उत्पत्ति 43
43
बिन्यामीने सेइं साथी मिस्र मुल्खे गानू
1कनान मुल्खे मां काल होरो भी जादे बद्धतो जेव। 2ज़ैखन तैनेईं तैन अन्न ज़ैन तैनेईं मिस्रे मरां आनोरू थियूं, खतम भोइ जेवं, तैखन तैन केरे बाजे तैन सेइं ज़ोवं, “फिरी गेइतां इश्शे लेई थोड़ी ज़ेरि खानेरी चीज़ां घिन्तां एज्जा।” 3तैखन यहूदाए तैस सेइं ज़ोवं, “तैनी मड़दे असन खबरदारी देइतां ज़ोवरूए, ‘अगर तुश्शो ढ्ला तुसन सेइं साथी न अव, त तुस मेरे सामने न एज्जी सकेले।’ 4एल्हेरेलेइ अगर तू इश्शे ढ्लाए असन सेइं साथी भेज़तस त तैखन अस गेइतां तेरे लेई खानेरी चीज़ां घिन्तां एजमेले। 5पन अगर तू तैस न भेज़स, त अस न गाम, किजोकि तैनी मैन्हे असन सेइं ज़ोवरूए, अगर तुश्शो ढ्ला तुसन सेइं साथी न अव, त तुस मेरे सामने न एज्जी सकेले।” 6तैखन इस्राएले ज़ोवं, “तुसेईं तैस मड़दे सेइं एन किजो ज़ोवं, कि इश्शो अक होरो भी ढ्लाए, किजो तुसेईं मीं सेइं बुरो बर्ताव कियो?” 7तैनेईं ज़ोवं, “ज़ैखन तैनी मड़दे इश्शे कुटमेरे बारे मां बड़े रोड़ेच़ारे पुछ़ू, ‘कुन तुश्शो बाजी हुन्ना तगर ज़ींतोए? कुन तुश्शो कोई होरो ढ्ला भी आहे?’ तैखन असेईं इन सवालां केरे मुताबिक तैस जुवाब दित्तो; फिरी असन कुन पतो थियो कि तै ज़ोलो, कि अपने ढ्लाए इड़ी आनां।” 8फिरी यहूदाए अपने बाजी इस्राएले सेइं ज़ोवं, “तैस मट्ठे मीं सेइं साथी भेज़, कि अस च़ले गाम; एस सेइं अस, ते तू, ते इश्शे बाल-बच्चे न मरेले, बल्के ज़ींते राले। 9अवं तैसेरी ज़िमेवारी नेताईं; मेरे हथ्थे मरां तू तैस वापस नेइयां। अगर अवं तैस तीं कां पुज़ेइतां तेरे सामने खड़ो न केरि देईं, तां त अवं हमेशारे लेई तेरो पापी भोल्हो। 10अगर असां लोक च़िर न लामेथे, त हुन्ना तगर दूइयोवं फेरो लेइतां वापस एजनू थियूं।”
11तैखन तैन केरे बाजी इस्राएले तैन सेइं ज़ोवं, “अगर सच़्च़े एरी गल्ले, त इन केरा कि; इस मुल्खेरी रोड़ी-रोड़ी चीज़न मरां किछ-किछ अपने बोरन मां तैस मड़देरे लेई तोफे नेइतां गाथ: ज़ेन्च़रे थोड़ू ज़ेरू बलसान, ते थोड़ू ज़ेरू माछ़ी, ते किछ खुशबूदार चीज़ां, ते गन्धरस, पिस्ते ते बदाम नेथ। 12फिरी अपने-अपने साथी दुगने रुपेइये नेथ; ते ज़ैना रुपेइये तुश्शे बोरन मां रेखतां वापस भेज़ोरे थिये, तैना भी नेइतां गाथ; भोइ सकते टेपलोइतां एन भोवरू भोए। 13अपने ढ्लाए भी साथी नेइतां तैस मैन्हु कां फिरी गाथ। 14ते सर्वशक्तिमान परमेशर तैस मैन्हु तुसन पुड़ महरबान केरेलो, ज़ैस सेइं कि तै तुसन ते दूइयोवं ढ्लाए शिमोने ते बिन्यामीने भी एजने दे: ते अगर अवं बेऔलाद भोव त भोने देथ।” 15तैखन तैन मैन्हेइं तै तोफो, ते दुगने रुपेइये, ते बिन्यामीन भी साथी नेइतां च़ले जे, ते मिस्रे मां पुज़तां यूसुफेरे सामने हाज़र भोए।
यूसुफेरे घरे तैसेरे ढ्लां
16तैन सेइं साथी बिन्यामीन लेहितां यूसुफे अपने घरेरे अधिकारी मैन्हु सेइं ज़ोवं, “तैन मैन्हन घरे पुज़ा, ते जानबर मैरतां रोट्टी तियार केरा; किजोकि तैना लोक दीसां मीं सेइं साथी रोट्टी खाएले।” 17तैखन तैने अधिकारी मैन्हें यूसुफेरे ज़ोनेरे मुताबिक तैना मैन्हु यूसुफेरे घरे निये। 18ज़ैखन तैना यूसुफेरे घरे पुज़ाए त तैखन तैना एप्पु मांमेइं डेरतां ज़ोने लगे, “ज़ैना रुपेइये पेइले फेरे इश्शे बोरन मां रेखतां वापस भेज़ोरे थिये, तैल्हेरेलेइ असां फिरी लूशी एवरेम, कि तै मैन्हु असन जो सेरकोए न, ते अपने कब्ज़े मां केरतां असन नौकर न बनाए, ते इश्शे गधे भी घिन्नी न गाए।” 19तैखन तैना यूसुफेरे घरेरे अधिकैरी कां नेड़े गेइतां घरेरे दारे मां एन्च़रां ज़ोने लगे, 20“हे इश्शे मालिक, ज़ैखन अस पेइली बार अन्न घिन्नेरे लेई एवरे थिये, 21तैखन असेईं धर्मशाली मां पुज़तां एपनी बोरी खोल्ली, त कुन हेरू, कि हर एक्की मैन्हेरे रुपेइये तैसेरी बोरी मां बह रखोरे मैल्हे; एल्हेरेलेइ असेईं तैना फिरी साथी आनोरेन। 22ते होरे रुपेइये भी खानेरी चीज़ां घिन्नेरे लेई साथी आनोरेन; असां न ज़ानम कि इश्शे रुपेइये इश्शे बोरन मां केनि रखोरे थिये।” 23तैनी ज़ोवं, “तुश्शू भलू भोए, डरा न। तुश्शे परमेशरे, ज़ै तुश्शे बाजी केरो भी परमेशरे, तैनी तुसन तुश्शे बोरन मां धन दित्तोरू भोल्हु, तुश्शे रुपेइये त मीं मैल्ही जेवरे थिये।” फिरी तैनी शिमोन केढतां तैन केरे हावाले केरि दित्तो। 24तैखन तैनी मैन्हें तैना मैन्हु यूसुफेरे घरे नेइतां पानी पियावं, तैखन तैनेईं अपने पव धोए; फिरी तैनी तैन केरे गधां केरे लेई दानो आनो। 25तैखन तैनेईं एन शुन्तां, कि अज़ असेईं इड़ी रोट्टी खानिएं, तैनेईं यूसुफेरे एजने तगर मतलब दुपहरन तगर, तैना तोफे अकोट्ठे केरतां रख्खे। 26ज़ैखन यूसुफ घरे अव, तैखन तैना तोफे ज़ैना तैनेईं अपने हथ्थे मां रखोरे थिये, तैसेरे सामने घरे मां निये, ते तल्ले झुकतां तैस कां मथ्थो टेको। 27तैनी तैन केरो हाल चाल पुछ़ो ते ज़ोवं, “कुन तुश्शो बुढो बाजी ज़ेसेरी तुसेईं गल लेवरी थी, ठीके? कुन तै हुन्ना तगर हेजू ज़ींतोए?” 28तैनेईं ज़ोवं, “हाँ तेरो नौकर इश्शो बाजी ठीके, ते हुन्ना तगर ज़ींतोए।” तैखन तैनेईं मथ्थो टेको। 29तैखन तैनी अपनो सक्को ढ्ला बिन्यामीन लेहितां पुछ़ू, “कुन तुश्शो तै निकड़ो ढ्ला, ज़ेसेरे बारे मां तुसेईं मीं सेइं ज़ोवरू थियूं ईए?” फिरी तैनी ज़ोवं, “हे मेरे मट्ठा, परमेशर तीं पुड़ अनुग्रह केरे।” 30तैखन अपने ढ्लाएरे प्यारे सेइं तैसेरो मन भेरोई जेव, ते एन सोचतां कि अवं कोड़ि गेइतां लेरां देईं, यूसुफ लूशी अपने कमरे मां जेव, ते तैड़ी लेरां लगो देने। 31फिरी अपनु तुत्तर धोइतां निस्सी अव, ते अपने आपे च़ुप केरतां ज़ोवं, “रोट्टी आनां।” 32तैखन रोट्टी बन्टने बालेईं तैसेरेलेइ त अलग, ते तैसेरे ढ्लां केरे लेई भी अलग, ते ज़ैना मिस्री मेहमान तैस सेइं साथी खाते थिये, तैन केरे लेई भी अलग रोट्टी आनी; एल्हेरेलेइ कि मिस्री इब्रानी लोकन सेइं साथी रोट्टी खाने करां नफरत केरते थिये। 33त यूसुफेरे ढ्ला तैसेरे सामने, बड्डे-बड्डे पेइले, ते निक्के-निक्के पुतोरां, एपनी-एपनी उमरारे मुताबिक, बारी सेइं बिशाले; इन हेरतां तैना एक्की होरि आमने सामने तकने लगे। 34तैखन यूसुफ अपने तुत्तरे अगरां खानेरी चीज़ां हथ्थे सेइं ट्लेइ ट्लेइतां अपने ढ्लान कांजो देने लगो, ते बिन्यामीने तैन करां पंच़ गुणा जादे हिस्सो मैल्हो। ते तैनेईं तैस सेइं साथी मन मेर्ज़रू खवं पीवं।
Currently Selected:
उत्पत्ति 43: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.