हाग्गै 2
2
परमेशरेरे भवनेरी एजनेबाली महिमा
1फिरी सत्तोवं महीनेरे इक्कीहोवं दिहाड़े यहोवा परमेशरे हाग्गै नेबी सेइं ज़ोवं, 2“शालतीएलेरे मट्ठे यहूदारे हाकिम जरुब्बाबेल, ते यहोसादाकेरे मट्ठे यहोशू महायाजके ते मेरे सेभी बच़ोरे लोकन सेइं ऐह गल ज़ो, 3‘तुसन मरां कौने, ज़ैनी इस भवनेरी पेइली महिमा लाहोरीए? ते हुनी तुसां एस कौस हालती मां हेरतथ? कुन एन सच़ नईं कि एन तुश्शी नज़री मां पेइलेरे मुताबिक किछ भी रोड़ू नईं? 4फिरी भी, यहोवा एन ज़ोते, हे जरुब्बाबेल, हिम्मत रख; ते हे यहोसादाकेरे मट्ठा यहोशू महायाजक हिम्मत रख। ते यहोवा एन भी ज़ोते कि मुल्खेरे सब लोकव हिम्मत रेखतां एन कम्मां केरा, किजोकि अवं तुसन सेइं साथी आईं सेना केरो यहोवा एन ज़ोते। 5तुश्शे मिस्र मुल्खेरां निसनेरे मौके ज़ै करार मीं तुसन सेइं कियोरो थियो, तैस्से करारेरे मुताबिक मेरी आत्मा तुसन सेइं बनोरी राली; एल्हेरेलेइ तुसां न डेरथ। 6किजोकि सेना केरो यहोवा एन ज़ोते, हुनी थोड़ू ज़ेरू च़िर राहोरूए कि अवं अम्बर ते धरती ते समुन्दर ते स्थल सब किछ हिलेइलो।#मत. 24:29;लूक. 21:26;इब्रा. 12:26,27. 7ते अवं सैरी कौमन हिलेइलो, ते सैरी कौमन मन पसंद चीज़ां मैल्हेली; ते अवं इस भवने एपनी महिमा सेइं भेरि देइलो सेना केरो यहोवा एन ज़ोते। 8चाँदी त मेरीए, ते सोन्नू भी मेरूए, सेना केरो यहोवा एन ज़ोते। 9इस भवनेरी महिमा पेइले करां भी जादे भोल्ही, सेना केरे यहोवा एन ज़ोते, ते इस ठैरी मां अवं शान्ति देइलो, सेना केरो यहोवा एन ज़ोते।’”
लोकां केरू भ्रष्ट भोनू
10दारा राज़ेरी हुकूमतरे दूइयोवं सालेरे नंव्वोवं महीनेरे च़ौबियोवं दिहाड़े यहोवा हाग्गै नेबी सेइं ज़ोवं, 11“सेना केरो यहोवा एन ज़ोते: याजकन करां एस गल्लरो कानून पुछ़, 12‘अगर कोई अपने लिगड़ेरे पोट्टे मां पवित्र मास बेन्धतां तैस्से लिगड़े मां रोट्टी या दाछ़रो रस या खानेरी कोई भी चीज़ तैस सेइं हुरे, त तै खानेरी चीज़ कुन पवित्र भोल्ही?’” याजकेईं जुवाब दित्तो “नईं।” 13फिरी हाग्गै नेबे पुछ़ू, “अगर कोई मैन्हु कोन्ची मैन्हेरी लाशी सेइं हुरतां अशुद्ध भोइतां कोन्ची एरी चीज़ी सेइं हुरे, त तै कुन अशुद्ध भोल्ही?” याजकेईं जुवाब दित्तो, “हाँ तै अशुद्ध भोल्ही।” 14फिरी हाग्गै नेबे ज़ोवं, “यहोवा एन ज़ोते, कि इना लोक ते ई कौम तेरही आहे, ते एनकेरां सारां कम्मां एरां आन; ते एना ज़ैन किछ भी तैड़ी च़ाढ़तन, तैन भी अशुद्धे।”
बरकतरो वाधो
15यहोवा ज़ोते, “ते हुनी सोच-विचार केरा, कि अज़ करां पेइले मतलब ज़ैखन यहोवारे भवने मां घोड़े पुड़ घोड़ रख्खो न थियो जेवरो, 16तैन दिहैड़न मां ज़ैखन कोई अन्नेरी 200 किल्लो केरि उमीदी सेइं गाते, तैखन तैस कां सिर्फ 100 किल्लो थी, ते ज़ैखन कोई दाछ़रे रसेरे कुण्डे कां एस उमीदी सेइं गातो थियो कि 100 लीटर भेरतां आनेलो, त तैखन 40 लीटर निस्तो थियो।
17“मीं तुश्शी सारी फसल शोहे सेइं ते गेरूई ते आणी सेइं खतम केरतां छ़डी, फिरी भी तुसां मेरे पासे न फिरे, यहोवा एन ज़ोते। 18ते हुनी सोच-विचार केरा, कि अज़ करां पेइले मतलब ज़ैस दिहाड़े यहोवारे भवनेरी बुनीयाद रख्खी जेई, तैस दिहाड़े करां नंवोवं महीनेरे च़ौबियोवं दिहाड़े तगर कुन हालत थी? इस गल्ली पुड़ सोच विचार केरा। 19कुन हुन्ना तगर बीज़ कोठारे मांए? कुन अज़ तगर दाछ़, ते फैगू ते अनार ते ज़ैतूनेरे बुट्टन फल नईं लगोरो, पन अज़्ज़ेरे दिहाड़े करां अवं तुसन बरकत देतो रालो।”
20तैस्से महीनेरे च़ौबियोवं दिहाड़े दूइयोवं फेरे यहोवा हाग्गै नेबी सेइं ज़ोवं, 21“यहूदारे हाकिम जरुब्बाबेले सेइं एन ज़ो; अवं अम्बर ते धरती दूईने हिलेइलो,#मत. 24:29;लूक. 21:26. 22ते अवं रियासतां-रियासतां केरे तखते बुछ़ोड़ेलो। ते अवं गैर कौमां केरे रथ्थन सुवारन समेत उलटालो; ते घोड़न समेत सुवार हर कोई अपने ढ्लाएरे तलवारी पुड़ बिछ़ड़ेलो। 23सेना केरो यहोवा एन ज़ोते, तैस दिहाड़े, हे शालतीएलेरे मट्ठा मेरे दास जरुब्बाबेल, अवं तीं नेइतां मोहोरी बैली एंवठरो ज़ेरो रखेलो, यहोवा एन ज़ोते; किजोकि मीं तू च़ुनोरोस, सेना केरो यहोवा एन ज़ोते।”
Currently Selected:
हाग्गै 2: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
