निर्गमन 40

मिलापे बालो तेम्बु बनानेरो हुक्म

1फिरी यहोवाए मूसे सेइं ज़ोवं, 2“नंव्वे सालेरे पेइले दिहाड़े तू मिलापे बालो तेम्बु खड़ो केरां। 3ते तैस मां गवैहरे सन्दूखे रेखतां म‍झ़ेटियें पड़दे पत्र केरां। 4ते मेज़ अन्तर नेइतां ज़ैन किछ तैस पुड़ सज़ानूए तैस सज़ेइयां; तैखन दीवट नेड़े नेइतां तैसेरे दीयन बैलां। 5ते गवैहरे सन्दूखेरे सामने सोन्नेरि वेदी ज़ै धूपेरे लेइए तैस कां रेखां, ते मिलापे बाले तेम्बेरे पड़दे लेइयां। 6ते मिलापे बाले तेम्बेरे रानेरी ठारारे दारेरे सामने होमवेदी रेखां। 7ते मिलापे बालो तेम्बु ते वेदरे मझ़ाटे हौदी रेखतां तैस मां पानी भरनु। 8ते च़ेवरे पासन अंगनेरी कनात खड़ी केरनि, ते तैस अंगनेरे दारे पुड़ पड़दे टंगने। 9ते अभिषेकेरो तेल नेइतां मिलापे बाले तेम्बु ते ज़ैन किछ तैस मां भोल्हु सब किछ अभिषेक केरनू, ते तैन सारू सामान पवित्र केरनू; तैखन तैन पवित्र भोल्हु। 10सब सामाने समेत होमवेदरू अभिषेक केरतां तै पवित्र केरनि; तैखन तै परमपवित्र भोल्ही। 11पेइड़न समेत हौदरू भी अभिषेक केरतां तै पवित्र केरनि। 12तैखन हारून ते तैसेरे मट्ठां मिलापे बाले तेम्बेरे दारे पुड़ नेइतां निहानां, 13ते हारूने पवित्र लिगड़ां लुवाना, ते तैसेरू अभिषेक केरतां तै पवित्र केरनो कि तै मेरे लेई याजकेरू कम केरे। 14ते तैसेरे मट्ठन नेइतां तैन अंगरखे लुवाने, 15ते ज़ेन्च़रे तू तैन केरे बाजेरू अभिषेक केरस तेन्च़रे तैन केरू भी अभिषेक केरां कि तैना मेरे लेई याजकेरू कम केरन; ते तैन केरू अभिषेक तैन केरि पीढ़ी-पीढ़ी केरे लेई तैन केरे लेई हमेशारे याजक पदेरो निशान भोल्हो।”

मिलापे बालो तेम्बु खड़ो केरनो

16ज़ै-ज़ै हुक्म यहोवाए मूसे दित्तोरे थियो तैने तैसेरे मुताबिक कियूं। 17ते दूइयोवं सालेरे पेइले महीनेरे पेइले दिहाड़े मिलापे बालो तेम्बु खड़ो कियो। 18मूसे मिलापे बालो तेम्बु खड़ो कराव ते तैसेरी कुर्सी रेखतां तैसेरे तखते लेइतां तैन मां लरां छ़ेडी, ते तैसेरे खम्भे खड़े किये; 19ते तैने मिलापे बाले तेम्बु बह तेम्बु खिलारो, ते तेम्बेरे बह तैने छ़ुंहूं लावं; ज़ैस तरीके यहोवाए मूसे हुक्म दित्तोरो थियो। 20ते तैने गवैहरो पत्र नेइतां सन्दूखे मां रख्खो, ते सन्दूखे मां डण्डे लाए तैसेरे बह प्रायश्चितेरे ढकनू रख्खू; 21ते तैनी गवैहरो सन्दूख मिलापे बाले तेम्बु मां पुज़वाव, ते म‍झ़ेटियें पड़दे टंगेइतां करारेरो सन्दूख तैसेरे अन्तर फर्क कियो; ज़ैस तरीके सेइं यहोवा परमेशरे मूसे हुक्म दित्तोरो थियो। 22ते तैनी मेज़ मिलापे बाले तेम्बु मां उत्तरेरे पासे म‍झ़ेटियें पड़दे करां बेइर लुवाव, 23ते तैस पुड़ तैने यहोवारे सामने रोट्टी सज़ेइतां रख्खी; ज़ैस तरीके सेइं यहोवाए मूसे हुक्म दित्तोरो थियो। 24ते तैने मिलापे बाले तेम्बु मां मेज़ेरे सामने दक्षिणेरे पासे दीवट रख्खो, 25ते तैनी दीये यहोवारे सामने बालो; ज़ेन्च़रे सेइं यहोवाए मूसे हुक्म दित्तो थियो। 26ते तैनी मिलापे बाले तेम्बु मां म‍झ़ेटियें पड़देरे सामने सोन्नेरि वेदी रख्खी, 27ते तैने तैस पुड़ खुशबूदार धूप बालो; ज़ेन्च़रे सेइं यहोवाए मूसे हुक्म दित्तोरो थियो। 28ते तैनी मिलापे बाले तेम्बेरे दारे पुड़ पड़दो लव। 29फिरी तैनी मिलापे बाले तेम्बेरे दारे पुड़ होमवेदी रेखतां तैस पुड़ होमबलि ते अन्नेरी बलि च़ाढ़ी; ज़ैस तरीके यहोवा मूसे हुक्म दित्तोरो थियो। 30ते तैने मिलापे बाले तेम्बु ते वेदरे मझ़ाटे हौदी रेखतां तैस मां धोनेरे लेई पानी छ़डू, 31ते मूसे ते हारूने ते तैसेरे मट्ठेईं तैस मां अपने-अपने हथ पव धोए; 32ते ज़ैखन-ज़ैखन तैना मिलापे बाले तेम्बु मां या वेदी कां गाते थिये तैखन-तैखन तैना हथ पव धोते थिये; ज़ेन्च़रे सेइं यहोवाए मूसे जो हुक्म दित्तोरो थियो। 33फिरी मूसे मिलापे बाले तेम्बेरे च़ेवरे पासे ते वेदरे आसे-पासे अंगनेरी कनात खड़ी कराई, ते अंगनेरे दारेरे पड़दे टंगाए। एन्च़रां मूसे सब कम पूरू कियूं।

मिलापे बाले तेम्बु पुड़ यहोवारी महिमा

34तैखन बिदलार मिलापे बाले तेम्बु पुड़ पेई जेई, ते यहोवारू तेज मिलापे बाले तेम्बु मां भेरोई जेवं। 35ते बिदलार मिलापे बाले तेम्बु पुड़ रुकी जेई, ते यहोवारू तेज मिलापे बाले तेम्बु मां भेरोई जेवं, इस वजाई सेइं मूसो तैस मां गेइ न सको। 36इस्राएली लोकां केरे सारे सफरे मां एरू भोतू राव, कि ज़ैखन-ज़ैखन तै बिदलार मिलापे बाले तेम्बु पुड़ेरां उठती थी तैखन-तैखन तैना अग्रोवं गाते थिये। 37ते अगर तै न उठती थी, त ज़ैस दिहाड़े तगर तै न थी उठती तैस दिहाड़े तगर तैना अग्रोवं न थिये गाते। 38इस्राएली लोकां केरे सारे सफरे मां दीसां त यहोवारी बिदलार मिलापे बाले तेम्बु पुड़, ते राती तैस्से बिदलारी मरां अग तैन सेब्भन लेइहोती थी।

Currently Selected:

निर्गमन 40: BHDNT

Highlight

Copy

Compare