उत्पत्ति 6
6
परमेशरेरां मट्ठां ते मैन्हु केरि कुइयां
1फिरी ज़ैखन मैन्हु धेरती पुड़ बड़े बधने लगे, ते तैन केरि कुइयां पैदा भोइ, 2तैखन परमेशरेरे मट्ठेईं#6:2 परमेशरेरे मट्ठेईं सुर्गेरे प्राणी। मैन्हु केरि कुइयां तेक्की, कि तैना खूबसूरतन; ते तैनेईं ज़ै-ज़ै चाई तैस सेइं ड्लाह बनाव। 3तैखन यहोवा ज़ोवं, “मेरी आत्मा#6:3 मेरी आत्मा ज़ै ज़िन्दगी देतीए इन्साने मां हमेशा न राहेली, किजोकि मैन्हु भी शरीर#6:3 शरीर मतलब कि मरनेबालोए। आहे; तैसेरी उमर 120 साल भोल्ही।” 4तैन दिहाड़न मां धेरती पुड़ महाबली रहते थिये; ते इसेरे बदले ज़ैखन परमेशरेरे मट्ठा मैन्हेरी कुइयन कां जेआं तैखन तैन केरे ज़िरिये ज़ै औलाद पैदा भोइ, तैना मट्ठा शूरबीर भोतां थियां, ज़ैन केरि मुशूरी पुराने ज़माने करां आहे।
परमेशरेरे ज़िरिये न्यायेरो फैसलो
5यहोवा हेरू कि मैन्हु केरि बुराई धेरती पुड़ बेद्धी जेवरीए, ते तैन केरे मनेरे खियालन मां ज़ैन किछ पैदा भोते तैन लगातार बुरू भोते। 6ते यहोवा धेरती पुड़ मैन्हु बनाने करां पशतावं, ते तै मने मां बड़ो दुखी भोव। 7तैखन यहोवा ज़ोवं, “अवं मैन्हु ज़ेसेरी मीं रच़ना कियोरीए धेरती पुड़ेरां मिटेई देलो; कुन मैन्हु, कुन जानबर, कुन पेटेरे भारे च़लनेबाले जीप, कुन अम्बरेरां च़ुड़ोलू, सब मिटेइलो, किजोकि अवं तैन बनाने करां पसताताईं।”
नूहे पुड़ परमेशरेरी सिद्धी नज़र
8पन यहोवा परमेशरेरी सिद्धी नज़र नूहे पुड़ बनोरी राई। 9नूहेरी खानदानी ई आहे। नूह अक धर्मी मैन्हु थियो, ते तै अपने वक्तेरे लोकन मां सच़्च़ो थियो; ते नूह परमेशरे साथी-साथी च़लतो राव। 10ते नूहे ट्लाई मट्ठां भोआं तैन केरां नंव्वां शेम, हाम, ते येपेत थियां। 11तैस वक्ते धरती परमेशरेरी नज़री मां बिगड़ी जेवरी थी, ते ज़ुलमे सेइं भेरि जेवरी थी। 12ते परमेशरे धेरती पुड़ नज़र की त कुन हेरू कि तै बिगड़ी जेवरीए; किजोकि सब प्रैणेईं धेरती पुड़ अपनो-अपनो चाल चलन बगाड़ोरो थियो।
13एस्से वजाई सेइं परमेशरे नूहे सेइं ज़ोवं, “सब प्रैणी केरो खातमों केरनेरो सवाल मेरे सामने एवरोए; किजोकि तैन केरे वजाई सेइं धरती ज़ुलमे सेइं भेरोई जेवरीए, एल्हेरेलेइ अवं तैन्न धेरती सने नाश केरि छ़डेलो। 14एल्हेरेलेइ तू गोपेर बुट्टेरे लेकड़रू अक ज़िहाज़ बना, तैस मां कमरे बनेइयां, ते अन्तर बेइर तैस पुड़ गारो लेइयां। 15इस तरीके सेइं तू तैस बनेइयां: ज़िहाज़ेरी लम्बाई 300 हथ, चौड़ाई 50 हथ, ते ऊँचाई 30 हथ भोए। 16ज़िहाज़े मां अक दारी बनेइयां, ते तैसेरे अक हथ बह तैसेरी छत बनेइयां, ते ज़िहाज़ेरे एक्की पासे अक दार रेखा, ते ज़िहाज़े मां पेइलो, दूइयोवं, ते ट्लेइयोवं हिस्सो बनेइयां। 17ते शुन, अवं एप्पु धेरती पुड़ पैनेरी हड़ाई भेज़तां सब प्रैणन, ज़ैन मां ज़िन्दगरी सांसे, अम्बरेरे बुन नाश केरने पुड़ आईं; ते ज़ैना सब धेरती पुड़न मेरि गाले। 18पन तीं सेइं अवं करार केरताईं; एल्हेरेलेइ तू अपने मट्ठन, कौन्शी, ते नुशन सने ज़िहाज़े मां अन्तर गेइयां। 19ते सब ज़ींते प्रैणन मरां, तू एक्की-एक्की किसमेरे दूई-दूई, मतलब अक नर ते अक मादा ज़िहाज़े मां नेइतां, एप्पु साथी ज़ींते रेखां। 20हर किसमेरां च़ुड़ोलू, ते किसमेरे जानबर, ते हर किसमेरे धेरती पुड़ पेटेरे भारे च़लनेबाले, सेब्भन मरां दूई-दूई तीं कां एज्जेले, कि तू तैन्न ज़ींते रख्खस। 21ते किसमां-किसमां केरि खानेरी चीज़ां, तैन्न तू नेइतां एप्पु कां अकोट्ठे केरतां रेखां; तैना तेरे ते तैन केरे खानेरे लेई भोल्ही।” 22परमेशरेरे इस हुक्मेरे मुताबिक नूहे कियूं।
Currently Selected:
उत्पत्ति 6: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
