यूहन्ना 3

यीशु ते नीकुदेमुस

1फरीसी लोकन मां अक मैन्हु थियो ज़ेसेरू नवं नीकुदेमुस थियूं। तै यहूदी लोकां केरो अक लीडर थियो। 2एक्‍की राती तै यीशु कां एइतां ज़ोने लगो, “हे गुरू, अस ज़ानतम कि तू परमेशरेरी तरफां गुरू भोइतां एवरोस; किजोकि ज़ैना चमत्कार तू हिरातस, होरो कोई न हेरेई सके, ज़ांतगर परमेशर तैस सेइं साथी न भोए।” 3यीशुए जुवाब दित्तो, “अवं तुसन सेइं सच़-सच़ ज़ोताईं कि ज़ांतगर कोई मैन्हु दुबारो ज़र्म न घिन्ने, त तै परमेशरेरू राज़ न लेही सके।”

4नीकुदेमुस पुछ़ने लगो, “ज़ैखन मैन्हु बुढो भोते, त तै केन्च़रे सेइं दुबारो पैदा भोइ सकते? कुन तै अम्मरे पेटे मां गेइतां दुबारो ज़ेर्मी सकते?” 5यीशुए जुवाब दित्तो, “अवं तुसन सेइं सच़-सच़ ज़ोताईं कि ज़ांतगर कोई मैन्हु पैनी सेइं ते आत्माई सेइं पैदा न भोए, तै परमेशरेरे राज़्ज़े मां दाखल न भोइ सके। 6किजोकि हाज-बव अपने बच्‍चन सिर्फ एस जानरी ज़िन्दगी देइ सकतन, पन सिर्फ (पवित्र) आत्मा लोकन आत्मिक ज़िन्दगी देइ सकते। 7हैरान न भो कि मीं तीं सेइं कुन ज़ोवं कि, ‘तीं दुबारो ज़र्म घिन्नू ज़रूरीए।’ 8हवा ज़ेरां च़लनू चातीए तरहां च़लचे, त तू तैसारी आवाज़ त शुन्तस, पन एन न ज़ानस कि तै कोट्ठां एइचे त कोरहां गाचे। तेन्च़रे कोई भी न हेरी सके त न समझ़ी सके कि केन्च़रां पवित्र आत्मा लोकन (नव्वीं) ज़िन्दगी देते।”

9तैखन नीकुदेमुसे पुछ़ू, “एना गल्‍लां केन्च़रे सेइं भोइ सेकतिन पवित्र आत्मा केन्च़रां लोकन नव्वीं आत्मिक ज़िन्दगी देते?” 10यीशुए तैस सेइं ज़ोवं, “तू इस्राएली लोकां केरो (अक खास) गुरू भोइतां भी कुन इना गल्‍लां न समझ़स? 11अवं तीं सेइं सच़-सच़ ज़ोताईं, ज़ैन अस ज़ानतम तैन्ने (लोकन) ज़ोतम, त ज़ैन असेईं लाहेरूए तैसेरे बारे मां (लोकन) गवाही देतम, पन फिर भी तुस लोक इश्शी गवाही न मन्नथ। 12मीं त तुसन सेइं धेर्तारी गल्‍लां केरे बारे मां गल की, त तुसेईं (मीं पुड़) विश्वास न कियूं, त अगर अवं सुर्गेरी गल्‍लां ज़ोईं त तुस केन्च़रे विश्वास केरेले? 13(सुर्गेरी गल्‍लां ज़ान्नेरे लेई कधी) कोई मैन्हु सुर्गे मां नईं जेवरो, सिर्फ तैए ज़ै सुर्गेरां एवरो, यानी अवं मैन्हेरू मट्ठू ज़ैन सुर्गे मां आईं। 14ज़ेन्च़रे मूसा सुनसाने मां (परमेशरेरे लोकन बच़ानेरे लेई पितल सेइं बनोरो) सप (खम्भे पुड़) उच्‍चे पुड़ च़ढ़ाव, तेन्च़रे एन ज़रूरी आए कि (अवं) मैन्हेरू मट्ठू भी उच्‍चे पुड़ च़ाढ़ू गाए। 15ताके ज़ै कोई तैस पुड़ विश्वास केरे, तैस हमेशारी ज़िन्दगी मैल्हे।”

16“किजोकि परमेशरे दुनियारे लोकन सेइं एत्रो प्यार कियो कि तैनी अपनु एकलौतू मट्ठू दित्तू, ताके ज़ै कोई तैस पुड़ विश्वास केरे, तै नाश न भोए, बल्के हमेशारी ज़िन्दगी हासिल केरे। 17किजोकि परमेशरे अपनु मट्ठू दुनियाई मां एल्हेरेलेइ नईं भेज़ोरू कि तै दुनियारे लोकन (तैन केरे पापां केरि) सज़ाह दे, बल्के एल्हेरेलेइ कि दुनियारे लोक तैसेरे ज़िरिये सेइं (पापां केरि सज़ाही करां) मुक्ति हासिल केरन। 18ज़ै तैस पुड़ विश्वास केरते, तैस सज़ाह न मैल्हे। पन ज़ै मट्ठे पुड़ विश्वास न केरे, तै पेइलोए दोषी भोइ जेवरोए, किजोकि तैनी परमेशरेरे एकलौते मट्ठेरे नंव्वे पुड़ विश्वास नईं कियोरो। 19परमेशर, लोकन सज़ाह देनेरी वजा ई आहे कि ज़ैस जो लौ ज़ोतन तै दुनियाई मां एवरीए, परमेशरे अपनि लौ दुनियाई मां भेज़ी, पन लोक ते कने तैन केरां कम्मां बुरां थियां, एल्हेरेलेइ तैनेईं तैस लौई करां जादे पापेरू आंधरू पसंद कियूं। 20ज़ै कोई बुरू कम केरते, तै लौई सेइं नफरत केरते त लौअरे नेड़े न एज्जे, एरू न भोए कि तैसेरे कम्मन पुड़ दोष लाव गाए। 21पन हर कोई ज़ै परमेशरेरी सच़्च़ाई पुड़ च़लते, तै लौई कां एइते, ताके लौई सेइं बांदो भोए कि तैसेरे सब कम्मां परमेशरेरी शक्ति सेइं साथी किये गातन।”

यूहन्ना यीशुएरे बारे मां गवाही देते।

22एना गल्‍लां केरे बाद यीशु त तैसेरे चेले यहूदिया इलाके मां आए, त तैड़ी रेइतां लोकन बपतिस्मो देने लग्गे। 23यूहन्ना भी शालेम नगरेरे नेड़े ऐनोन नंव्वेरे ठैरी लोकन बपतिस्मो देतो थियो। किजोकि तैड़ी हछु पानी थियूं त लोक बपतिस्मो नेनेरे लेई तैस कां एइते रहते थिये। 24किजोकि यूहन्ना हेजू कैदखाने मां न थियो छ़डोरो।

25एक्सां यूहन्नारे चेलां केरि केन्ची यहूदी मैन्हु सेइं (रुवाज़ेरे मुताबिक) शुद्ध भोनेरे बारे मां बेंस भोइ। 26एल्हेरेलेइ यूहन्नारे चेले तैस कां एइतां ज़ोने लगे, “हे गुरू, (तीं पतो आहे) तै मैन्हु ज़ै यरदन दरियारे पार तीं सेइं साथी थियो त कने तीं तैसेरे बारे मां गवाही दित्तोरी थी, हेर, तै भी लोकन बपतिस्मो देते त सब लोक तैस कां गातन!” 27यूहन्ना जुवाब दित्तो, “(तै रोड़ी गल आहे, किजोकि) मैन्हु किछ न हासिल केरि सके, ज़ांतगर तैस सुर्गेरां (यानी परमेशरे करां) न मैल्हे। 28तुस एप्पू मेरे गवाह आथ, कि मीं तुसन सेइं ज़ोवरू थियूं कि अवं मसीह नईं, पन अवं तैस करां पेइले (परमेशरेरां तरफां) भेज़ोरोईं। 29ज़ेसेरी महरनीए त तै महरावे, पन महरावेरो दोस्त ज़ै खड़ोए महरावेरी हर गल खुशी सेइं शुनतो रहते; हुनी मेरी ई खुशी पूरी भोइ। (कि सब लोक तैस कां गातन)। 30एन ज़रूरीए कि तै बधे ते अवं घेटी।”

31“ज़ै (मसीह) सुर्गेरां एइते तै होरि सेब्भन करां महान भोते। त ज़ै मैन्हु धेरती पुड़ेरां भोते, तै धेर्तारोए त धेर्तारी गल्‍लां केरते। ज़ै सुर्गेरां एइते तै सेब्भना उच्‍चो महान भोते। 32तैनी (परमेशरे तरफां) ज़ैन किछ लाव ते शुनेरू, तैसेरे बारे मां लोकन शुनाते, पन तैसेरी गवाही कोई न शुने। 33ज़ै कोई तैसेरी गवाही पुड़ विश्वास केरते, तै तैसेरी तसदीक केरते कि परमेशर सच़्च़ो आहे। 34किजोकि (मसीह) ज़ै परमेशरे भेज़ोरोए, तै परमेशरेरी गल्‍लां ज़ोते, किजोकि परमेशर तैस पवित्र आत्मा नैपतां न दे। 35(परमेशर) बाजी मट्ठे सेइं प्यार रखते, त तैनी सब किछ तैसेरे हावाले कियोरूए। 36ज़ै (परमेशरेरे) मट्ठे पुड़ विश्वास केरते तैस हमेशारी ज़िन्दगी मैलचे, पन ज़ै मट्ठे पुड़ विश्वास न केरे तै ज़िन्दगी करां दूर रालो, ते तैस पुड़ परमेशरेरो क्रोध (हुन्ना करां लेइतां हमेशा) रहते।”

Currently Selected:

यूहन्ना 3: BHDNT

Highlight

Copy

Compare