लूका 23

पिलातुसेरे सामने यीशु

1तैखन तैना सब तैट्ठां उठे ते यीशुए पिलातुसे कां घिन्तां जे।#मत. 27:1-2,11-14;मरक. 15:1-5;यूह. 18:28-38. 2ते तैस जो एन ज़ोइतां ऐह इलज़ाम लांने लगे, “कि ऐह इश्शे लोकन भड़काते ते महाराज़े जो धड़त देनेरे लेई ठाकते, ते अपने आपे जो मसीह राज़ो ज़ोते।” 3तैखन पिलातुसे यीशुए पुछ़ू, “तू यहूदी केरो राज़ोस?” यीशु तैस जुवाब दित्तो, “तू एप्पू ज़ोतस!” 4पिलातुसे प्रधान याजकन ते लोकन सेइं ज़ोवं, “कि अवं एस मैन्हु मां कोई कसूर न लेही।” 5पन तैना बड़े घमण्डे सेइं ज़ोने लगे, “ऐह यहूदियारे इलाके करां गलील इलाके तगर बल्के इड़ी तगर लोकन अपनि शिक्षाई सेइं भड़काते।” 6ज़ैखन पिलातुसे एन शुनू त तैनी पुछ़ू, “कुन ऐह मैन्हु भी गलील इलाकेरो आहे।” 7ते ज़ेरो तैस पतो लगो, कि ऐह हेरोदेसेरे इलाकेरो रानेबालोए, त पिलातुसे तै हेरोदेस कांजो भेज़ो। किजोकि तैस वक्ते मां तै एप्पू भी यरूशलेम नगरे मां थियो।

हेरोदेसेरे सामने यीशु

8ज़ैखन हेरोदेसे यीशु लाव त बड़ो खुशी भोव। किजोकि तैस च़रोक्नी देंती यीशु हेरनेरी इच्छा थी। तैनी तैसेरे बारे मां बेड़ि गल्‍लां शुनोरी थी, ते तैस बड़ी उमीद थी, कि यीशुएरो कोई चमत्कार हेरे। 9तैनी यीशुए बड़ू किछ पुछ़ू, पन यीशुए तैस कोई जुवाब न दित्तो। 10पन याजक ते प्रधान याजक ते कने शास्त्री लोक बड़े ज़ोरे शोरे सेइं यीशु पुड़ इलज़ाम लांने लगे। 11तैखन हेरोदेस भी अपने सैथन सेइं मिलतां यीशुएरी तुहीन की, ते तैसेरी हासी बनाई फिरी तैस अक चमकतो कुरतो लुवेइतां पिलातुसे कां वापस भेज़ो। 12पेइले पिलातुस त हेरोदेस दुश्मन थिये, तैस दिहाड़े तैना दोस्त बेनि जे।

पिलातुसेरे ज़िरिये यीशु मौतरी सज़ा

13तैखन पिलातुसे प्रधान याजक ते सरदार ते होरे लोक अकोट्ठे किये।#मत. 27:15-26;मरक. 15:6-15;यूह. 18:39—19:16. 14“ते पिलातुसे तैन सेइं ज़ोवं तुसेईं ऐह मैन्हु मीं कां एन ज़ोतो आनोरोए कि, ऐह लोकन भड़काते ते मीं भी एसेरी पुछ़ गन की, पन ज़ैस जुर्मेरो दोष तुस एस पुड़ लातथ, अवं एल्हेरो एसमां कोई कसूर न लेहीं। 15ते न हेरोदेस ज़ैनी ऐह असन कां भेज़ोरोए तैस भी कोई दोष न मैल्हो, ते असन कां एरू कोई सबूत बराँमद न भोवं, ज़ैस सेइं ऐह कत्ल कियो गाए। 16तैल्हेरेलेइ अवं एस कोड़ेइं बाएतां छ़ेडी देताईं।” 17पिलातुस यहूदी केरे फ़सह तिहारेरे मौके पुड़ अक कैदी हथरां छ़डतो थियो। 18तैना सारे लोक चिन्डां लगे मारने, “कि एस मैन्हु सज़ा देथ ते बरअब्बा इश्शे लेई हथरां छ़ड्डा।” 19बरअब्बा नगरे मां गड़बड़ी केरनेरे ते कत्लेरे बारे मां कैदखाने मां छ़डोरो थियो। 20पिलातुसे यीशु हथरां छ़डनेरे इरादे सेइं लोकन दुबारू पुछ़ू। 21पन तैना लोक मना चिन्डां लगे मारने, “कि तू एस क्रूसे पुड़ च़ाढ़ एस क्रूस पुड़ च़ाढ़।” 22तैखन पिलातुसे तैन ट्लेइयोवं फेरे फिरी ज़ोवं, “किजो आखर एनी कुन जुर्म कियोरोए? हेरा एसमां एरू कोई सबूत बराँमद न भोवं, कि ऐह मौतरे सज़ारो हकदार भोए, तैल्हेरेलेइ अवं एस कुटेइतां छ़ेडी देताईं।” 23पन तैना चिन्डां मैरी-मैरी ज़ोने लगे, ऐह क्रूसे पुड़ च़ाढ़ोरो लोड़ते, ते तैन केरि चिन्डां मारनेरी उमीद पूरी भोइ। 24बस्सा, पिलातुसे ज़ोवं कि तैन केरे मेर्ज़रे मुताबिक कियूं गाए। 25ते ज़ै मैन्हु हुकूमतरे खलाफ ते खूनेरे जुर्मे मां कैद थियो, ते ज़ैस हथरां छ़डनेरे लेई तैनेईं दरखुवास कियोरी थी, तै हथरां छ़डो पन यीशु तैन केरि मेर्ज़ी सेइं सिपाही केरे हवाले कियो।

यीशु क्रूसे पुड़ च़ाढ़ो

26ज़ैखन तैना यीशु नेइतां च़लोरे थियो, त तैनेईं शमौन कुरेनी ज़ै एक्‍की ड्लोंवेरां एवरो थियो, ट्लातो ते क्रूस तैस कां छ़ूने जो दित्तू, कि तू ई क्रूसे छ़ुइतां यीशु पत्ती च़ला।#मत. 27:32-44;मरक. 15:21-32;यूह. 19:17-27.

27ते बड़े लोक तैस पत्ती च़लोरे थिये ते किछ कुआन्शां भी थी ज़ैना यीशुएरे लेई शोग बनैती थी। 28यीशुए तैन केरे पासे मुड़तां ज़ोवं, “हे यरूशलेम नगरेरी कुइयव मेरे लेई लेरां न देथ, बल्के अपने बच्‍चां केरे लेई लेरां देथ। 29किजोकि तैना मुश्किल दिहाड़े एजने बालेन ज़ैखन लोक एन ज़ोले कि, ‘धन आन तैना कुआन्शां ज़ैना बेऔलादन ते बच्‍चे न पाले।’”

30“तैस वक्ते लोक पहाड़न सेइं ज़ोले,

‘असन उन्ढे बिछ़ड़ा ते उच्‍ची ठारन जो ज़ोले, कि असन छ़ुपाथ।’ 31किजोकि ज़ैखन तैनेईं सब्ज़ बुट्टे सेइं एन केरू, त शुक्‍कोरे बुट्टे सेइं कुन न केरेले?”

32ते सिपैहेईं दूई होरे मुर्ज़म भी यीशु सेइं साथी च़लेवरे थिये ताके तैन भी मारन। 33ज़ैखन तैना तैस ठैरी पुज़्ज़े ज़ैस जो “खोपड़ी” ज़ोतन त तैड़ी यीशु क्रूसे पुड़ च़ाढ़ो, ते तैना दूई मुर्ज़मन भी एक्‍की यीशुएरे देइने पासे ते होरि बांए पासे क्रूसे पुड़ च़ाढ़े। 34यीशु ज़ोवं, “हे बाजी एन माफ़ करां एन न ज़ानन कि एना कुन लगोरेम केरने।” ते तैनेईं तैसेरे लिगड़ां केरे लेई पेरची छ़ेडतां शर्त रख्खू ते एप्पू मांमेइं बंटां। 35लोक खड़खड़े एन सब किछ हेरने लगोरे थिये ते सरदार ज़ोरे-ज़ोरे सेइं ज़ोते थिये, “एनी होरे त बच़ाए ते अगर ऐह मसीहे ते परमेशरेरो च़ुनोरे त अपने आपे किजो न बच़ाए।” 36सिपाही भी तैस कां एइतां तैसेरी हासी बनाने लगे (किजोकि तै अपनो आप राज़ो बनातो थियो), ते घटिया दाछ़रो रस पीनेरे लेई तैस देने लगे। 37“ते ज़ोते थिये तू अगर यहूदी केरो राज़ोस त अपनो आप बच़ा!” 38ते तैस क्रूसे पुड़ यानी यीशुएरे क्रोड़ी करां बहा अक पखड़ी लिखतां लेवरी थी, ते तैस पुड़ एन लिखोरू थियूं, “ऐह यहूदी केरो राज़ आहे।”

मन फिराने बालो डैकू

39तैन दूई डैकू ज़ैना मारे जे तैन मरां एक्‍के यीशु जो तुहीन केरतां ज़ोवं, “अगर तू मसीह आस त एप्पू भी बच़ ते असन भी बच़ा।” 40पन होरे दूइयोवं डैके तैस जो झ़िड़कतां ज़ोवं, “तीं परमेशरेरो भी डर नईं? ज़ै सज़ाह तैस मैल्हने लावरी तीं भी त तैए सज़ाह मैल्हने लावरीए। 41असन त न्यायेरे मुताबिक अपने बुरे कम्मां केरि सज़ाह मैल्हने लावरी पन एनी त कोई गलत कम नईं कियेरू।” 42तैखन तैनी ज़ोवं, “हे यीशु ज़ैखन तू अपने राज़्ज़े मां एज्जेलो त मीं भी याद केरां।” 43यीशुए तैस जो ज़ोवं, “अवं तीं सेइं सच़ ज़ोताईं कि तू अज़्ज़े मीं सेइं साथी सुर्गे मां भोल्हो।”

यीशु क्रूसे पुड़ प्राण देते

44दीसरे 12 बज़ेई सारे मुल्खे मां आंधरू भोवं, त ट्लेइ बज़न तगर रावं।#मत. 27:45-56;मरक. 15:33-41;यूह. 19:28-30. 45दिहाड़ो भी कालो भोव ते मन्दरेरो पड़दो बां देंता बुन तगर फेटतां दूई टुक्ड़े भोइ जे। 46यीशुए बड़े ज़ोरे सेइं ज़ोवं, “हे बाजी अवं अपनि आत्मा तेरे हथ्थे मां सौंफताईं,” ते एन ज़ोइतां यीशुए प्राण दित्ते। 47ज़ैखन रोमी सूबेदारे एन सब हेरू त परमेशरेरी तारीफ़ केरते ज़ोवं, “ए मैन्हु सच़्च़े धर्मी थियो।” 48ते सारे लोक ज़ैना तैड़ी थिये ए अनर्थ हेरतां छाती पिट्टते च़ले जे। 49पन यीशुएरे सारे दोस्त ते तैना कुआन्शां ज़ैना गलील इलाके मरां यीशुए पत्पती एवरी थी दूर ज़ेरे खेड़ोइतां, ज़ैन किछ भोइ राहोरू थियूं सब किछ हेरी रेवरी थी।

यीशु दबनो

(मत. 27:57-61;मरक. 15:42-47;यूह. 19:38-42)

50अक मैन्हु थियो, ज़ेसेरू नवं यूसुफ थियूं, तै यहूदी केरि आदालतरो अक मुलाज़म भी थियो, ते अक बड़ो नेक ते धर्मी मैन्हु थियो। 51तै बेड्डी आदालत अफसरां केरे फैसलेरे हके मां न थियो। तै यहूदी केरे नगर अरिमतियाह रानेबालो थियो, ते परमेशरेरे राज़्ज़ेरे तलाशी मां थियो। 52तैनी पिलातुसे कां गेइतां यीशुएरी लाश मग्गी। 53ते लाश क्रूसे पुड़ेरां ओसैलतां मलमलेरे कपड़े मां पलेटतां ते एक्‍की कब्री मां रख्खी, ज़ै एक्‍की शफ़ड़ी मां बनेवरी थी, तैस कब्री मां पेइले कोई लाश न थी रख्खोरी। 54तै तियैरारी दिहाड़ी थी ज़ै आरामेरी दिहाड़ी शुरू भोने बाली थी। 55ते तैना दूई कुआन्शां ज़ैना गलील इलाके मरां यीशुए पत्पती एवरी थी, यूसुफे पत्पती जेई ते तैनेईं तै कब्र हेरी, कि यीशुएरी लाश एसमां केन्च़रे सेइं रख्खोरीए। 56तैखन तैना अपने घरे वापस आए, ते खुशबूदार चीज़ां ते इत्र तियार कियो ते आरामेरे दिहाड़े मूसेरे कानूनेरे मुताबिक आराम कियो।

Currently Selected:

लूका 23: BHDNT

Highlight

Copy

Compare