उत्पत्ति 19
19
लूतेरे मेहमान
1ड्लवझ़ी तैना दूई दूत सदोम नगरेरे नेड़े आए; ते लूत सदोमेरे फाटके कां बिशोरो थियो। तैन लेइतां तै तैन सेइं मुलाकात केरनेरे लेई उठ्ठो; ते तुत्तरेरे भारे तल्ले झुकतां तैन सेइं ज़ोवं; 2“हे मेरे मालिकव अपने दासेरे घरे मां एज्जा, ते पूरी राती आराम केरा, ते अपने पव धोथ, फिरी झ़ेझ़ां उठतां अपने बत्तां गाथ।” तैनेईं ज़ोवं, “नईं; अस चौके मां रात कटमेले।” 3ते तैनी तैन कां बड़ी बिनती केरतां तैना मनाए; एल्हेरेलेइ तैना तैस सेइं साथी च़ेलतां तैसेरे घरे आए; ते तैने तैन केरे लेई बगैर खमीरेरी रोट्टी नेइतां तैन्न खुवेई। 4तैन केरे झ़ुलने करां पेइले, सदोम नगरेरे मड़देइं, जुवानन करां लेइतां बुढन तगर, बल्के च़ेवरे पासेरे सब लोकेईं एइतां तैस घरे च़ेवरे पासन घेरो दित्तो; 5ते लूत कुजेइतां ज़ोने लगे, “ज़ैना मड़द अज़ राती तीं कां एवरेन तैना कोड़ि आन? तैन्न असन कां बेइर आन, कि अस तैन सेइं भोग केरम।” 6तैखन लूत तैन करां दारेरे बेइर जेव, ते दारे एप्पु पुतोरां बन्द केरतां ज़ोवं, 7“हे मेरे ढ्लाव, एरी बुराई न केरा। 8शुना, मेरी दूई कुवैरी कुइयन, अगर तुश्शी मर्ज़ी भोए त अवं तैन्न तुसन कां बेइर ऐनीं, ते तुसन ज़ेन्च़रे रोड़ू लग्गे तेरहो सलूख तैन सेइं केरा: पन इन मड़दन सेइं किछ न केरा; किजोकि इना मेरे घरे मां मेहमानन।” 9तैनेईं ज़ोवं, “उरां भो!” फिरी तैना ज़ोने लगे, “तू अक परदेशी भोइतां इड़ी रानेरे लेई अव पन हुनी न्याय केरनेबालो बनोरोस; एल्हेरेलेइ हुनी अस तैन करां भी जादे तीं सेइं साथी बुराई केरमेले।” ते तैना तैस मड़दे लूते बड़े दबाने लग्गे, ते दार ट्लोड़नेरे लेई नेड़े आए। 10तैखन तैन मेहमानेइं हथ अग्रोवं केरतां लूत एप्पु कांजो घरे मां खिच्चो, ते दार बन्द कियूं। 11ते तैनेईं निकड़े करां बड्डे सब मड़दन ज़ैना घरेरे दारे पुड़ थिये, सब काने बनाए, ते तैना दारे तोपते-तोपते थेकी जे।
लूत सदोम नगरे मरां बेच़तां निस्सो
12फिरी तैन मेहमानेइं लूते पुछ़ू, “इड़ी तेरो होरो कौन-कौने? ज़माई, मट्ठां, कुइयां, ते नगरे मां तेरो ज़ै कोई भोए, तैन सेब्भन नेइतां इस ठारारां निस्सी गा। 13किजोकि अस ई ठार नाश केरने बालेम, एल्हेरेलेइ कि इसेरी चिन्डां केरि शौर यहोवारे सामने बेद्धी जेवरीए; ते यहोवा अस इसेरो सत्यानाश केरनेरे भेज़ोरेम।” 14तैखन लूते निस्तां अपने ज़मेइयन, ज़ैन सेइं साथी तैसेरी कुइयां केरि कुड़माइ भोवरी थी, समझ़ेइतां ज़ोवं, “उट्ठा, इस ठारी मरां निस्तां च़ला; किजोकि यहोवा इस नगरे नाश केरनेबालोए।” तैसेरे ज़माई तैसेरो मज़ाक बनाने लग्गे।
15ज़ैखन लौ भोने लग्गी, तैखन दूतेइं लूते लूश केरनेरे लेई ज़ोवं ते ज़ोने लगे, “उठ, अपनि कौन्श ते दूईये कुइयां ज़ैना इड़ी आन बेइर ने: नईं त तू भी इस नगरेरे अधर्मे मां भस्म भोइ गालो।” 16पन तै च़िर लाने लगो, इस पुड़ तैन मड़देइं तैसेरे ते तैसेरी कौन्शरे, ते दूईये कुइयां केरे हथ ट्लाए; किजोकि यहोवा परमेशरेरी दया तैस पुड़ थी: ते तैना केढतां नगरे करां बेइर किये। 17ते एरू भोवं कि ज़ैखन तैनेईं तैना बेइर कढा, तैखन तैने ज़ोवं, “अपनि जान बच़ेइतां नेश्शी गा; पत्रोवं न तेक्कां, ते वैदी मां न रुकां; उस पहाड़े पुड़ जो नश, नईं त तू भी भस्म भोइ गालो।” 18पन लूत तैस सेइं ज़ोने लगो, “हे प्रभु, एरू न केर! 19हेर, तेरे दासे पुड़ तेरी सिद्धी नज़र भोइ, ते तीं इस मां बड़ी महरबानी की, कि मेरे प्राण बच़ावरेन; पन अवं पहाड़े तगर त नेश्शी न सेखी, कि एरू न भोए, कि कोई आफत मीं पुड़ एज्जे, ते अवं मेरि गेईं। 20हेर, इड़ी अक नगर एत्रो नेड़ोए कि अवं तैड़ी जो नेश्शी सकताईं, ते तै निकड़ो भी आहे। मीं तैड़ी जो नश्शने दे, कुन तै नगर निकड़ो नईं? तैखन मेरी जान बेंच़ी गाली।” 21तैने तैस सेइं ज़ोवं, “हेर, मीं इस बारे मां भी तेरी बिनती कबूल कियोरीए, कि ज़ैस नगरेरी गल तीं कियोरीए, तैस अवं नाश न केरेलो। 22लूशी तैड़ी जो नेश्शी गा; किजोकि ज़ांतगर तू तैड़ी न पुज़स तांतगर अवं किछ न केरि सकेलो।” इस्से वजाई सेइं तैस नगरेरू नवं सोअर#19:22 सोअर मतलब कि निकड़ी ठार पेवं।
सदोम ते गमोरारो नाश
23लूतेरे सोअर नगरेरे नेड़े पुज़ते दिहाड़ो निस्सी जेव। 24तैखन यहोवारे पासेरां सदोम ते गमोरा नगरन पुड़ अम्बरे मरां गन्धक ते अग बखने लग्गी; 25ते तैन नगरन ते पूरी वादी, ते नगरेरे सेब्भी रानेबालन, ते ज़ैन किछ धेरती पुड़ लगोरू थियूं नाश कियूं। 26लूतेरी कौन्शां ज़ै तैस पत्ती थी तैसां पत्रोवं मुड़तां तक्कू, ते तै लूनेरो खम्भो बेनि जेई।
27होरसां झ़ेझ़ां अब्राहम उठतां तैस ठारी जो जेव, ज़ैड़ी तै यहोवा परमेशरेरे सामने खड़ो थियो; 28ते सदोम, ते गमोरा, ते तैस वैदरे सारे मुल्खेरे पासे तेकतां कुन हेरू कि तैस मुल्खे मरां भड़कती भेट्ठरो ज़ेरो तू च़लोरोए। 29ते एरू भोवं कि ज़ैखन परमेशरे तैस वैदरे नगरां, ज़ैन मां लूत रहतो थियो, उलट पुलट केरतां नाश कियां तैखन तैने अब्राहम याद केरतां लूत तैस बीतनाई मरां बच़ाव।
लूत ते तैसेरी कुइयां
30लूत सोअर नगरे करां च़लो जेव, ते पहाड़े पुड़ अपनि दूईये कुइयन सेइं साथी राने लगो; किजोकि तै सोअरे मां राने करां डरतो थियो; एल्हेरेलेइ तै ते तैसेरी दूईये कुइयां तैड़ी एक्की कुढी मां राने लगे। 31एक्सां बेड्डी कुइयां निकड़ी सेइं ज़ोवं, “इश्शो बाजी बुढो भोवरोए, ते सारे धेरती पुड़ कोई एरहो मड़द नईं ज़ै दुनियारे रीतरे मुताबिक असन कां एज्जे। 32एल्हेरेलेइ एई, अस अपने बाजी दाछ़रो रस पियेइतां, तैस सेइं साथी झ़ुलम, ज़ैस सेइं कि अस अपने बाजेरे खानदाने बच़ेइतां रखम।” 33ते तैनेईं तैस्से दिहाड़ी-रातरे वक्ते अपने बाजी दाछ़रो रस पियाव, तैखन बड्डी कुई गेइतां अपने बाजी कां झ़ुल्ली; पन तैस पतो न लग्गो, कि तै कैखन झ़ुल्ली, ते कैखन उठी। 34ते एरू भोवं कि दूइयोवं दिहाड़े बेड्डां कुइयां निकड़ी सेइं ज़ोवं, “हेर, हीज राती अवं अपने बाजी कां झ़ुल्लोरी थी; एल्हेरेलेइ अज़ राती भी असां तैस दाछ़रो रस पियाम; तैखन तू गेइतां तैस कां झ़ुल्लां कि अस अपने बाजेरे ज़िरिये बच्चे पैदा केरम।” 35ते तैनेईं तैस दिहाड़े भी रातरे वक्ते अपने बाजी दाछ़रो रस पियाव, ते निकड़ी कुई गेइतां तैस कां झ़ुल्ली जेई; पन तैस तैसेरे भी झ़ुलनेरो ते खड़े भोनेरो पतो न लग्गो। 36एन्च़रां सेइं लूतेरी दूईये कुइयां अपने बाजी सेइं दोज़ींती भोइ। 37बेड्डां अक मट्ठू ज़ांव ते तैसेरू नवं मोआब रख्खू; मोआब नंव्वेरे कौमरो अज़ तगरे तैए पूर्वज भोव। 38ते निकड़ी कुइयां भी अक मट्ठू ज़ांव, ते तैसेरू नवं बेनअम्मी#19:38 बेनअम्मी इब्रानी मां इसेरो मतलब मेरे रिश्तेदारेरू मट्ठू। रख्खू; तै अम्मोन खानदानेरे लोकां केरो पूर्वज भोव।
Currently Selected:
उत्पत्ति 19: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
