उत्पत्ति 2
2
सत्तोवं दिहाड़ी-आराम
1एन्च़रां अम्बर ते धरती ते ज़ैन किछ तैस मांए तैसेरू बनानू पूरू भोइ जेवं। 2ते परमेशरे अपनु कम ज़ैन तै केरतो थियो सत्तोवं दिहाड़े पूरू कियूं, ते तैने अपने कियोरे सारे कम्मे करां सत्तोवं दिहाड़े आराम कियो। 3ते परमेशरे सत्तोवं दिहैड़ी बरकत दित्ती ते पवित्र ठहराई; किजोकि तैस मां तैने रच़ना केरतां अपने सारे कम्मे करां आराम कियो। 4अम्बर ते धरती बनानेरे बारे मां ज़िक्र एन्च़रां सेइं आहे कि ज़ैखन तैना पैदा भोआं मतलब ज़ैस दिहाड़े यहोवा परमेशरे धरती ते अम्बर बनावं। 5तैखन मैइदानेरो कोई पौदो धेरती पुड़ न थियो, ते न मैइदानेरो कोई निकड़ो बुट लग्गोरो थियो, किजोकि यहोवा परमेशरे धेरती पुड़ झ़ड़ी न थी बखावरी, ते धेरती पुड़ ज़मीनदारी केरनेरे लेई मैन्हु भी न थियो। 6पन धुंध#2:6 धुंध या चशमे ज़मीनी मरां निस्तां धेरती पुड़ पेती थी ज़ैस सेइं सारी ज़मीन सेगोती थी।
इन्सानेरी शुरुआत
7तैखन यहोवा परमेशरे आदम#2:7 आदम इब्रानी भाषाई मां इसेरो मतलब मड़दे। धेरतरी मित्ती सेइं बनाव, ते तैसेरे नक्के मां ज़िन्दगरी सांस छ़डी; ते आदम ज़ींतो प्राणी बेनि जेव। 8ते यहोवा परमेशरे पूर्वेरे पासे, अदने मां अक बाग लाई; ते तैड़ी आदम ज़ै तैनी बनेवरो थियो तै तैड़ी रख्खो। 9ते यहोवा परमेशरे धेरतरे मरां सब किसमां केरे बुट लाए, ज़ैना हेरने मां खूबसूरत ते ज़ैन केरे फल खाने मां रोड़ेन, ते बागरे मझ़ाटे ज़िन्दगरो बुट ते भले ते बुरे ज्ञानेरो बुट भी लाव।
10तैस बागी सगनेरे लेई अक बड्डो दरिया अदने मरां निस्सो ते तैट्ठां अग्रोवं बेगतां च़ेवर दरिया बने। 11पेइले दरियारू नवं पीशोने, ई तैए ज़ै हवीला नंव्वेरे सारे मुल्खे मां फैलोरोए ज़ैड़ी सोन्नू मैलते। 12तैस मुल्खेरू सोन्नू बड़ू रोड़ू भोते; तैड़ी मोती ते सुलैमानी घोड़ भी मैलतन। 13ते दूइयोवं दरियारू नवं गीहोने; ई तैए ज़ै कूशेरे#2:13 कूशेरे अज़ कूश एथोपिया नंव्वे सेइं ज़ानो गाते। सारे मुल्खे मां फैलोरोए। 14ते ट्लेइयोवं दरियारू नवं हिद्देकेले; ई तैए ज़ै अश्शूरेरे पूर्वेरे पासे बगते। ते च़ेवरोवं दरियारू नवं फराते।
15तैखन यहोवा परमेशरे आदम नेइतां अदनेरे बागी मां रख्खो, कि तै तैस मां कम केरे ते तैसेरी देखभाल केरे। 16ते यहोवा परमेशरे आदमे ई हुक्म दित्तो, “तू बागी मरां कोन्ची भी बुट्टेरो फल खेइ सकतस; 17पन ज़ै बुट रोड़े-बुरेरू ज्ञान देनेबालो, तैसेरो फल तू कधी न खेइयां; किजोकि ज़ैस दिहाड़े तू तैसेरो फल खालो तैस्से दिहाड़े तू ज़रूर मेरि गालो।”
18फिरी यहोवा परमेशरे ज़ोवं, “आदमेरू अकैल्लू रानू ठीक नईं; अवं तैसेरेलेइ अक एरहो मद्दतगार बनेइलो ज़ै तैस सेइं मेल खाए।” 19ते यहोवा परमेशरे धेरती पुड़ेरे सब किसमां केरे जंगली जानबर, ते अम्बरेरे सब किसमेरां च़ुड़ोलू बनेइतां आदमे कां आनां कि हेरे, कि तै तैन केरू कुन-कुन नवं रखते; ते ज़ैस-ज़ैस ज़ींते प्रैणी जो ज़ैन-ज़ैन नवं आदमे ज़ोवं तैन्ने तैसेरू नवं भोइ जेवं। 20एस तरीके सेइं आदमे सब किसमां केरे पैलतू जानबर, ते अम्बरेरां च़ुड़ोलू, ते सब किसमां केरे जंगली जानबरां केरू नवं रख्खू; पन आदमेरे लेई कोई एरहो मद्दतगार न मैल्हो ज़ै तैस सेइं मेल खाए। 21तैखन यहोवा परमेशरे आदमे पुड़ भारी निड्ल छ़ेडी दित्ती, ते ज़ैखन तै झ़ुल्ली जेव तैखन तैने तैसेरी अक दल्लोड़ी केढतां तैसेरी ठैरी मास भरू। 22ते यहोवा परमेशरे तै दल्लोड़ी ज़ै तैने आदमे मरां कढोरी थी, तैसारी अक कौन्श बनाई; ते तै आदमे कां आनी। 23तैखन आदमे ज़ोवं, “हुनी ई मेरी हेड्डन मरां हड्डी ते मेरे मासे मरां मासे; एल्हेरेलेइ इसेरू नवं नारी भोल्हु, किजोकि ऐह नरे मरां निस्सोरीए।” 24एल्हेरेलेइ मड़द अपने अम्मा-बाजी करां अलग भोइतां अपनि कौन्शी सेइं मिलोरो रालो ते तैना दूईये अक जान भोल्हां। 25आदम ते तैसेरी कौन्श दूईये नग्गां थियां, पन शरमातां न थियां।
Currently Selected:
उत्पत्ति 2: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
