लूका 11

चेलन प्राथना केरनि शिखालनी

(मत. 6:9-13)

1फिरी यीशु एक्‍की ठैरी प्राथना लोगोरो थियो केरने। ते ज़ैखन तैनी प्राथना की, त तैसेरे चेलन मरां एक्‍के ज़ोवं, “हे प्रभु, ज़ेन्च़रे यूहन्ना अपने चेलन प्राथना केरनि शिखालोरिये तेन्च़रे तू भी असन शिखाल।”

2यीशुए तैन सेइं ज़ोवं, “ज़ैखन तुस प्राथना केरथ, त एन ज़ोइयथ,

‘हे बाजी, लोक तेरी आदर केरन किजोकि तू पवित्र परमेशर आस।

ते तेरू राज़ एज्जे।’

3‘इश्शी रोज़ेरी रोट्टी असन दे।

4इश्शे पाप माफ़ केर,

किजोकि अस भी ज़ैना इश्शे खलाफ बुराई केरतन, तैन माफ़ केरतम।

अज़मैइशरे ज़िरिये असन पाप केरने न दे।’”

प्राथनारे बारे मां यीशुएरी गवाही

(मत. 7:7-11)

5फिरी यीशुए तैन सेइं ज़ोवं, “फर्ज़ केरा तुसन मरां केन्चेरो अक दोस्त एध्धी राती अपने दोस्ते ज़ोए, ‘तू मीं ट्लाई रोट्टी दे। 6किजोकि मेरो अक दोस्त बड़े दूरेरां हंठतो मेरे कां एवरोए, ते मेरे कां रोट्टी नईं, कि अवं तैस रोट्टी देइ सेखी।’ 7ते तै तैसेरो दोस्त अन्तरां जुवाब दे, मीं दुख ने दे, हुनी त दार बन्दे, मीं कां मेरे बच्‍चे झ़ुलोरेन, ते अवं तीं रोट्टी न देइ सेखी। 8अवं तुसन सेइं ज़ोताईं कि, अगर तै तैसेरो दोस्ते ते तैस रोट्टी न दे, त तैसेरो दोस्तेरे बार-बार मिन्नत केरने सेइं ज़रूर तैस रोट्टी देलो ते ज़ेत्री रोट्टी केरि तैस ज़रूरत भोल्ही देलो। 9ते अवं तुसन सेइं ज़ोताईं, मग्गा त तुसन दित्तू गालू। ते तोप्पा, त तुसन मैल्ही गालू। ते दार गुड़काथ, त तुश्शे लेई खोल्‍लू गालू। 10किजोकि ज़ै कोई मगते तै हासिल केरते, ते ज़ै कोई तोपते तैस मैल्ही गाते, ते ज़ै कोई दार गुड़काते त तैसेरेलेइ खोल्‍लू गाते। 11तुसन मरां कौन ज़ेरो बाजी एरो भोए, कि ज़ैखन तैसेरू मट्ठू रोट्टी मग्गे त तैस घोड़ दे? या मछ़ली मग्गे, ते तै सप दे? 12या ठूल मग्गे त तैस बिच़्च़ू दे? 13ते तुस बुरे भोनेरे बावजूद भी अपने मट्ठन रोड़ी चीज़ां देनी ज़ानतथ त तुश्शो सुर्गेरो बाजी तैन, ज़ैना तैस करां मगतन पवित्र आत्मा किना देलो।”

यीशु ते शैतान

(मत. 12:22-30;मरक. 3:20-27)

14फिरी तैनी एक्‍की लट्टे मरां भूतेरो सैयो कढो, ज़ैखन भूतेरो सैयो निस्सो, त तै लट्टो गल्‍लां लगो केरने, ते लोक हैरान रेइजे। 15पन तैन मरां किछ मैन्हेईं ज़ोवं, “ऐह त भूतां केरे गुरू शैतानेरे मद्दती सेइं भूतां कढते।” 16ते किछेईं अज़मानेरे लेई तैस करां कोई अक अम्बरेरो निशान मग्गो। 17पन यीशुए तैन केरे मन्नां केरे खियाल ज़ैनतां तैन सेइं ज़ोवं, “ज़ैस-ज़ैस राज़्ज़े मां फूट पेचे, तैन राज़ बनोरू न राए, ते ज़ैस खानदाने मां फूट पेचे, तैन भी बनोरू न राए। 18अगर शैतान अपनि खलाफत एप्पू केरे, त फिरी तैसेरू राज़ केन्च़रे रेइ सकते? फिरी तुस केन्च़रे ज़ोतथ कि अवं शैतानेरे मद्दती सेइं भूतां कढताईं। 19अगर अवं शैतानेरी मद्दती सेइं भूतां कढताईं त तुश्शी औलाद केसेरे मद्दती सेइं कढती? तैन्ना तुश्शो फैसलो केरनेबाले हाकिम भोल्हे। 20पन अगर अवं परमेशरेरे शेक्ति सेइं भूतां कढताईं त परमेशरेरू राज़ तुश्शे नेड़े पुज़ोरूए। 21ज़ैखन कोई ज़ोरेबाले मैन्हु अपने घरेरो पेरहो केरते, त तैसेरू सब किछ बंच़ेरू रहते। 22पन ज़ैखन तैस करां कोई निगर मैन्हु तैस पुड़ हमलो केरते त तैस अपने कब्ज़े मां केरतां तैसेरे सारे हथियार घिन्नी गाते ज़ैस पुड़ तैसेरो भरोसो थियो, ते तैसेरी सारी जेइदात लुटी गाते। 23ज़ै मीं सेइं साथी नईं तै मेरे मुखालफे, ते ज़ै मीं सेइं साथी अकोट्ठू न केरे ते तै खिलारते।

अध्धे सुधारे सेइं आफत

(मत. 12:43-45)

24“ज़ैखन केन्ची मैन्हु मरां भूत निसते त तैन शुक्‍कोरो ठैरन मां आराम तोपते ते ज़ैखन तैस तै आराम न मैल्हे त ज़ोते कि अवं वापस तैस्से घरे मां गालो ज़ैट्ठां अवं निसोरोईं। 25ते तैखन तैन भूत वापस एइतां तैन घर साफ सुथरु रोड़ू लाते। 26तैखन तै एप्पू सेइं साथी सत होरां भूतां साथी घिन्तां तैस मां अन्तर गेइतां बिशतन, ते तैस मैन्हेरो हाल पेइले हाले करां जादे बुरो भोते।”

धन कौने?

27ज़ैखन यीशु इना गल्‍लां ज़ोने लग्गोरो थियो, त भीड़ी मरां अक कुआन्श जोरे सेइं ज़ोने लगी, “धने तै कुआन्श ज़ैसां तीं ज़र्म दित्तू ते तू पालो।” 28पन यीशुए ज़ोवं, “हाँ, पन धन आन तैना लोक ज़ैना परमेशरेरू वचन शुन्तन ते तैस पुड़ अमल केरतन।”

आसमानी निशानेरी मांग

(मत. 12:38-42)

29ज़ैखन हछे लोक भोने लगे त यीशु ज़ोवं, “इस ज़मानेरे लोक बुरेन, तैना निशान तोपतन, पन योनारे निशानेरे अलावा एन होरो कोई निशान न दित्तो गालो। 30किजोकि ज़ेन्च़रे योना नबी नीनवेरे लोकन जो निशान बनो तेन्च़रे मैन्हेरू मट्ठू भी इस ज़मानेरे लोकां केरे लेई निशान बनेलू। 31पन दक्षिणेरी रानी आदालतरे दिहाड़े इस ज़मानेरे लोकन दोषी बनाली, किजोकि तै बड़े दूरेरां सुलैमानेरे ज्ञानेरे बारे मां शुन्तां एवरी थी। ते इड़ी हेरा सुलैमाने करां भी बड्डोए। 32नीनवेरे लोक आदालतरे दिहाड़े इस ज़मानेरे लोकन सेइं साथी खड़े भोइतां मुर्ज़म बनाले। किजोकि तैनेईं योनारे प्रचारे सेइं पापन करां मन फिरावरो थियो, पन इड़ी हेरा तै आहे, ज़ै योना करां भी बड्डोए।

जानरो दीयो

(मत. 5:15;6:22-23)

33“कोई मैन्हु दीयो बैलतां भांडे हैठ या ओड़कतां न छ़डे, बल्के उच्‍ची ठैरी रखतन ताके अन्तर एजनेबालन लौ भोए। 34अछ़ जानेरे लेई दीयेरी ज़ेरिए, अगर तेरी अछ़ रोड़ीए, त तेरी जानी मां भी लौए, ते अगर तेरी अछ़्छ़े बुरीए त तेरी जान भी आंधरीए। 35एल्हेरेलेइ खबरदार रेइयां, कोस्कोई एरू न भोए कि ज़ै लौ तीं मांए तै आंधरू न भोए। 36अगर तेरी जानी मां लौए, त तैसेरो कोई भी हिस्सो आंधरो न भोए, त सब एरू भोल्हु, ज़ैखन दीयो चेमकतां लौ देते।”

शास्त्री ते फरीसन लोकन करां खबरदार

(मत. 23:1-36;मरक. 12:38-40)

37ज़ैखन तै एना गल्‍लां ज़ोने लगोरो थियो, त केन्चे फरीसे यीशु कां मिन्नत की, कि मीं सेइं साथी रोट्टी खा, ते यीशु तैसेरे घरे जेव ते तैसेरे कां गेइतां रोट्टी खाने बिश्शो। 38फरीसी एन हेरतां हैरान भोव, कि ऐह बगैर हथ-पव धोने रोट्टी खांने बिश्शी जेव। 39पन प्रभुए फरीसी सेइं ज़ोवं, “हे फरीसाव तुस कटोरो, ते थाली बेइरमेईं त बड़ी साफ केरतथ, पन तुश्शे अन्तर ज़ुलम ते लालच़ भेरतांए। 40हे बेअक्ल, ज़ैनी बेइरियोवं हिस्सो बनावरोए, तैनी आंट्लेइयों हिस्सो नईं बनेवरो? 41बस्सा एन्त्री चीज़ दान केरा, त हेरा, सब किछ तुश्शे लेई साफ भोइ गालू। 42पन हे फरीसाव, तुसन पुड़ अफ़सोस! तुस पुतनेरो ते ज़ीरेरो ते कने सेब्ज़ारो दशोवं हिस्सो देतथ, पन तुस न्याय केरने करां त परमेशरेरे प्यारे करां दूर रातथ, लोड़तू थियूं कि दशोवं हिस्से सेइं साथी इन भी केरेथे। 43हे फरीसाव, तुसन पुड़ अफ़सोस! तुस लोक चातथ कि प्राथना घरन मां तुसन एग्री कुर्सन पुड़ बिशालन ते बज़ारन मां लोक तुसन कां झुकतां नमस्कार केरन। 44पन हे फरीसाव तुसन पुड़ अफ़सोस! तुस तैन छ़ेपोरी कब्रां केरे ज़ेरेथ, ज़ैन पुड़ लोक च़लतन, पन तैन पतो न भोए।”

45तैखन शास्त्री लोकन मरां एक्‍के तैस जुवाब दित्तो, “हे गुरू एना गल्‍लां ज़ोइतां तू इश्शी तुहीन लगोरोस केरने।” 46यीशुए ज़ोवं, “हे शास्त्री लोकव, तुसन पुड़ अफ़सोस! तुस मैन्हन पुड़ त एत्रो भारो लदतथ ज़ै छ़ूनो असुखतो भोते ते पन एप्पू अपने कानूने मन्नेरी कोशिश भी न केरथ। 47तुसन पुड़ अफ़सोस! तुस नेबी केरि कब्रां बनातथ ते तुश्शे दादे-पड़दादेईं तैना मारोरे थिये। 48बस्सा, तुस शहातथ कि तुस अपने दादे-पड़दादां केरे कम्मां केरि पूरी तैइद केरतथ, किजोकि तैनेईं त नबी कत्ल कमाए ते तुस तैन नेबी केरि कब्रां बनातथ। 49एल्हेरेलेइ प्रभु परमेशरेरी अक्लां ज़ोवं, नबी त प्रेरित तैन कां भेज़नेन तैना तैन मरां किछ कत्ल केरेले ते किछन सताले। 50बस्सा ई कौम सारे नेबी केरे खूनेरे ज़ै दुनियारे शुरू करां देंतो बगेवरोए ज़िमेवार भोल्ही। 51हाबिलेरे खूने करां देंतो ते जकर्याहेरे कत्ले तगर ज़ै तुसेईं मन्दरेरे ते बलिदान केरनेरे ठारारे मझ़ाटे मन्दरेरे अंगने मां कत्ल कियोरो थियो। अवं ज़ोताईं कि ऐह कौम तैन केरे खूनेरी ज़िमेवार भोल्ही। 52पन हे फरीसाव तुसन पुड़ अफ़सोस! तुसेईं शास्त्री लोकेईं चाबी त अपने कब्ज़े मां रख्खी, पन तुस एप्पू भी दाखल न भोए ते ज़ैना दाखल भोनू चाते थिये तैना भी रोके।” 53ज़ैखन यीशु तैट्ठां निस्सी जेव त शास्त्री ते फरीसी लोकेईं तै घेरो ते सरकरे मारे च़ेवरे पासना बड़े असुखते सवाल पुछ़ने लगे। 54ताके यीशुएरे ज़बानरां एरी गल निस्से ज़ैस सेइं लोक तैस पुड़ गलती लांन।

Currently Selected:

लूका 11: BHDNT

Highlight

Copy

Compare