उत्पत्ति 4
4
कैन हाबिले मारते
1ज़ैखन आदम अपने कौन्शी हव्वा कां जेव तैखन तै दोज़ींती भोइ ते तैसां कैने ज़र्म दित्तू ते ज़ोवं, “मीं यहोवारे मद्दती सेइं अक मट्ठू मैल्होरूए।” 2फिरी तैसां तैसेरे ढ्ला हाबिले भी ज़र्म दित्तू, हाबिल गब्बां केरो पुहाल बेनि जेव, पन कैन धेरती पुड़ ज़मीनदारी केरनेबालो ज़मीनदार बनो। 3किछ दिहाड़ना बाद कैन यहोवारे लेई ऊडारां केरि फसली मरां किछ च़ढ़तल घिन्तां अव। 4ते हाबिले भी एपनी भैड्डां-छ़ेल्ली केरे किछ ज़ेठे बच्चन बलिदान देनेरे लेई आने ते तैन केरि चर्भी च़ढ़तल च़ाढ़ी; तैखन यहोवा परमेशरे हाबिल ते तैसेरी च़ढ़तल कबूल की, 5पन कैन ते तैसेरी च़ढ़तल तैने कबूल न की। एल्हेरेलेइ कैने बड़ी सरक अई, ते तैसेरे तुत्तरे पुड़ उदासी पेई जेई। 6तैखन यहोवा कैने सेइं ज़ोवं, “तीं किजो सरक अई? ते तेरे तुत्तरे पुड़ उदासी किजो पेई? 7अगर तू भलू केरस, त कुन तेरी च़ढ़तल कबूल न की गाली? ते अगर तू भलू न केरस, त पाप दारे पुड़ छ़पोरो रहते, ते तैसेरी खुवैइश तेरे पासे भोल्ही, तू तैस अपने कैबू मां केर।”
8तैखन कैने अपने ढ्लाए हाबिल सेइं ज़ोवं; एई असां उडारे मां गाम#4:8 एई असां उडारे मां गाम किछ हस्तलेखन मां ई हिस्सो नईं लिखोरोए।, ते ज़ैखन तैना उडारे मां थिये, तैखन कैने अपने ढ्लाए हाबिले पुड़ हमलो केरतां तैसेरो कत्ल कियो। 9तैखन यहोवा कैने पुछ़ू, “तेरो ढ्ला हाबिल कोड़िए?” तैने ज़ोवं, “मीं नईं पतो; कुन अवं अपने ढ्लाएरो रखवालो आईं?” 10यहोवा परमेशरे पुछ़ू, “तीं एन कुन कियोरूए? तेरे ढ्लाएरो खून धरती मरां मेरे पासे चिन्डां मैरतां मीं बिनती केरि राहोरोए! 11एल्हेरेलेइ हुनी धरती ज़ैसां तेरे ढ्लाएरो खून तेरे हथ्थे मरां पीनेरे लेई अपनु आशी खोल्लू, तैसेरे पासेरां तू लानतिस। 12चाहे तू धेरती पुड़ ज़मीनदारी केरस, त फिरी भी तैसेरी पूरी फसल तीं न मैल्हेली, ते तू धेरती पुड़ भटकने बालो ते नश्शने बालो भोल्हो।” 13तैखन कैने यहोवा परमेशरे सेइं ज़ोवं, “मेरी सज़ाह बरदाशत केरने करां जादे। 14हेर तीं अज़्ज़ेरे दिहाड़े अवं धेरती पुड़ेरां कढोरोईं ते अवं तेरी नज़री मां रेइलो ते धेरती पुड़ भटकने बालो ते नश्शने बालो रेइलो; ते ज़ै कोई लाहेलो त मीं मारेलो।” 15इस वजाई सेइं यहोवा तैस सेइं ज़ोवं, “ज़ै कोई कैनेरो कत्ल केरेलो तैस करां सत गुणा बदलो घिन्नो गालो।” ते यहोवा कैनेरे लेई अक निशान रख्खो ताके एरू न भोए कि कोई तैस मैलतां मैरी छ़डे।
कैनेरू खानदान
16तैखन कैन यहोवारे सामनेरां नेश्शी जेव ते नोद#4:16 नोद इसेरो मतलब टेपलोनेरी जगाह। नंव्वेरे मुल्खे मां राने लगो ज़ै अदनेरे पूर्वेरे पासे। 17ज़ैखन कैन अपने कौन्शी कां जेव तैखन तै दोज़ींती भोइ ते हनोकेरू ज़र्म भोवं; फिरी कैने अक नगर बसाव ते तैस नगरेरू नवं अपने मट्ठेरे नव्वें पुड़ हनोक रख्खू। 18हनोकेरो ईराद पैदा भोव, ते ईरादेरो महूयाएल पैदा भोव ते महूयाएलेरो मतूशाएल, ते मतूशाएलेरो लेमेक पैदा भोव। 19लेमेके दूई कौन्शां बनेई: ज़ैन मरां एक्केरू नवं आदा ते होरेरू नवं सिल्ला आहे। 20आदा याबाले ज़र्म दित्तू। तै तैन लोकां केरो पूर्वज थियो ज़ैना डेरन मां रहते थिये ते जानबर पैलतां ज़िन्दगी गुज़ारते थिये। 21याबालेरे ढ्लाएरू नवं यूबाल थियूं: तै तैन लोकां केरो पूर्वज थियो ज़ैना सारंगी ते बेंशोई बज़ाते थिये। 22ते सिल्लाए भी तूबल-कैन नंव्वेरू अक मट्ठू भोवं: तै पितल ते लोंहेरे तिख्खे सब हथियारन बनानेबालो भोव। ते तूबल-कैनेरी बेइन नामाह थी। 23लेमेके एपनी कौन्शन सेइं ज़ोवं,
“हे आदा ते हे सिल्ला मेरी शुना;
हे लेमेकेरी कौन्शव, मेरी गल्ली पुड़ ध्यान देथ:
मीं अक मड़द ज़ै मीं ज़खमी केरतो थियो,
मतलब अक जुवान ज़ै मीं पुड़ हमलो केरतो थियो, मीं मारोरोए।
24ज़ैखन कैनेरो बदलो सत गुणा घिन्नो गालो।
त लेमेकेरो 77 गुणा घिन्नो गालो।”
शेत ते एनोश
25ते आदम अपने कौन्शी कां फिरी जेव; ते तैस अक मट्ठू भोवं ते हव्वां तैसेरू नवं इन ज़ोइतां शेत रख्खू कि “परमेशरे मेरे लेई हाबिलेरे बदले, ज़ै कैने मारोरो थियो, अक होरू वंश दित्तू।” 26ते शेतेरे बेडोनेरां बाद तैस भी अक मट्ठू भोवं ते तैने तैसेरू नवं एनोश रख्खू। तैस वक्ते करां लोक यहोवारे नंव्वे सेइं प्राथना केरने लग्गे।
Currently Selected:
उत्पत्ति 4: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
