लूका 21

गरीब विधवा कुआन्शरू दान

(मरक. 12:41-44)

1यीशु अमीर लोकां केरे पासे तकने लगो, ज़ैना-ज़ैना दान-पेट्टी मां दान लगोरे थिये छ़डने। 2तैनी अक बड़ी गरीब विधवा कुआन्श लाही ज़ैसां दूई पेइंसे यानी अक धेलो च़ाढ़ो। 3तैखन यीशुए ज़ोवं, “अवं तुसन सेइं सच़ ज़ोताईं कि दान-पेट्टी मां दान देनेबालन मरां सेब्भन करां जादे इस विधवा कुआन्शां दान दित्तू। 4किजोकि तैनेईं त अपनि दौलती मरां सिर्फ थोड़े ज़ेरे पेइंसे परमेशरे घरे मां दित्तोरेन पन इस कुआन्शां अपनि गरीब हालती सेइं ज़ैन किछ एसारे पल्‍ले थियूं सब किछ देइ छ़डू।”

मन्दर नाश भोनू आहे

(मत. 24:1-2;मरक. 13:1-2)

5किछ लोक मन्दरे बारे मां ज़ोने लगोरे थिये, कि बड़े माघे घोड़ेईं सेइं ते दान कियोरी चीज़न सेइं बनोरूए, त यीशुए ज़ोवं। 6“तैना दिहाड़े एजने बालेन कि इन चीज़ां ज़ैना तुस इड़ी लहने लोरेथ इड़ी घोड़े पुड़ घोड़ नईं रानो ज़ै बिछ़ोड़ो न गालो।”

दुख ते मुसीबत

(मत. 24:3-14;मरक. 13:3-13)

7तैनेईं यीशुए पुछ़ू, “हे गुरू जी एन गल्‍लां केइस भोनिन? ते तैन केरो दुनियाई मां एजनेरो कुन निशान भोनोए।” 8यीशुए तैन ज़ोवं, “खबरदार टेपलोईयथ नन्ना, किजोकि काई लोक मेरे नंव्वे सेइं एजनेन ते तैनेईं ज़ोनूए कि अव्वें मसीह आईं, ते मौको भी नेड़े पुज़ोरोए तुस तैन पत्ती न गेइयथ। 9ते ज़ैखन तुस लड़ेइयरी त उलझनरी अफवा शुनेले त डेरथ नन्ना, किजोकि एन गल्‍लां केरू पेइले भोनू ज़रूरीए, पन तेइस खातमों नईं भोनो।”

10तैखन यीशुए ज़ोवं, “किजोकि कौमी पुड़ कौम, ते राज़्ज़े पुड़ राज़ चढ़ाई केरेलू। 11ठारी-ठारी बडे-बडे भुंज़ल एजनेन ते काल पेनोए ते बिमारी फैलनिएं ते बुरी-बुरी गल्‍लां भोनिन ते अम्बरे मां आजीब निशान लेइहोनेन। 12एन सब गल्‍लां भोने करां पेइले तुश्शे दुश्मन तुसन सिर्फ मेरे नव्वेंरे वजाई सेइं ढप्पेले ते तुसन सताले ते प्राथना घरेरी आदालती मां हाज़र केरेले ते कैद केरेले ते गवर्नरन ते कने राज़न कां पेश केरेले। 13तैखन तुसन मेरी गवाही देनेरो रोड़ो मौको मैल्हेलो। 14पन तुसन कोई ज़रूरत नईं, कि पेइले फिक्र केरने लगथ कि अस कुन ज़ोमेले। 15किजोकि अवं तुसन एरी ज़बान ते अक्ल देइलो, कि कोई भी मुखालफ तुश्शे सामने खड़ो न भोइ सकेलो ते न लोक तुश्शे खलाफ किछ ज़ोई सकेलो। 16ते तुश्शे हाज बव ते ढ्ला ते रिश्तेदार ते दोस्त तुसन सेइं बैर केरेले ते तुसन मरां किछन मारेले भी। 17ते मेरे नव्वेंरे वजाई सेइं सारे लोक तुसन सेइं नफरत केरेले। 18पन तुश्शे दोग्गेरो कोई बाल बांको न भोल्हो। 19सब किछ झ़ेलतां तुस अपनि जान बच़ेइ सकेलो।”

यरूशलेम नगर नाश भोनूए

(मत. 24:15-21;मरक. 13:14-19)

20“ज़ेइस तुस यरूशलेम नगर च़ेवरे पासन फौवजेइं सेइं घेरेरू लाले, त बुझ़थ कि एस नाश भोनेरे दिहाड़े नेड़े एवरेन। 21तैस मौके ज़ैन यहूदिया मां भोल्हे तैना पहाड़े पुड़ जो नेश्शी गान ते ज़ैना यरूशलेम नगरे मां भोल्हे त तैन बेइरोवं निस्सन ते ज़ैना ड्लाव्वन मां भोल्हे त तैना नगर मांजो न गान। 22किजोकि एना बदलेरे दिहाड़े भोल्हे, एन मां तैन सब किछ ज़ैन पेइलू पवित्रशास्त्रे मां लिखेरूए तैन पूरू भोनूए। 23तैन दिहाड़न मां ज़ैना दोज़ींती त दुद्ध पियाती कुआन्श भोल्ही, तैन केरे लेई अफ़सोस! किजोकि धेरती पुड़ बड़ी मुसीबत एजनीए ते एस कौमी पुड़ बड़ी आफत एजनीए। 24तैना सब तलवारी सेइं मारे गाले ते गुलाम बेनतां सेब्भी कौमन मां पुज़ेले ते गैर कौमां केरो मौको पूरो भोने तगर यरूशलेम नगर गैर कौमेईं सेइं पस्त भोतो रालू।

मैन्हेरे मट्ठेरू ज़ींतू भोनू

(मत. 24:29-31;मरक. 13:24-27)

25“दिहाड़े चैंदनरी ते तारन मां निशान बांदे भोनेन ते धेरती पुड़ कौमन बड़ी तकलीफ पुज़नियें, किजोकि समुन्दरेरी लैहेरां केरि शौरी सेइं तैना डेरि गानेन। 26डर्रे मारे एजने बैली मुसीबतरे इंतज़ार केरते-केरते तैन केरे होश उड़ी गानेन, किजोकि अम्बरेरी सैरी शेक्ति हिल्‍लेली। 27तैखन लोक मैन्हेरू मट्ठू बेड़ि शेक्ति ते महिमा सेइं बिदलारी मां एंइतू लाहेले। 28ज़ैखन एन गल्‍लां भोनी शुरू भोल्ही त सिद्धे खड़े भोइतां उबरू तेकथ, किजोकि तुश्शो छुटकारो भोने बालोए।”

फैगेरे बुट्टेरी मिसाल

(मत. 24:32-35;मरक. 13:28-31)

29फिरी यीशुए तैन अक मिसाल देइतां ज़ोवं, “तुस फैगेरे बुट ते होरि बुट्टन भी हेरतथ। 30ज़ेरि तैस गुड्डी लेगनी शुरू भोइचन? त तुस हेरतां बुझ़तथ कि नेला एवरोए। 31एसेरो ज़ेरो, ज़ैखन तुस एना गल्‍लां, ज़ैना मीं ज़ोई, भोते हेरेले, त तुस बुज़्झ़ी छ़ड्डा कि परमेशरेरू राज़ नेड़े एवरूए। 32अवं तुसन सेइं सच़ ज़ोताईं, कि ज़ांतगर एन गल्‍लां पूरी न भोन, एस कौमरो खातमों न भोल्हो। 33धरती अम्बर टेली गालू पन मेरी गल्‍लां कधे न टेलेली।

तियार राथ

(मत. 24:36-44;मरक. 13:32-37)

34“बस्सा खबरदार भोथ कोस्कोई एरू न भोए कि तुश्शो दिल नशे मां मसत भोइतां इस ज़िन्दगरे फिक्रे सेइं कमज़ोर भोए, ते तैस दिहाड़े तुश्शे लेई अक मुसीबत बने। 35किजोकि तै इस सैरी धेरती पुड़ ज़ेत्रे लोकन तैन सेब्भन पुड़ एन्च़रे एजनीए। 36बस्सा, हर वक्त तियार राथ ते प्राथना केरते राथ, ताके तुस एन गल्‍लन करां ज़ैना भोने बैलिन बेंच़तां राथ, ते मैन्हेरे मट्ठे कां खड़े भोनेरे काबल भोथ।”

37यीशु रोज़ मन्दरे मां शिक्षा देतो थियो, ते राती ज़ैतून पहाड़े पुड़ रहतो थियो। 38झ़ेझ़ां सारे लोक यीशुएरी गल्‍लां शुन्नेरे लेई मन्दरे मां तैस कां एइते थिये।

Currently Selected:

लूका 21: BHDNT

Highlight

Copy

Compare