेइ सड़कां सिद्धी केरा।’ (यानी, प्रभुएरे लेई तुस अपने दिल साफ केरा)”
4ज़ेन्च़रां लिखोरू थियूं, अक बिस्तार देनेबालो अव। तैस मैन्हेरू नवं यूहन्ना थियूं। लोक तैस जो बपतिस्मो#1:4 बपतिस्मो: मतलब कि, मैन्हु पापेरी ज़िन्दगी छ़ेडतां परमेशरेरी बत्ती पुड़ च़लनेरे लेई तियार भोते। देनेबालो भी ज़ोते थिये। तै यहूदिया इलाकेरे सुनसान ठैरी मां अव। तैड़ी तै लोकन परमेशरेरी गल्लां शुनातो थियो कि, “तुस अपने पापन करां मन फिराथ, त कने बपतिस्मो नेथ, ताके परमेशर तुश्शे पाप माफ़ केरे।” 5यहूदिया इलाकेरे बड़े लोक त यरूशलेम नगरेरे रानेबालन मरां बड़े लोक यूहन्नारी गल्लां शुन्नेरे लेई सुनसान ठैरी मां तैस कां आए। तैन लोकेईं अपने पाप मेनतां यूहन्ना करां यरदन दरियाए मां बपतिस्मो नियो।
6यूहन्ना आम लिगड़ां लातो थियो ज़ैना लिगड़ां ऊँटेरे बालन सेइं बनोरां थियां। तै अपनि कमरी पुड़ चमड़ेरू मज़ बंधतो थियो। ते तै टिट्टां त कने जंगलेरू माछ़ी खातो थियो। 7तै लोकन शुनातो थियो कि, “कोई अक, ज़ै मीं करां भी महाने, मेरे बाद एजनेबालोए। अवं त तैसेरो गुलाम भोनेरे काबल भी नईं कि लिकतां तैसेरे बूटेरे तसमे खोल्ली। 8अवं त तुसन पैनी सेइं बपतिस्मो देताईं, पन तै तुसन पवित्र आत्माई सेइं बपतिस्मो देलो”
यूहन्ना यीशुए बपतिस्मो देते।
(मत. 3:13;4:11;लूक. 3:21-22;4:1-13)
9तैल्ला पत्ती, तैन दिहाड़न मां एरू भोवं कि यीशु गलील इलाकेरे नासरत नगरेरां यूहन्ना कां अव। तैनी यूहन्ना करां यरदन दरियाए मां बपतिस्मो नियो। 10ज़ैखन यीशु बपतिस्मो नेइतां पैनी मरां बेइर अव, त तैनी अम्बर खुलतू त पवित्र आत्मा कबूतरेरी शक्ली मां तैस पुड़ एइतो लाव। 11तैखन परमेशरे सुर्गेरां यीशु सेइं ज़ोवं, “तू मेरू ट्लारू मट्ठू आस, अवं तीं पुड़ बड़ो खुश आईं।”
शैतान पाप केरनेरे लेई यीशुए अज़माते।
12तैल्ला पत्ती, अकदम पवित्र आत्मा यीशु सुनसान ठैरी जो भेज़ो। 13सुनसान ठैरी मां 40 दिहाड़न तगर शैताने यीशु अज़मव। त तैड़ी यीशु जंगली जानबरन साथी थियो। तैखन परमेशरेरे स्वर्गदूत यीशु कां एइतां तैसेरी सेवा केरने लग्गे।
यीशु अपने सेवारू कम शुरू केरते।
(मत. 4:12-17;लूक. 4:14-15)
14किछ वक्तेरां बाद, यूहन्ना नबी कैद कियो जेव। तैल्ला बाद, यीशु गलील इलाके मां जेव। तैड़ी तै लोकन परमेशरेरे राज़्ज़ेरे बारे मां खुशखबरी शुनाने लगो। 15तैनी ज़ोवं कि, “ठीक वक्त एवरोए त कने परमेशरेरू राज़ नेड़े एवरूए! एल्हेरेलेइ, तुस अपने पापन करां मन फिराथ ते इस खुशखेबरी पुड़ विश्वास केरा।”
यीशु च़ेवर मेछ़ली ट्लानेबालन कुजाते।
(मत. 4:18-22;लूक. 5:1-11)
16एक्सां, ज़ैखन यीशु गलील नव्वेंरे समुन्दरेरे बन्ने च़लोरो थियो, तैखन तैनी दूई मैन्हु शमौन त तैसेरो ढ्ला अन्द्रियास लाए, ज़ैना मेछ़ली ट्लानेबाले थिये। तैना मेछ़ली ट्लानेरे लेई समुन्दरे मां ज़ाल छ़ेड्डी राओरे थिये। 17यीशुए तैन सेइं ज़ोवं, “एज्जा मेरे चेले बना। अवं तुसन शिखालेलो कि केन्च़रां होरे मैन्हु मेरे चेले बनानेन।” 18अकदम तैना अपना ज़ालां छ़ेडतां यीशु पत्ती च़ले जे।
19ज़ैखन तैना थोड़े ज़ेरे अग्गर जे, त यीशुए याकूब त कने तैसेरो ढ्ला यूहन्ना लाहे। तैना दूईये जेब्देरां मट्ठां थियां। तैना किश्ती मां ज़ालां ठीक केरने लग्गोरे थियां। 20अकदम यीशुए तैना अपने चेले बनानेरे लेई कुजाए। तैना दूईये, अपने बाजी जब्दी किश्ती मां मज़दूरन सेइं साथी छ़ेडतां, यीशु सेइं साथी च़ले जे।
यीशु एक्की मैन्हु पुड़ेरां भूतेरो सायो कढते।
(लूक. 4:31-37)
21तैल्ला पत्ती, यीशु त तैसेरे चेले तैट्ठां कफरनहूम नगरे मां जे। आरामेरे दिहाड़े, अकदम यीशु तैन केरे प्राथना घरे मां जेव। तैड़ी तै परमेशरेरी गल्लां तैन लोकन शुनाने लगो। 22तैना यीशुएरी शिक्षा शुन्तां हैरान भोए, किजोकि तैनी शास्त्री लोकां केरि ज़ेरि शिक्षा न दित्ती, पन तै अधिकारे सेइं शिक्षा देइ राओरो थियो।
23ज़ैखन यीशु तैड़ी थियो, त तैन केरे प्राथना घरे मां अक मैन्हु थियो, ज़ैस पुड़ भूतेरो सायो थियो। 24अचानक तैनी मैन्हे चिन्डां मेरतां ज़ोवं, “हे नासरत नगरेरो यीशु! तीं सेइं असन कुन कम? कुन तू असन नाश केरनेरे लेई एवरोस? अवं ज़ानताईं कि तू कौन आस, तू परमेशरेरू पवित्र मट्ठू आस!” 25पन यीशुए तैस भूते झ़िड़कतां ज़ोवं, “च़ुप रा, एस मैन्हु मरां निस्सी गा!” 26तैखन भूते तै मैन्हु ड्लेडेइतां त ज़ोरे सेइं चिन्डां मेरतां तैस मैन्हु मरां निस्सी जेव। 27एन हेरतां सारे लोक बड़े हैरान भोए। तैना एप्पू मांमेइं गलबात केरतां एक्की होरि पुछ़ने लग्गे कि, “ऐह कुन गल्ले! ऐह त अक नंव्वी शिक्षा आहे ज़ैस मां अधिकारे! तै त भूतन भी अधिकारे सेइं हुक्म देते ते तैना भी तैसेरो हुक्म मनतन।” 28अकदम यीशुएरे बारे मां ऐह गल गलील इलाकेरे आसे पासेरे सेब्भी ठैरन मां फैली जेई।
यीशु बड़े बिमार मैन्हन बज़्झ़ाते।
(मत. 8:14-17;लूक. 4:38-41)
29तैना अकदम प्राथना घरे मरां निस्तां, याकूब त कने यूहन्ना सेइं साथी शमौन त अन्द्रियासेरे घरे जे। 30शमौनेरी शिखी भुखारे थियो ते तै लेटोरी थी। अकदम तैनेईं तैसारे बारे मां यीशु सेइं ज़ोवं कि ऊ बिमारे। 31यीशुए तैस कां गेइतां तैसारो हथ ट्लेइतां खड़ी की। अकदम तैसारो भुखार ठीक भोव। ते तै तैन केरि सेवा केरने लग्गी।
32ड्लवझ़ी ज़ैखन दिहाड़ो डुब्बो, त लोक सारे बिमार मैन्हु त कने ज़ैन मैन्हन पुड़ भूतेरो सायो थियो तैना यीशु कां आन्ने लग्गे, ताके तै तैन्न बज़्झ़ाए। 33तैस नगरेरे बड़े लोक तैस घरेरे दारे पुड़ अकोट्ठे भोए। 34यीशुए बड़े मैन्हु बज़्झ़ाए, ज़ैना बड़े किसमां केरि बिमैरन सेइं दुखी थिये। त तैनी बड़े मैन्हन मरां भूतां केरो सायो कढो। पन यीशुए भूतन किछ ज़ोने न दित्तू, किजोकि तैना यीशु पिशानतां थियां (कि एन परमेशरेरू मट्ठू आए)।
यीशु लोकन परमेशरेरी गल्लां शुनाते।
(लूक. 4:42-44)
35एग्री दिहाड़ी, झ़ेज़्झ़ां-झ़ेज़्झ़ां दिहाड़ो निसने करां बड़े पेइले, यीशु उठतां बेइर एक्की सुनसान ठैरी मां जेव। तैड़ी तै प्राथना केरने लगो। 36पन थोड़े च़िरेरां बाद, शमौन त तैसेरे साथी, यीशु तोपने जे। 37ज़ैखन तैन्न तै मैल्हो, त तैनेईं यीशुए सेइं ज़ोवं, “(वापस ड्लाव्वें मां एई) सारे लोक तीं तोप्पी राओरेन!” 38पन यीशुए तैन सेइं ज़ोवं, “एज्जा, अस होरि केन्ची आसे पासेरे ड्लाव्वन मां गाम, ताके अवं तैन लोकन भी परमेशरेरी गल्लां शुनेई। किजोकि अवं एस्से कम्मेरे लेई दुनियाई मां एवरोईं।” 39तैल्हेरेलेइ यीशु गलील इलाकेरे सारे ड्लाव्वन मां गेइतां, तैन केरे प्राथना घरन मां लोकन परमेशरेरी गल्लां शुनातो राव ते बड़े लोकन मरां भूतां केरो सायो कढतो राव।
यीशु एक्की कोढ़ी मैन्हु बज़्झ़ाते।
(मत. 8:1-4;लूक. 5:12-16)
40तैल्ला पत्ती, एक्सां अक कोढ़ी मैन्हु यीशु कां अव। तैनी मैन्हे यीशुएरे सामने ज़ैन्धु केरे भारे बिशतां तैस कां मिन्नत केरतां तैस सेइं ज़ोवं, “अगर तू चास, त मीं बज़्झ़ेई सकतस। (महरबानी केरतां मीं बज़्झ़ा।)” 41यीशुए तैस मैन्हु पुड़ तरस खाव। यीशुए अपनो हथ अग्रोवं कियो त तैस कोढ़ी मैन्हु सेइं हथ लेहितां#1:41 हथ लेइतां: पन सारे लोक समझ़ते थिये कि कोढ़ी मैन्हु सेइं हथ लानो ज़ुठो (गन्दो) आए। ज़ोवं, “अवं चाताईं, तू बज़्झ़ोस।” 42अकदम तै कोढ़ी बेज़्झ़ोईं जेव। 43तैखन यीशुए तै मैन्हु समझ़ेइतां लूशी भेज़ो। 44त तैनी तैस सेइं ज़ोवं, “हेर, एस गल्लरे बारे मां केन्ची सेइं किछ न ज़ोइयां। (तू यरूशलेम नगरेरे मन्दरे मां गा), त कने अपने आपे याजके हिरा। तैल्ला पत्ती, तू अपने बेज़्झ़ोनेरे वजाई सेइं च़ढ़तल च़ाढ़, ज़ेसेरे बारे मां मूसा नेबे कानूने मां हुक्म दित्तोरोए, ताके लोकन पतो च़ले कि तू बेज़्झ़ोरोस।” 45पन तै मैन्हु बेइर गेइतां एस गल्लरे बारे मां लोकन बड़ू शुनाने लगो ते इड़ी तगर फैलाने लगो कि यीशु फिरी बांदे नगरे मां न गेइ सको, पन बेइर सुनसान ठैरन मां राव ते च़ेवरे पासां केरे लोक तैस कां एइते राए।
Currently Selected:
मरकुस 1: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
