लैव्यव्यवस्था 4
4
पापेरी बलि देनेरी विधि
1फिरी यहोवाए मूसे सेइं ज़ोवं, 2“इस्राएली लोकन सेइं इन ज़ो कि अगर कोई मैन्हु तैन कम्मन मरां ज़ैना यहोवाए ठाकोरन, कोन्ची कम्मे बिसरतां पापी भोइ गाए; 3ते अगर अभिषिक्त याजक#4:3 अभिषिक्त याजक महायाजक एरहो पाप केरे, ज़ैस सेइं लोक पापी बन्न, त अपने पापेरे वजाई सेइं तै अक बगैर नुक्से बछ़ड़ू यहोवारे लेई पापबलि केरतां च़ाढ़े। 4तै तैस बछ़ड़े मिलापे बाले तेम्बेरे दारे पुड़ यहोवा कां नेइतां तैसेरे क्रोड़ी पुड़ हथ रख्खे, ते तैस बछ़ड़े यहोवारे सामने बलि केरे। 5ते अभिषिक्त याजक बछ़ड़ेरे खूने मरां किछ नेइतां मिलापे बाले तेम्बु मां ने; 6ते याजक अपनि अंगलोइ खूने मां डोबी-डोबी ते तैस मरां किछ नेइतां पवित्र ठारारे मझ़ेटियें पड़दे अग्गर यहोवारे सामने सत बार छ़िड़के। 7ते याजक तैस खूने मरां किछ होरो नेइतां खुशबूदार धूपेरी वेदरे शिंगन पुड़ ज़ै मिलापे बाले तेम्बु मांए यहोवारे सामने लाए; फिरी बछ़ड़ेरे सारे खूने वेदरे पेइड़न पुड़ होमबेलरी वेदी ज़ै मिलापे बाले तेम्बेरे दारे पुड़े उलटाए। 8फिरी तै पापबेलरे बछ़ड़ेरी सब चर्भी तैस करां अलग केरे, मतलब ज़ैस चेर्भी सेइं आंट्लां ढेकोरी रैतिन, ते ज़ेत्री चर्भी तैन मां पलैटोरी रहतीए, 9ते दूईये गुर्दे ते तैन पुड़ेरी चर्भी ज़ै ट्लिगे कां रहतीए, ते गुर्दे सने कलैज़े करां बेइयीं झिल्ली, इन सेब्भन तै एन्च़रे अलग केरे, 10ज़ेन्च़रे मेलबेलि बाले च़ाढ़नेरे बछ़ड़े करां अलग किये गातन, ते याजक इन्न होमबेलरी वेदी पुड़ फुक्के। 11पन तैस बछ़ड़ेरी खाड़ी, खुरैड़ू, क्रोड़ी, आंट्लां, गोबर, 12ते सारू मास, मतलब सारू बछ़ड़ू डेरन करां बेइर शुद्ध ठैरी पुड़, ज़ैड़ी मांज़न छ़डी गातीए, नेइतां कैड़न पुड़ रेखतां अग्गी मां फुक्के; ज़ैड़ी मांज़न छ़डी गाचे तैन तैड़ी फुक्कू गाए।
13“अगर इस्राएली लोकां केरि सारी मण्डली ज्ञान न भोनेरे वजाई सेइं पाप केरे ते तै गल मेण्डलरे लोकां केरे एछ़्छ़न करां छ़पोरी भोए, ते तैना यहोवारे कोन्ची हुक्मेरे खलाफ किछ केरतां दोषी भोइ गान; 14त ज़ैखन तैन केरो कियोरो पाप बांदो भोइ गाए तैखन मण्डली एक्की बछ़ड़े पापबलि केरतां च़ाढ़े। तैना तैस मिलापे बाले तेम्बेरे सामने नेन, 15ते मेण्डलरे बुज़ुर्ग लोक अपने-अपने हथ यहोवा कां बछ़ड़ेरे क्रोड़ी पुड़ रखन, ते तैन बछ़ड़ू यहोवारे सामने बलि कियूं गाए। 16तैखन अभिषिक्त याजक बछ़ड़ेरे खूने मरां किछ मिलापे बाले तेम्बु मां ने; 17ते याजक अपनि अंगलोइ खूने मां डोबी-डोबी तैस मझ़ेटियें पड़दे अग्गर सत फेरेईं यहोवारे सामने छ़िड़के। 18ते तैस्से खूने मरां वेदरे शिंगन पुड़ ज़ै यहोवा कां मिलापे बाले तेम्बु मांए आनेलो; ते बच़ोरो सब खून होमबेलरी वेदरे पेइड़न पुड़ ज़ै मिलापे बाले तेम्बेरे दारे पुड़े उलटाए। 19ते तै बछ़ड़ेरी सारी चर्भी केढतां वेदी पुड़ फुक्के। 20ज़ेन्च़रे पापबेलरे बछ़ड़े सेइं कियोरू थियूं तेन्च़रे इस सेइं भी केरे; इस तरीके सेइं याजक इस्राएली लोकां केरे लेई प्रायश्चित देन, तैखन तैन केरो पाप माफ़ कियो गालो। 21ते तैस बछ़ड़े डेरन करां बेइर नेइतां तैस्से तरीके सेइं फुक्के ज़ेन्च़रे पेइलू बछ़ड़ू फुकोरू थियूं; ई त मेण्डलरे लेई पापबलि भोल्ही।
22“ज़ैखन कोई इस्राएली प्रधान पाप केरे, मतलब अपने परमेशर यहोवारे कोन्ची हुक्मेरे खलाफ बिशतां किछ केरतां दोषी भोइ गाए, 23ते तैसेरो पाप तैस पुड़ बांदो भोइ गाए, त तै अक बगैर नुक्से थाव्वो बलि केरनेरे लेई आने; 24ते थाव्वेरे क्रोड़ी पुड़ अपनो हथ रख्खे, ते थाव्वे तैस ठारी बलि केरे ज़ैड़ी होमबेलरे जानबर यहोवा कां बलि किये गातन; ई पापबलि भोल्ही। 25तैखन याजक अपने एंगलोई सेइं पापबेलरे जानबरेरे खूने मरां किछ नेइतां होमबेलरे वेदरे शिंगन पुड़ लाए, ते तैसेरो खून होमबेलरे वेदरे पेइड़े पुड़ उलटाए। 26ते तै तैसेरी सारी चर्भी मेलबेलरी चेर्भी ज़ेरि वेदी पुड़ फुक्के; ते याजक तैसेरे पापेरे लेई प्रायश्चित केरे, तैखन तै माफ़ कियो गालो।
27“अगर आम लोकन मरां कोई अनज़ान भोइतां पाप केरे, मतलब कोई एरू कम ज़ैन यहोवाए ठाकोरू भोए केरतां दोषी भोए, ते तैसेरो तै पाप तैस पुड़ बांदो भोइ गालो, 28त तै तैस पापेरे वजाई सेइं अक बगैर नुक्से छ़ेल्ली बलिदान केरनेरे लेई आने; 29ते तै अपनो हथ पापबलि जानबरेरे क्रोड़ी पुड़ रख्खे, ते होमबेलरे ठारी पुड़ पापबलि जानबरेरी बलि केरे। 30ते याजक तैसेरे खूने मरां अपनि एंगलोई सेइं किछ नेइतां होमबेलरे वेदरे शिंगन पुड़ लाए, ते तैसेरो सब खून तैस्से होमबेलरे वेदरे पेइड़े पुड़ उलटाए। 31ते तै तैसेरी सब चर्भी मेलबेलरे जानबरेरे चेर्भरी ज़ेरि अलग केरे, तैखन याजक तैस वेदी पुड़ यहोवारे लेई आराम देनेबाली खुशबूअरे लेई फुक्के; ते एन्च़रां याजक तैसेरेलेइ प्रायश्चित केरे, तैखन तैस माफ़ी मैल्हेली।
32“अगर तै पापबलि देनेरे लेई अक गबड़ी आने, त तै बगैर नुक्से भोए, 33ते तै अपनो हथ पापबलि जानबरेरे क्रोड़ी पुड़ रख्खे, ते तैस पापेरे बेलरे लेई तैड़ी बलि केरे ज़ैड़ी होमबेलरो जानबर बलि कियो गाते। 34तैखन याजक अपने एंगलोई सेइं पापबेलरे खूने मरां किछ नेइतां होमबेलरे वेदरे शिंगन पुड़ लाए, ते तैसेरे सब खूने होमबेलरे वेदी पुड़ उलटाए। 35ते तै तैसेरी सब चर्भी मेलबेलि बाले गबड़ेरी चेर्भरे ज़ेरे अलग केरे, ते याजक तैस वेदी पुड़ यहोवारे हबनन पुड़ फुक्के; ते एन्च़रां याजक तैसेरे पापेरे लेई प्रायश्चित केरे, तैखन तै माफ़ कियो गालो।”
Currently Selected:
लैव्यव्यवस्था 4: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
