उत्पत्ति 48

याकूब यूसुफेरे मट्ठन आशिर्वाद देते

1किछ च़िरेरां पत्ती केन्चे यूसुफे सेइं ज़ोवं, “शुन, तेरो बाजी बिमारे।” तैखन तै मनश्शे ते एप्रैम नंव्वेरां अपना दूईये मट्ठां साथी नेइतां तैस कांजो च़लो। 2केन्चे याकूबे सेइं ज़ोवं, “तेरू मट्ठू यूसुफ तीं कां एज्जी राहोरूए,” तैखन इस्राएल अपनो आप सम्भैलतां खट्टी पुड़ बिश्शी जेव। 3ते याकूबे यूसुफे सेइं ज़ोवं, “सर्वशक्तिमान परमेशरे कनान मुल्खेरे लूज नगरे मां मीं दर्शन देइतां बरकत दित्ती। 4परमेशरे मीं सेइं ज़ोवं ‘शुन, अवं तीं फलवन्त केरतां खूब बधेइलो, ते अवं तीं रियासत-रियासतरी मेण्डलरू मूल बनेइलो, ते तेरे बाद तेरे खानदाने ई मुल्ख देइलो, ज़ैस सेइं कि तै हमेशा तगर तैन केरि अपनि ज़मीन बनोरी राए।’ 5ते ज़ैखन तेरां दूई मट्ठां, ज़ैना मिस्र मुल्खे मां मेरे एजने करां पेइले पैदा भोआं, तैना मेरां भोल्हां; मतलब ज़ेन्च़रे सेइं रूबेन ते शिमोन मेरे आन, तेन्च़रे सेइं एप्रैम ते मनश्शे भी मेरे भोल्हे। 6ते तैन केरे बाद तैन केरि ज़ै औलाद भोल्ही, तै तेरी भोल्ही, पन कनारे गानेरे मौके तैना अपने ढ्लां केरे खानदाने मां गने गाले। 7ज़ैखन अवं पद्दानेरां एवरो थियो, तैखन एप्राता पुज़ने करां थोड़े ज़ेरे दूर पेइले राहेल कनान मुल्खे मरां अग्रोवं निस्तां बत्ती मां मेरि जेई; ते मीं तैस तैड़ी, मतलब एप्राता ज़ैस जो बैतलहम ज़ोतन, तैसेरी बत्ती मां मित्ती दित्ती।”

8तैखन इस्राएले यूसुफेरां मट्ठां लआं, ते तैनी पुछ़ू, “इना कैसेरां मट्ठन?” 9यूसुफे अपने बाजी सेइं ज़ोवं, “इना मेरां मट्ठन, ज़ैना परमेशरे मीं इड़ी दित्तोरन।” तैनी ज़ोवं, “एन मीं कां आन ते अवं एन आशिर्वाद देईं।” 10इस्राएले बुढे बारे एछ़्छ़ी केरि लौ घट भोइ जेवरी थी, इड़ी तगर कि तैस घट लेइहोतू थियूं। तैखन यूसुफ तैन मट्ठन नेइतां अपने बाजी कां जेव; ते तैनी तैना फुम्मड़ी देइतां गले लाए। 11तैखन इस्राएले यूसुफे सेइं ज़ोवं, “मीं उमीद न थी, कि अवं तेरू तुत्तर दुबारां लेही बेटि: पन हेर, परमेशरे मीं तेरी औलाद भी हिराई।” 12तैखन यूसुफे तैना अपने बाजी केरे ज़ैधू केरे मझ़ाटेरां उरां केढतां ते अपने तुत्तरेरे भारे तल्‍ले झुकतां मथ्थो टेको। 13तैखन यूसुफे तैना दूईये मट्ठां एन्हतां, मतलब एप्रैम अपने देइने हथ्थे सेइं, कि तै इस्राएलेरे बांए हथ्थे पे, ते मनश्शे अपने बांए हथ्थे सेइं, कि इस्राएलेरे देइने हथ्थे पे, तैना तैस कां नेइतां जेव। 14तैखन इस्राएले अपनो देइनो हथ अग्रोवं केरतां एप्रैमेरे दोग्गे पुड़ ज़ै निकड़ो थियो, ते अपनो बांओ हथ अग्रोवं केरतां मनश्शेरे दोग्गे पुड़ रख्खो; तैनी त तैन ज़ैनी बुझ़तां एरू कियूं; नईं त बड्डो मनश्शे थियो। 15फिरी तैनी यूसुफे आशिर्वाद देइतां ज़ोवं, “परमेशर ज़ेसेरे सामने मेरे दादे-पड़दादे अब्राहम ते इसहाक च़लते थिये, तैए परमेशर मेरे ज़रमनेरां लेइतां अज़ तगर मेरो पुहालेरो ज़ेरो मेरी रखवाली केरनेबालो बनोरो राव। 16ते तैए दूत मीं सारी बुरैई करां छुटातो राव, तैए हुनी इन मट्ठन बरकत दे; ते इन जो मेरे बाजी-दादे अब्राहम ते इसहाकेरि औलादरे ज़ोले; ते धेरती पुड़ खूब जादे बधेले।”

17ज़ैखन यूसुफे तक्‍कू कि मेरे बाजे अपनो देइनो हथ एप्रैमेरे दोग्गे पुड़ रखोरोए, तैखन ई गल तैस बुरी लग्गी; एल्हेरेलेइ तैनी अपने बाजी केरो हथ इस इरादे सेइं ट्लेइ छ़डो, कि एप्रैमेरे दोग्गे पुड़ेरां खड़ो केरतां मनश्शेरे दोग्गे पुड़ रख्खे। 18ते यूसुफे अपने बाजी सेइं ज़ोवं, “हे बाजी, एन न केरा; किजोकि बड्डो त ईहीए; अपनो देइनो हथ इसेरे दोग्गे पुड़ रख।” 19तैसेरे बाजे ज़ोवं, “नईं, शुन, हे मेरे मट्ठा, अवं इस गल्‍ली रोड़ेच़ारे ज़ानतां, हांलाकि इस मरां भी मैन्हु केरि अक बड़ी कौम पैदा भोल्ही, ते ई भी बड़ो भोइ गालो, तांभी इसेरो निकड़ो ढ्ला इस करां जादे महान भोइ गालो, ते एसेरे खानदाने मरां भी हेछी कौमां निसेली।” 20फिरी तैनी तैस्से दिहाड़े इन ज़ोइतां तैन आशिर्वाद दित्तो, “इस्राएली लोक तेरू नवं घिन्तां आशिर्वाद देंते राले, ‘परमेशर तीं एप्रैम ते मनश्शेरे बराबर बनाए,’” ते तैनी मनश्शे करां पेइले एप्रैमेरू नवं घिन्नू। 21तैखन इस्राएले यूसुफे सेइं ज़ोवं, “हेर, अवं त मरनेबालोईं, पन परमेशर तुसन सेइं साथी रालो, ते तुसन तुश्शे दादे-पड़दादां केरे मुल्खे मां फिरी पुज़ालो। 22ते अवं तीं तेरे ढ्लान करां जादे ज़मीनरो #48:22 ज़मीनरो शेकेम नगर।अक हिस्सो देताईं, मीं एमोरी लोकां केरो मुकाबलो कियो ते तैना धनुषेरे ताकती सेइं हाराए।”

Currently Selected:

उत्पत्ति 48: BHDNT

Highlight

Copy

Compare