यशायाह 50

इस्राएलेरो पाप

1यहोवा ज़ोते, “तुश्शी अम्मरी फारख्ती कोड़िए, ज़ै मीं तैस शारते बार दित्तोरी थी? या मीं तुस कैस बुपैरी जो बेच़े?” यहोवा एन ज़ोते, “शुना, तुसां अपने अधर्मेरे वजाई सेइं बिकी जे, ते तुश्शे पापां केरि वजाई सेइं तुश्शी अम्मा भी शारोरीए। 2एसेरी कुन वजाए कि ज़ैखन अवं अव तैखन कोई न मैल्हो? ते ज़ैखन मीं हक दित्ती, तैखन कोई न कुज्जो? कुन मेरो हथ एत्रो छोट्टो भोवरोए कि छुटेई न सखे? कुन मीं मां छुटानेरी ताकत नईं? हेर, अवं एक्‍की धेमकी सेइं समुन्दरे शुकाताईं, ते अवं बड्डे समुन्दरे रेगिस्तान बनेई सकताईं; ते तैन केरि मेछ़ली बगैर पैने मेरि गैतिन ते शेड़ि गैतिन। 3अवं अम्बरे मन्ना दुखेरो कालो कपड़ो लुवाताईं ते टाट#50:3 टाट दुख बांदो केरनेरे लेई लोक टाट पलैटते थिये। तैन केरू छ़ुंहूं बनाताई।”

हुक्म मन्ने बालो दास

4प्रभु यहोवाए मीं शिखालू कि कुन ज़ोनूए कि अवं थकोरे लोकन अपने वचनेरे ज़िरिये सुमालहने ज़ैनी। झ़ेझ़ां तै मीं रोज़ बींझ़ाते ते मेरे कन खोलते कि अवं चेलेरू ज़ेरू शुनी। 5प्रभु यहोवा मेरो कन खोलोरोए, ते मीं बगावत न की ते न अवं पत्रोवं हटो। 6मीं मारने बालन अपनि पिठ ते अपनि दाड़ी ढ्लुड़ने बालां केरे पासे रख्खी; बेइज़्ज़त भोने ते तैन केरे थुकने सेइं मीं अपनु तुत्तर न छ़ुपाव।#मत. 26:67;इब्रा. 12:2.

7किजोकि प्रभु यहोवा मेरी मद्दत केरते, एल्हेरेलेइ मीं शर्म न की; बल्के अपनु कुपा चमकेरू ज़ेरू सखत कियूं किजोकि मीं याकीन थियूं कि तीं शरमिन्दा न भोनू पेलू। 8मीं ज़ै परमेशर धर्मी ठहराते तै मेरे नेड़े। मीं सेइं कौन मुकदमो केरेलो? असां आमने-सामने खड़े भोम। मेरे खलाफ कौने? तै मीं कां नेड़े एज्जे।#रोम. 8:33-34. 9शुना, प्रभु यहोवा मेरी मद्दत केरते; मीं कौन दोषी ठहरेई सकेलो? हेरा, तैना सब कपड़ेरे ज़ेरे पुराने भोइ गाले; ते तैन कीड़े खाएले।

10तुसन मां कौने ज़ै यहोवारो डर मन्ते ते तैसेरे दासेरी गल्‍लां शुनते, ज़ै आंधरे मां च़लतो भोए ते तैस कां लौ न भोए? तै यहोवा पुड़ भरोसो रख्खे, ते अपने परमेशरे पुड़ उमीद रख्खे। 11हेरा, तुसां ज़ैना अग बालतथ ते अग्गरे तीर अपने लख्खे मां रखतथ! तुसां सब एपनी बैलोरी अग्गी मां ते अपने बालोरे अग्गरे तीरन मां एप्पु च़ला। तुश्शी ऐह हालत मेरी वजाई सेइं भोल्ही, तुसां दुखे मां पेवरे राले।

Currently Selected:

यशायाह 50: BHDNT

Highlight

Copy

Compare