लैव्यव्यवस्था 2
2
अन्नेरी बलि च़ाढ़ेरी विधि
1“ज़ैखन कोई यहोवारे लेई अन्नेरी बलि च़ढ़तल च़ाढ़नी चाहे, त तै मैदो च़ाढ़े; ते तैस पुड़ तेल#2:1 तेल इस्राएली लोक सिर्फ ज़ैतूनेरे तेले ज़ानते थी ते तैस इस्तेमाल केरते थी छ़ेडतां तैस पुड़ लोबान रख्खे; 2ते तै तैस हारूनेरे मट्ठन कां आने ज़ैना याजकन। तैखन याजक अन्नेरे बेलरे तेल मल्लोरे मैदे मरां एन्च़रां अपनि मुठड़ी भेरतां कढे कि सब लोबान तैस मां एज्जी गाए; ते याजक तैन्न याद करानेबाले हिस्सेरे लेई वेदी पुड़ फुक्के कि इन यहोवाए खुश केरनेबालू खुशबूदार हबन भोल्हु। 3ते अन्नेरी बेलि मरां ज़ैन बच़ोरू राए तैन हारून ते तैसेरे मट्ठां केरू भोल्हु; ई यहोवारे बलिदान्न मरां परमपवित्र हिस्सो भोल्हो।
4“ज़ैखन तू अन्नेरी बेलि मरां तंदूरे मां बनेवरी च़ढ़तल च़ाढ़स, त तै तेले सेइं सन्नोरे अखमीरी अट्टेरे फुलके, या तेले सेइं च़ोपड़ोरि अखमीरी रोट्टी केरि भोए। 5ते अगर तेरी च़ढ़तल तव्वे पुड़ पकावरी अन्नबलि भोए, त तै तेले सेइं सन्नोरी अखमीरी अट्टेरी भोए; 6तैस टुक्ड़े-टुक्ड़े केरतां तैस पुड़ तेल छ़डनो, तैखन तै अन्नेरी बलि भोइ गाली। 7ते अगर तेरी च़ढ़तल कढ़ेई मां तल्लोरे अन्नेरी बलि भोए, त तै अट्टे सेइं तेले मां बनेवरी भोए। 8ते ज़ै अन्नेरी बलि इन चीज़न मरां कोन्ची चीज़री बनोरी भोए तैस यहोवा कां नेइयथ; ते ज़ैखन तै याजके कां आनी गाए, तैखन याजक तैस वेदी कां ने। 9ते याजक अन्नेरी बेलि मरां याद करानेबाले हिस्से केढतां वेदी पुड़ फुक्के कि तै यहोवारे लेई खुश केरनेबालू खुशबूदार हबन भोए; 10ते अन्नेरी बेलि मरां ज़ैन बच़ोरू राए तैन हारून ते तैसेरे मट्ठां केरू भोए; तै यहोवारे हबनन मां परमपवित्र हिस्सो भोल्हो।
11“कोई अन्नेरी बलि ज़ैस तुस यहोवारे लेई च़ाढ़थ तै खमीर मिलेइतां बनाई न गाए; तुस कधी हबने मां यहोवारे लेई खमीर ते माछ़ी न फुकथ। 12तुस इन्न पेइली फसलरी च़ढ़तल केरतां यहोवारे लेई च़ैढ़थ, पन तैन खुश केरनेबाली खुशबूअरे लेई वेदी पुड़ च़ाढ़ू न गाए। 13फिरी एपनी सब अन्नेरी बेलन लूनी#2:13 लूनी लूनेरो इस्तेमाल अभिषेक ते किछ पक्कू बनानेरे निशानेरे लेई कियो गातो थियो। बनेइयथ; ते एपनी कोई अन्नेरी बलि अपने परमेशरेरे सेइं कियोरे करारेरे लूने#2:13 करारेरे लूने अक “लूनेरो करार” एसेरो मतलब अक पक्को समझोतो थियो (हेरा गिनती 18.19 ते 2 इतिहास 13.5) ज़ै ट्लोड़ो या तैस मां कोई बदलाव न थियो केरोई सकतो। बगैर भोने न देइयथ; ते अपने सब च़ढ़तलन साथी लून भी च़ैढ़थ।
14“अगर तू यहोवारे लेई पेइली फसलरी अन्नेरी बलि च़ाढ़स, त अपनि पेइली फसलरे अन्नेरी बेलरे लेई अग्गी मां ट्लाड़ोरां नीलां-नीलां शिल्लां, मतलब नीले-नीले शिल्लन ज़ैना हथ्थन सेइं पुच़ोड़तां केढतां ऐन्हां, तैखन अन्न च़ैढ़ां। 15ते तैस मां तेल छ़डनो, ते तैस पुड़ लोबान रखनू; तैखन तै अन्नेरी बलि भोइ गाली। 16ते याजक पुच़ोड़ोरे अन्ने, ते तेले, ते सारे लोबाने याद केरनेबालो हिस्सो केरतां फुक्के; तैन यहोवारे लेई हबन भोल्हु।”
Currently Selected:
लैव्यव्यवस्था 2: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
