यूहन्ना 18

यीशु ट्लुवांनो

(मत. 26:47-56;मरक. 14:43-50;लूक. 22:47-53)

1यीशुए ऐह प्राथना केरतां झ़ाड़ी, त अपने चेलन सेइं साथी किद्रोन वैदरे पार जेव। तैड़ी अक बाग थी तै ते तैसेरे चेले तैड़ी जे। 2तैस ट्लुवांने बालो यहूदा तैस ठारारो बाकम थियो, किजोकि यीशु अपने चेलन सेइं साथी तैड़ी केही फेरेईं जेवरो थियो। 3तैखन यहूदा, रोमी सिपाही ते किछ प्रधान याजक ते फरीसी केरे तरफां भेज़ोरे लोकन सेइं साथी एन्हतां दीये ते मिसालां ते हथियार घिन्तां तैड़ी पुज़ाए। 4तैखन यीशु सब गल्‍लां ज़ैना तैस सेइं भोने बैली थी, बुझ़तां तैन सेइं ज़ोने लगो, “तुस केस लगोरेथ तोपने?” 5तैनेईं तैस जुवाब दित्तो, “यीशु नासरी।” यीशुए तैन सेइं ज़ोवं, “अवं तैए आईं।” तैस ट्लुवांने बालो यहूदा भी तैन सेइं साथी खड़खड़ो थियो। 6ज़ैखन यीशुए ज़ोवं, “अवं तैए आईं,” तैना पत्रोवं ज़मीनी पुड़ झ़ड़े। 7एल्हेरेलेइ तैनी फिरी पुछ़ू, “तुस केस लगोरेथ तोपने?” तैनेईं जुवाब दित्तो, “यीशु नासरी।” 8यीशुए जुवाब दित्तो, “मीं त ज़ोवं कि अवं तैए आईं, अगर तुस मीं तोप्पतथ, त एन लोकन गाने देथ।” 9एन एल्हेरेलेइ भोवं, कि तैन वचन पूरू भोए, “ज़ैना तीं मीं दित्ते, तैन मरां मीं अक भी न हिरव।” 10शमौन पतरसे कां अक तलवार थी, तैनी तलवार केढतां महायाजकेरे नौकरे बाई ते तैसेरो देइने कन्न केटव। तैस नौकरे नवं मलखुस थियूं। 11तैखन यीशुए पतरसे ज़ोवं, “अपनि तलवार म्याने मां रख, कुन अवं तै दुखेरो कटोरो न पीं ज़ै मेरे बाजे मीं पीनेरे लेई दित्तोए?”

हन्ना कने यीशु

12तैखन रोमी सिपाही ते तैन केरे सूबेदार ते यहूदी केरे लीडरेईं यीशु ट्लेइतां बन्धो। 13ते पेइलो हन्ना कां नियो किजोकि तै कैफारो शेरहो थियो ज़ै तैस सालेरो महायाजक थियो। 14ई तैए कैफाए ज़ैनी यहूदन सलाह दित्तोरी थी, कि इश्शे लोकां केरे लेई एक्‍की मैन्हेरू मरनू रोड़ूए।

पतरसेरो इन्कार केरनो

(मत. 26:69-70;मरक. 14:66-68;लूक. 22:55-57)

15शमौन पतरस ते अक होरो चेलो यीशु पत्ती जे। तै चेलो महायाजकेरो बाकम थियो, तै यीशु सेइं साथी महायाजकेरे अंगने मां जेव। 16पन पतरस बेइर दारे पुड़ खड़ो थियो, तै होरो चेलो ज़ै महायाजकेरो बाकम थियो वापस अव, ते तैस नौकरैनी सेइं ज़ै दारे पुड़ थी गल केरतां पतरस अन्तर नियो। 17तैस नौकरैनां ज़ै दारे पुड़ थी पतरसे पुछ़ू, “कुन तू भी तैसेरे चेलन मरां आस?” पतरस ज़ोवं, “नईं अवं नईं।” 18ठंडरे वजाई सेइं नौकरेईं ते मन्दरेरे पहरदारेईं अग बालोरी थी, ते पतरस भी तैन सेइं साथी अग लगोरो थियो तपने।

महायाजक यीशु पूछ ताछ केरते

(मत. 26:59-66;मरक. 14:55-64;लूक. 22:66-71)

19तैखन महायाजक यीशुएरे चेलां त कने तैसेरी शिक्षारे बारे मां पुछ़ने लगो। 20यीशुए जुवाब दित्तो, “मीं त सेब्भी केरे सामने सैरी गल्‍लां कियोरिन, मीं त रोज़ तुश्शे प्राथना घरन ते मन्दरे मां, ते ज़ैड़ी यहूदी अकोट्ठे भोतन तैड़ी शिक्षा दित्ती, ते छ़ेपतां किछ भी न ज़ोवं। 21तू मीं ऐह सवाल किजो पुछ़तस? शुन्नेबालन पुछ़ू, कि मीं तैन सेइं कुन ज़ोवरूए? हेर तैन पतोए, कि मीं कुन ज़ोवरूए।” 22ज़ैखन तैनी ज़ोवं, त मन्दरेरे पहरदारन मरां अक ज़ै तैड़ी खड़ो थियो, तैनी यीशुए थप्पड़ बैइतां ज़ोवं, “कुन तू महायाजक एन्च़रे जुवाब देतस?” 23यीशुए तैस जुवाब दित्तो, “अगर मीं किछ बुरू ज़ोवरूए त साबत केर, पन अगर रोड़ू ज़ोवरूए त थप्पड़ किजो बातस?” 24तैसेरां बाद हन्ना यीशुएरे हेजू बन्धोरो थियो तेन्च़रे महायाजक कैफा कां भेज़ो।

पतरस दुबारां इन्कार केरते

(मत. 26:71-75;मरक. 14:69-72;लूक. 22:58-62)

25शमौन पतरस खड़खड़ो अग लगोरो थियो तपने। तैखन केन्चे तैस पुछ़ू, “कुन तू भी तैसेरे चेलन मरां आस?” पतरस इन्कार केरतां ज़ोवं, “नईं अवं नईं।” 26महायाजकेरे नौकरन मरां अक ज़ै तैसेरो रिश्तेदार थियो, ज़ेसेरो कन्न पतरसे तलवारी सेइं कटोरो थियो, ज़ोने लगो, “कुन मीं तू बागी मां यीशु साथी नईं लाहोरो?” 27पतरसे फिरी इन्कार कियो, ते तैखन कुकड़े भी बांग दित्ती।

पिलातुसेरे सामने यीशु

(मत. 27:1-2,11-14;मरक. 15:1-5;लूक. 23:1-5)

28तैनेईं यीशु झ़ेझ़ां कैफा करां रोमी गवर्नर पिलातुसेरे मेहले मां नियो, पन तैना एप्पू अन्तर न जे, ताके भिटे न भोन, ते फ़सह तिहारेरी रोट्टी खेइ बटन। 29तैखन पिलातुस तैन कां बेइर अव ते ज़ोने लगो, “तुस इस मैन्हु पुड़ कुन इलज़ाम लातथ?” 30तैनेईं तैस जुवाब दित्तो, “ऐह मैन्हु मुर्ज़म न भोथो त असेईं ऐह तीं कां न थियो आन्नो।” 31पिलातुसे तैन सेइं ज़ोने लगो, “तुस एस नेथ ते अपने कानूनेरे हिसाबे सेइं फैसलो केरा।” यहूदी लीडर ज़ोने लगे, “असन त केन्ची भी मारनेरी अज़ाज़त नईं।” 32एन एल्हेरेलेइ भोवं कि ज़ैन गल्‍लां यीशुए ज़ोवरी थी, कि तै केरही मौतां मरेलो पूरी भोन।

33तैखन पिलातुस फिरी मेहले मां जेव ते तैनी यीशु कुजेइतां तैस पुछ़ू, “कुन तू यहूदी केरो राज़ोस?” 34यीशुए जुवाब दित्तो, “तू ऐह गल अपनि भोती ज़ोने लगोरोस कि होरेईं मेरे बारे मां तीं सेइं ज़ोवरीए?” 35पिलातुसे जुवाब दित्तो, “कुन अवं यहूदी आईं? तेरी कौमरे ते प्रधान याजकेईं तू मेरे हवाले कियोरोस, तू ज़ो तीं कुन कियोरूए?” 36यीशुए जुवाब दित्तो, “मेरू राज़ इस दुनियारू नईं, अगर दुनियारू भोथू त मेरे चेले जंग केरेथे, ते मीं यहूदी लोकां केरे प्रधानां केरे हथ्थे ट्लेयोने न देथे, पन हुन्ना मेरू राज़ इट्ठेरू नईं।” 37पिलातुसे ज़ोवं, “त कुन तू राज़ोस?” यीशुए जुवाब दित्तो, “तू ज़ोतस कि, अवं राज़ोईं, अवं एल्हेरेलेइ ज़रमोरोंई, ते एल्हेरेलेइ दुनियाई मां एवरोईं कि सच़्च़ेरे बारे मां शिक्षा देईं। ज़ैना सच़्च़े मनतन तैना मेरी गल शुन्तन।” 38पिलातुसे पुछ़ू, “सच़ कुने?”

मौतरे सज़ाहरो हुक्म

(मत. 27:15-31;मरक. 15:6-20;लूक. 23:13-25)

एन ज़ोइतां तै यहूदी लीडरन कां जेव ते ज़ोने लगो, “अवं त एस मैन्हु मुर्ज़म न सेमझ़ी।” 39पन तुश्शे रीतरे मुताबिक अवं फ़सह तिहारेरे मौके पुड़ अक कैदी हथरां छ़डताईं। कुन तुस चातथ कि अवं तुश्शे लेई यहूदी केरे राज़े हथरां छ़ेड्डी? 40तैना फिरी ज़ोरे-ज़ोरे सेइं ज़ोने लगे, एस नन्ना इश्शे लेई बरअब्बा हथरां छ़ड। बरअब्बा अक डैकू थियो।

Currently Selected:

यूहन्ना 18: BHDNT

Highlight

Copy

Compare