मत्ती 12
12
यीशु आरामेरे दिहाड़ेरो प्रभु आए
(मरक. 2:23-28;लूक. 6:1-5)
1यीशु आरामेरे दिहाड़े ऊडारन मांमेइं एक्की बत्तां च़लोरे थियो, ते तैसेरे चेलन ढ्लुख लग्गी, ते तैना शिल्लां ट्लोड़तां खाने लग्गे। 2फरीसी लोकेईं एन लेहितां यीशु सेइं ज़ोवं, “तक! तेरे चेले तैन कम केरने लगोरेन ज़ैन आरामेरे दिहाड़े केरनू जाइज़ नईं।” 3यीशुए तैन जुवाब दित्तो, “कुन तुसेईं पवित्रशास्त्रे मां कधे नईं पढ़ेरू कि ज़ेइस इश्शो पूर्वज दाऊद राज़ो त तैसेरे साथी ढ्लुखोरे थिये त तैनेईं कुन कियेरू थियूं? 4तै केन्च़रे परमेशरेरे घरे मां जेव, ते ज़ैना च़ैढ़ोरी रोट्टी थी तैट्ठां एन्हतां एप्पू भी खेइ, ते अपने सैथन भी दित्ती, ते तैनेईं भी खेइ हालांकी तैना रोट्टी खैनी तैन केरे लेई जाइज़ थी, तैना सिर्फ याजक खेइ सकते थिये। 5या तुसेईं मूसेरो कानूने मां एन भी नईं पढ़ेरू, कि याजक मन्दरे मां आरामेरे दिहाड़ेरी विधि न मन्ने पुड़ भी बेकसूर भोतन। 6पन अवं तुसन सेइं ज़ोताईं कि इड़ी तैए, ज़ै मन्दरे करां भी बड्डोए। 7अगर तुस एल्हेरो मतलब ज़ांनेथे कि, अवं बलिदान नईं बल्के दया पसंद केरताईं, त तुस बेकसूर दोषी न बनाथे। 8किजोकि मैन्हेरू मट्ठू यानी अवं आरामेरे दिहाड़ेरो भी प्रभु आईं।”
यीशु शुक्कोरे हथ्थे बालो मैन्हु बज़्झ़ाते
(मरक. 3:1-6;लूक. 6:6-11)
9यीशु तैट्ठां निस्तां तैन केरे प्राथना घरे मां जेव। 10तैड़ी अक मैन्हु थियो, ज़ेसेरो हथ शुक्कोरो थियो, तैनेईं यीशु दोष लानेरे बहाने सेइं तैस पुछ़ू, “कुन आरामेरे दिहाड़े कोई बज़्झ़ानो जाइज़े?” 11तैनी तैन जो ज़ोवं, “तुसन मरां कौने, ज़ेसेरी अक्के भैड भोए, ते तै आरामेरे दिहाड़े गत्ते मांजो बिछ़ड़े, त तुस कुन तैस तैट्ठां बेइर न कढेले? 12मैन्हेरी कीमत त भैड्डी करां केत्री जादे! एल्हेरेलेइ आरामेरे दिहाड़े रोड़ू कम केरनू जाइज़े।” 13तैखन यीशुए तैस मैन्हु जो ज़ोवं, “अपनो हथ अग्रोवं केर।” तैनी मैन्हे अपनो हथ अग्रोवं कियो, ते अकदम तैसेरो हथ बेज़्झ़ोव। 14तैखन फरीसी लोक बेइर गेइतां तैसेरी खलाफ साज़िश केरने लग्गे, कि एस केन्च़रे मारम?
परमेशरेरे च़ुनोरे सेवक
15इन बुझ़तां यीशु तैट्ठां च़लो जेव। ते बड़े लोक तैस पत्ती च़ले, ते तैनी तैना सब बज़्झ़ाए। 16ते तैनी तैना खबरदार किये, कि मेरे बारे मां केन्ची सेइं न ज़ोइयथ। 17ताके यशायाह नेबेरी ज़ोवरी तै गल पूरी भोए:
18“हेरा ई मेरो सेवके ज़ै मीं च़ुनोरोए, ई मेरो ट्लारोए ज़ैस पुड़ मेरो दिल खुशे, अवं अपनि आत्मा तैस पुड़ छ़डेले, ते तै गैर कौमन मां गेइतां न्यायेरी खबर शुनालो। 19तै न लड़ाई केरेलो, ते न शौर,
ते बज़ारन मां कोई तैसेरी आवाज़ न शुनेलो।
20ते ऐह ढ्लेन्च़ोरे निरैठरे डाले न ट्लोड़ेलो,
ते न बलतो दीयो हिशालो ज़ांतगर न्याय भारी न भोए।
21ते तैसेरे नंव्वे पुड़ गैर कौमां उमीद रखेली।”
यीशु ते शैतान
(मरक. 3:20-30;लूक. 11:14-23)
22तैखन लोकेईं अक मैन्हु यीशु कां आनो ज़ै कानो ते लट्टो थियो ते तैस पुड़ भूतेरो सैयो थियो, तै तैनेईं तैस कां आनो, तैनी तै ठीक कियो, ते तै लहने लगो ते गल्लां भी केरने लगो। 23एन हेरतां लोक हैरान भोइतां ज़ोने लग्गे, “कुन एन दाऊदेरू मट्ठूए?” 24पन फरीसी लोकेईं एन शुन्तां ज़ोवं, “ए त भूतां केरे प्रधान शैतानेरी मद्दती सेइं भूतां केरो सैयो कढते।” 25यीशुए तैन केरे मन्नां केरे खियाल ज़ैनतां तैन सेइं ज़ोवं, “ज़ैस राज़्ज़े मां फूट पेचे, तैन राज़ बनोरू न रेइ सके, ते केन्ची नगर या खानदाने मां फूट पेचे, तैन भी बनोरू न राए। 26अगर शैतान एप्पू अपने भूतां कढे, त तै अपनो मुखालफ एप्पू भुओ, त फिरी तैसेरू राज़ केन्च़रे बनोरू रेइ सकते? 27अगर अवं शैतानेरी मद्दती सेइं भूतां केरो सैयो कढताईं त तुश्शे अपने मैन्हु केसेरी मद्दती सेइं कढतन? तैन्ना तुश्शो हाकिम भोल्हे। 28पन अगर अवं परमेशरेरी आत्मारे मद्दती सेइं भूतां केरो सैयो कढताईं त परमेशरेरू राज़ तुश्शे नेड़े पुज़ोरूए। 29या कोई मैन्हु केन्ची ज़ोरेबाले मैन्हेरे घरेरे मां गेइतां तैसेरो माल तांतगर लुट्टी न सके, ज़ांतगर कि तै पेइले तैस ज़ोरेबाले मैन्हु बेन्धी न छ़ड्डे। तैखन तै तैस ज़ोरेबाले मैन्हेरो माल लुट्टी सकते। 30ज़ै मीं सेइं साथी नईं तै मेरे खलाफे, ते ज़ै मीं सेइं साथी नईं तै अकोट्ठू न केरे तै इरां उरां बिट्लते। 31एल्हेरेलेइ अवं तुसन सेइं ज़ोताईं कि, मैन्हु केरे सारे पाप ते तुहीन माफ़ भोल्ही, पन पवित्र आत्मारी तुहीन माफ़ न भोल्ही। 32ज़ै कोई मैन्हेरे मट्ठेरे खलाफ किछ ज़ोलो, त तैसेरो ऐह पाप माफ़ कियो गालो, पन ज़ै पवित्र आत्मारी तुहीन केरे, त तैस मैन्हु न इस दुनियाई मां माफ़ भोल्हु ते न एजने बैली दुनियाई मां माफ़ भोल्हु।”
बुट ते तैसेरो फल
(लूक. 6:43-45)
33“अगर बुट रोड़े, त तैसेरो फल भी रोड़ो भोल्हो, अगर बुट बुरोए त तैसेरे फल भी बुरो भोल्हो, किजोकि बुट अपने फले सेइं पिशैनोते। 34तुस ज़ेहरीले सप्पेरे बच्चां केरे बुरे भोइतां रोड़ी गल केन्च़रे ज़ोई सकतथ? किजोकि ज़ैन दिले मां भोते तैन्ने ज़बानी पुड़ एइते। 35रोड़ो मैन्हु दिलेरे रोड़े खज़ाने मरां रोड़ी गल्लां कढते, ते बुरो मैन्हु बुरे दिलेरे बुरे खज़ाने मरां बुरी गल्लां कढ़ते (दिल खज़ानेरो ज़ेरोए)। 36अवं तुसन सेइं ज़ोतां, कि ज़ैना-ज़ैना बेकार गल्लां मैन्हु ज़ोले, न्यायेरे दिहाड़े लोकन अपनि हर एक्की तैस गल्लरो हिसाब देनो भोल्हो। 37किजोकि तू अपने गल्लेईं सेइं धर्मी ते अपने गल्लेईं सेइं दोषी भोल्हो।”
आसमानी निशानेरी मांग
(मरक. 8:11-12;लूक. 11:29-32)
38इस पुड़ किछ शास्त्री ते फरीसी लोकेईं तैस सेइं ज़ोवं, “हे गुरू अस तीं करां कोई निशान हेरनो चातम।” 39तैनी तैन जुवाब दित्तो, “इस ज़मानेरे बुरे ते बदमाश लोक निशान हेरनो चातन, पन तैन योना नेबेरे निशानेरे अलावा होरो कोई निशान न दित्तो गालो। 40ज़ेन्च़रे योना नबी ट्लाई दिहाड़े ते ट्लाई रातन मेछ़लरे पेटे मां राव, तेन्च़रे मैन्हेरू मट्ठू यानी अवं भी ट्लाई दिहाड़े ते ट्लाई रातन ज़मीनी मां रालो। 41नीनवेरे लोक न्यायेरे दिहाड़े इस ज़मानेरे लोकन सेइं साथी खड़े भोइतां एन दोषी बनाले, एल्हेरेलेइ कि तैनेईं योनारो प्रचार शुन्तां पापन करां मन फिराव, ते हेरा इड़ी तैए, ज़ै योना करां भी बड्डोए, पन तुसेईं पापन करां मन फिरानो न चाव। 42दक्षिणेरी रानी न्यायेरे दिहाड़े इस ज़मानेरे लोकन सेइं साथी खड़ी भोइतां दोषी बनाली, किजोकि तै बड़े दूरेरां सुलैमान राज़ेरू ज्ञान शुन्नेरे लेई एवरी थी, पन हेरा इड़ी तैए, ज़ै सुलैमाने करां भी बड्डोए।”
अध्धे सुधारे सेइं आफत
(लूक. 11:24-26)
43“ज़ैखन केन्ची मैन्हु मरां भूतां केरो सैयो निसते, त तै अपने आरामेरे लेई बेरान ठारां हंठते, पन ज़ैखन तैस ठार न मैल्हे। 44तैखन ज़ोते, कि अवं वापस अपने तैस्से घरे मां गाताईं ज़ैस मरां निस्सोरो आई, ते ज़ैखन तै वापस एइते, त तैस तैन घरे खाली, धोवरू ते साफ सुथरु सज़ो-सज़ेवरु मैलते। 45तैखन तैन गाते ते सत बुरां भूतां एप्पू सेइं साथी आनते, ते तैन सब तैस मां रहतन, ते तैस मैन्हेरो हाल पेइले हाले करां भी जादे बुरो केरतन, तेन्च़रे इस ज़मानेरे बुरे लोकां केरो हाल भी एरो भोनोए।”
यीशुएरी अम्मा ते ढ्ला
(मरक. 3:31-35;लूक. 8:19-21)
46ज़ैखन तै मैन्हन सेइं गल्लां केरने लगोरो थियो, त तैसेरी अम्मा ते कने तैसेरे ढ्ला खड़े थी, तैना तैस सेइं गल्लां केरनि चाते थिये। 47केन्चे गेइतां तैस सेइं ज़ोवं, “बेइर तेरी अम्मा ते ढ्ला खड़े आन, तैना तीं सेइं गल केरनि चातन।” 48एन शुन्तां तैनी पतो देनेबाले जो ज़ोवं, “कौने मेरी अम्मा, ते कौन मेरे ढ्ला?” 49ते अपने चेलां केरे पासे हथ अग्रोवं केरतां ज़ोवं, “हेरा मेरी अम्मा, ते मेरे ढ्ला इना आन। 50किजोकि ज़ै कोई मेरे सुर्गेरे बाजेरी मेर्ज़ी पुड़ च़लते तैए मेरो ढ्ला ते मेरी बेइन्न, ते मेरी अम्मा आए।”
Currently Selected:
मत्ती 12: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
