मलाकी 2
2
भ्रष्ट याजक
1सेना केरो यहोवा ज़ोते “हुनी हे याजकव, तुश्शे लेई ऐह हुक्मे। 2अगर तुसां एस न शुनथ, ते मन लेइतां मेरे नव्वेंरी इज़्ज़त न केरथ त सेना केरो यहोवा एन ज़ोते, कि अवं तुसन श्राप देइलो, ते ज़ैना चीज़ां मेरी बरकती सेइं तुसन मैल्होरिन, तैन पुड़ मेरो श्राप पेलो, बल्के ज़ैना तुसां मन न लाथ त एस वजाई सेइं मेरो श्राप तैन पुड़ पेई जेवरोए। 3हेरा, अवं तुश्शे वजाई सेइं तुश्शे खानदाने झ़िड़केलो, ते तुश्शे तुत्तरे पुड़ तुश्शे तिहारां केरे बलिदानां केरो जानबरां केरो गोबर फैलेइलो, ते तैस सेइं साथी तुस भी शारे गाले। 4तैखन तुसन पतो लग्गेलो कि मीं ऐह हुक्म एल्हेरेलेइ दित्तोरोए कि लेवी सेइं मेरो कियोरो करार बनोरो राए; सेना केरो यहोवा एन ज़ोते। 5मेरो ज़ै करार तैस सेइं बन्धोरो थियो, तै ज़िन्दगरो ते शैन्तरो थियो, ते मीं तै एल्हेरेलेइ कियोरो थियो कि तै डर मन्तो राए; ते तैनेईं मेरो डर मेन्नी भी छ़डो, ते मेरे नंव्वे करां बड़ो डरतो थियो। 6तैसेरी ज़बानी पुड़ मेरी सच़्च़ी शिक्षा थी, ते तैसेरी ज़बाना बुरी गल न थी निस्सती। तै मीं सेइं साथी-साथी शान्ति ते सच़्च़ाई सेइं च़लतो थियो, ते बड़े लोकन अधर्मे मरां वापस आनतो थियो। 7किजोकि याजकां केरे लेई ज़रूरीए कि तै अपने ज़बानी सेइं ज्ञानेरी हिफाज़त केरे, ते लोकन तैसेरी ज़बाना कानून तोप्पन, किजोकि तै सेना केरे यहोवारो दूते। 8पन तुसेईं लोकेईं त सही बत शारी, ते तुसां बड़े लोकां केरे लेई कानूनेरे बारे मां ठोकरारी वजा भोए, तुसेईं लेवेरो करार ट्लोड़ोरोए, सेना केरो यहोवा एन ज़ोते।#यिर्म. 18:15. 9एल्हेरेलेइ मीं भी तुसां सेभी लोकां केरे सामने घटिया ते थले लेइतां छ़डेलो, किजोकि तुसां मेरे बत्तन पुड़ न च़लथ, बल्के कानूनेरे बारे मां तरफदैरी सेइं कम्मां केरतथ।”
व्यभिचार ते धोखो
10कुन इश्शो सेभी केरो अक्के बाजी नईं? कुन असां एक्की परमेशरे पैदा नईं कियोरे? असां किजो एक्की होरि सेइं धोखो केरतां अपने दादे-पड़दादां केरो करार अपवित्र केरतम?#1 कुरि. 8:6. 11यहूदाए धोखो कियोरोए, ते इस्राएले मां ते यरूशलेमे मां नफरती कम कियोरूए; किजोकि यहूदा बखले देबतां केरि पूज़ा केरनेबाले कुइये सेइं ड्लाह बनेइतां यहोवारी पवित्र ठार ज़ै तैसेरी ट्लारीए, अपवित्र कियोरीए। 12अवं प्राथना केरताईं, ज़ै मैन्हु एरू कम केरे, तैसेरे डेरन मरां याकूबेरो परमेशर तैसेरे घरेरी रक्षा केरनेबालो ते सेना केरे यहोवारी च़ढ़तल च़ाढ़ने बाले यहूदा मरां केट्टी छ़डेलो!
13फिरी तुसेईं एन होरू कम कियोरूए कि तुसेईं यहोवारी वेदी लेरां देनेबाले ते ओशा छ़डने बालां केरे ऐंखरेईं सेइं सेली छ़डोरीए, एड़ी तगर कि तै तुश्शी च़ढ़तलरे पासे तक्के न्ना, ते न खुशी भोइतां तुश्शे हथ्थेरी भेंट कबूल केरे। तुसां पुछ़तथ, “एरू किजोए?” 14एल्हेरेलेइ, किजोकि यहोवा तेरे ते तेरी तैस जुवैनरे सैथी ते ड्लावरी कौन्शरे दरमियान गवाह भोवरो थियो ज़ैस सेइं तीं धोखो कियोरो थियो। 15कुन तैनी अक्के नईं बनेवरी हालांकि होरि भी आत्मा तैस कां थी? ते एक्के किजो बनाई? एल्हेरेलेइ कि तै परमेशरेरे काबल औलाद चाते। एल्हेरेलेइ तुसां अपने आत्मारे बारे मां खबरदार राथ, ते तुसन मरां कोई अपने जुवैनरे कौन्शी सेइं धोखो न केरे। 16किजोकि इस्राएलेरो परमेशर यहोवा एन ज़ोते, “अवं फारख्ती देने सेइं नफरत केरताईं, ते तैस सेइं भी ज़ै अपने लिगड़े ज़ुलमे सेइं ढकते। एल्हेरेलेइ तुसां एपनी आत्मारे बारे मां खबरदार राथ, ते धोखो न केरा, सेना केरो यहोवा एन ज़ोते।”
17तुसेईं लोकेईं एपनी गल्लेईं सेइं यहोवा थकेई छ़डोरोए। फिरी भी तुसां पुछ़तथ, “असेईं कोस गल्ली सेइं तंग कियोरोस?” एसमां तुसां ज़ोतथ, “ज़ै कोई बुरू केरते, तैन यहोवारी नज़री मां रोड़ू लगते, ते तै एरे ज़ेरे लोकन सेइं खुशी भोते,” ते इन कि, “न्यायी परमेशर कोड़िए?”
Currently Selected:
मलाकी 2: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
