लूका 3

यूहन्ना बपतिस्मो देनेबालेरो बिस्तार

(मत. 3:1-12;मरक. 1:1-8;यूह. 1:19-28)

1तिबिरियुस महाराज़ेरे हुकूमतरे परहनोवं साले मां ज़ेइस पुन्तियुस पिलातुस यहूदिया इलाकेरो गवर्नर थियो, ते गलीलेरे इलाके मां हेरोदेस गवर्नर थियो, तैसेरो ढ्ला फिलिप्पुस इतूरैया ते त्रखोनीतिस इलाकां केरो गवर्नर थियो, लिसानियास, अबिलेन इलाकेरो गवर्नर थियो। 2तैस वक्ते हन्ना ते कैफा महायाजक थिये, तेइस परमेशरे जकर्याहेरे मट्ठे यूहन्ना सेइं गल्‍लां की। ज़ैन सुनसान ठैरी मां रहतू थियूं। 3ते यूहन्ना यरदन दरियारे आसे पासेरे इलाकन मां गेइतां ई प्रचार केरने लगो, कि अपने पापन करां मन फिराथ, ते बपतिस्मो नेथ ताके परमेशर तुश्शे पाप माफ़ केरे। 4ज़ेन्च़रे यशायाह नेबेरी किताबी मां लिखेरूए,

“सुनसान ठैरी मां फुकारने बालेरी आवाज़ एइचे कि,

‘प्रभुएरी बत बनाथ ते तैसेरी बत्तां पेट्ठी केरा।’”

5“डुग्घी ठारां सैरी भेरोई गैनिन,

हर अक पहाड़ ते च़ौढ़ु बिछ़ड़नोए

ते ज़ैना ट्लेढी बत्तन तैना सिद्धी केरनिन ज़ैना उन्ढी उबरिन तैना पेट्ठी केरनिन।

6ते सब लोक तैस हेरेले, ज़ै परमेशरे तैन मुक्ति देने भेज़ोरोए।”

7ते यूहन्ना तैन लोकन सेइं ज़ोवं, ज़ैना जथन मां तैस करां बपतिस्मो नेने एवरे थिये, “तुस ज़ेहरीले सप्पेरे ज़ेरे बुरे आथ! तुसन केनि ज़ोवं कि, एजने बाले परमेशरेरे कोपे करां नश्शा? 8बस्सा, सज़ाही करां बच़नेरे लेई तैना कम्मां केरा, ज़ैन सेइं पतो लग्गे तुसेईं सच़्च़े पापन करां मन फिरावरोए। ते अपने-अपने मने मां एन न ज़ोथ कि, अब्राहम ज़ेन्च़रे इश्शो बाजीए, किजोकि अवं तुसन सेइं ज़ोताईं कि परमेशर इन घोड़न मरां अब्राहमेरे लेई औलाद पैदा केरि सकते। 9ते हुन्ना त बुट्टां केरे ज़ीलन पुड़ परमेशरेरो मैक्‍कु रखोरोए, एल्हेरेलेइ ज़ै कोई तैस बुट्टेरो ज़ेरो भोते, ज़ै रोड़ो फल न दे, तै कटनोए ते अग्गी मां छ़डनोए।” 10लोकेईं तैस पुछ़ू, “फिरी असां परमेशरेरी सज़ाही करां केन्च़रे बच़म?” 11यूहन्ना तैन सेइं ज़ोवं, “ज़ैस कां दूई कुरतेन त अक कुरतो तैस देथ ज़ैस कां अक भी नईं ते ज़ैस कां रोट्टी आहे त तै भी रोट्टी बन्टे ज़ैन कां नईं।” 12ते धड़त नेनेबाले भी बपतिस्मो नेने एवरे थिये तैनेईं तैस पुछ़ू, “हे गुरू जी असां कुन केरम?” 13तैनी तैन सेइं ज़ोवं, “ज़ैन तुश्शे लेई सरकारी कानूनेरे हिसाबे सेइं रखोरूए तैस करां जादे धड़त न नेइयथ।” 14ते तैखन होरि सिपाहीयेइं भी तैस पुछ़ू, “असां कुन केरम?” यूहन्ना तैन सेइं ज़ोवं, “केन्ची पुड़ ज़ुलम केरतां बेहक न नेइयथ, ते न केन्ची पुड़ झूठो दोष लेइयथ, पन अपनि तनखुवाही पुड़ गुज़ारो केरथ।”

15तैखन लोक इंतज़ारे मां थिये कि, मसीह जल्दी एजनोए, ते सब लोक अपने दिले मां यूहन्नारे बारे मां सोचते थिये कि ज़ै एवरोए तै मसीह आहे या नईं? 16त यूहन्ना तैन जुवाबे मां तैन सेइं ज़ोवं, “अवं त तुसन पैनी सेइं बपतिस्मो देताईं पन ज़ै मीं करां महाने तै एजनेबालो आहे। अवं तैसेरो गुलाम बेनतां तैसेरी जुट्टी केरे तसमे भी खोलनेरे काबल नईं। तै तुसन पवित्र आत्माई ते अग्गी सेइं बपतिस्मो देलो। 17तैसेरू छज्ज तैसेरे हथ्थे मां आहे ते तै खलाड़ रोड़ेच़ारे साफ केरेलो, ते गेहुं अपने कोठारे मां रखेलो पन झ़ाझ़ी तैस अग्गी मां फुकेलो ज़ै कधी हिशनेरी न भोल्ही।”

18बस्सा तै बड़े रोड़ेच़ारे लोकन समझ़ेइतां परमेशरेरी खुशखबरी शुनातो राव। 19हेरोदेस च़ेवरोवं मुल्खे पुड़ राज़ केरतो थियो। यूहन्ना तै झ़िड़कावरो थियो, कि हेरोदेस अपने ढ्ला फिलिप्पुसेरी कुआन्श हेरोदियास ज़ै थी तैस सेइं ड्लाह कियोरो थियो, ते होरां भी बड़ां बुरां कम्मां कियोरां थियां। 20हेरोदेस एन सेब्भन करां जादे बुरू कम कियूं कि यूहन्ना कैद केरतां छ़डो।

यूहन्ना यीशुए बपतिस्मो देते

(मत. 3:13-17;मरक. 1:9-11)

21ज़ैखन सब लोक बपतिस्मो नेने लोरे थिये त यीशुए भी बपतिस्मो नियो, ते ज़ैखन तै प्राथना लगोरो थियो केरने, त एरू भोवं कि सुर्ग खुल्‍ली जेवं। 22ते पवित्र आत्मा कबूतरेरी शक्ली मां यीशु पुड़ अव ते अम्बरे मरां ई आवाज़ अई, “तू मेरू ट्लारू मट्ठू आस, अवं तीं पुड़ बड़ो खुश आईं।”

यीशु मसीहेरी खानदानी

(मत. 1:1-17)

23ज़ैखन यीशुए अपने सेवारू कम शुरू कियूं त तैसेरी उमर 30 साल थी (ज़ेन्च़रे समझ़ू गातू थियूं) एन यूसुफेरू मट्ठूए, ते तैन एलेरू 24एली मत्तातेरू ते तैन लेवेरू ते तैन मलकेरो ते तैन यन्नेएरू ते तैन यूसुफेरू मट्ठू थियूं, 25ते तैन मत्तित्याहेरू ते तैन आमोसेरो ते तैन नहूमेरू ते तैन असल्याहेरू ते तैन नग्‍गईएरू मट्ठू थियूं। 26ते तैन मत्तातेरू ते तै मत्तित्याहेरू ते तैन शिमीएरू ते तैन योसेखेरू ते तैन योदाहेरू मट्ठू थियूं। 27ते तैन यूहन्नारू ते तैन रेसारू ते तै जरुब्बाबेलेरू ते तैन शालतियेलेरू ते तैन नेरेरू मट्ठू थियूं। 28ते तैन मलकीएरू ते तैन अद्दीयेरू ते तैन कोसामेरू ते तैन एल्‍मदामेरू ते तैन एरेरू मट्ठू थियूं। 29ते तैन येशूएरू ते तैन एलीएजेरेरू ते तैन योरीमेरू ते तैन मत्तातेरू ते तैन लेवेरू मट्ठू थियूं। 30ते तैन शमौनेरू ते तैन यहूदेरू ते तैन यूसुफेरो ते तैन योननेरू ते तैन एलयाकीमेरू मट्ठू थियूं। 31ते तैन मलेआहेरू ते तैन मिन्नाहेरू ते तैन मत्ततेरू ते तैन नातानेरू ते तैन दाऊदेरू मट्ठू थियूं। 32ते तैन यिशैएरू ते तैन ओबेदेरू ते तैन बोआजेरू ते तैन सलमोनेरू ते तैन नहशोनेरू मट्ठू थियूं। 33ते तैन अम्मीनादाबेरू ते तैन अरनेरू ते तै हेस्रोनेरू ते तैन पेरेसेरू ते तैन यहूदेरू मट्ठू थियूं। 34ते तैन याकूबेरू ते तैन इसहाकेरो ते तैन अब्राहमेरू ते तैन तेरहेरू ते तैन नाहोरेरू मट्ठू थियूं। 35ते तैन सरूगेरू ते तैन रऊएरू ते तैन पेलेगेरू ते तैन एबेरेरू ते तैन शिलहेरू मट्ठू थियूं। 36ते तैन केनानेरू ते तैन अरफक्षदेरू ते तैन शेमेरो ते तैन नूहेरो ते तैन लेमेकेरू मट्ठू थियूं। 37ते तैन मथूशिलहेरू ते तैन हनोकेरू ते तैन यिरिदेरू ते तैन महललेलेरू ते तैन केनानेरू मट्ठू थियूं। 38ते तैन एनोशेरू ते तैन शेतेरू ते तैन आदमेरू ते तैन परमेशरेरू मट्ठू थियूं।

Currently Selected:

लूका 3: BHDNT

Highlight

Copy

Compare