निर्गमन 38

होमबलि देनेरी वेदी

1फिरी तैनी किकरेरी लेकड़री होमबेलरे लेई वेदी भी बनाई; तैसेरी लम्बाई पंच़ हथ ते चौड़ाई पंच़ हथ थी; एन्च़रां सेइं तै चौरस बनी, ते तैसेरी ऊँचाई ट्लाई हथ थी। 2ते तैनी तैसेरे च़ेवरे कून्न पुड़ तैसेरां च़ेवर शिंगां बनां, तैना तैस सेइं बगैर जोड़े बनां; ते तैने तै पितली सेइं मढ़ी। 3ते तैनी वेदरू सारू सामान, मतलब तैसेरां भांडां, बेलचे, कुटोरे, कंटे, ते कड़छ़ बनाए। तैसेरू सारू सामान तैनी पितलरू बनावं। 4ते वेदरे लेई तैसेरे च़ेवरे पासां केरि कंगनी हैठ तैनी पितलरी जैलरी अक झंझरी बनाई, तै वेदरे मझ़ाटे लाई। 5ते तैनी पितलरी झंझरारे लेई च़ेवरे कूनां केरे लेई च़ेवर कड़े बनाए, ज़ैना डण्डां केरे खानां केरू कम देन। 6फिरी तैनी डण्डे किकरेरे लेकड़रे बनाए, ते तैन पुड़ पितल मढ़ी। 7तैखन तैनी डण्डे वेदरे पासेरे कड़न मां वेदी छ़ूनेरे लेई छ़डे। तैनी वेदी तखतन सेइं खाली बनाई।

पितलरी हौदी

8तैनी हौदी ते तैसेरो आधार पितलरो बनाव, ई मिलापे बाले तेम्बेरे दारे पुड़ सेवा केरनेबैली कौन्शां केरे च़ढ़तल दित्तोरी पितलरे शीशन सेइं बनेवरी थी।

पवित्र ठारारू अंगन

9फिरी तैनी अंगन बनाव; ते दक्षिणेरे पासेरे लेई अंगनेरे पड़दे बट्टोरी सूक्ष्म सनेरे कपड़ेरे थिये, ते सब मिलतां 100 हथ लम्मे थिये; 10तैन केरे लेई 20 खम्भे, ते इन केरि पितलरी 20 कुर्सी बनेई; ते खम्भां केरे कुन्डे ते ज़ोड़नेरी बेल्‍ली चैंदरी बनेई। 11ते उत्तरेरे पासेरे लेई भी 100 हथ लम्मे पड़दे बनाए; ते तैन केरे लेई 20 खम्भे, ते इन केरि पितलरी 20 कुर्सी बनेई, ते खम्भां केरे कुन्डे ते ज़ोड़नेरे छल्‍ले चैंदरे बनाए। 12ते पश्चिमेरे पासेरे लेई सब पड़दे मिलेइतां 50 हथ थिये; तैन केरे लेई 10 खम्भे, ते 10 तैन केरि कुर्सी थी, ते खम्भां केरे कुन्डे ते ज़ोड़नेरे छल्‍ले चैंदरे थिये। 13ते पूरबेरे पासे भी तैना 50 हथ थिये। 14अंगनेरे दारेरे एक्‍की पासेरे लेई 15 हथ पड़दे बनाए; ते तैन केरे लेई ट्लाई खम्भे ते ट्लाई कुर्सी थी। 15ते अंगनेरे दारेरे होरि पासे भी तेरहु बनोरू थियूं; ते अंगनेरे दारेरे एक्‍की पासे ते होरि पासे 15-15 हथ्थेरे पड़दे बनेवरे थिये; ते तैन केरे लेई ट्लाई-ट्लाई खम्भे, ते ट्लाई-ट्लाई इन केरि कुर्सी भी थी। 16अंगनेरे च़ेवरे पासे सब पड़दे सूक्ष्म बट्टोरे सनेरे कपड़ेरे बनेवरे थिये। 17ते खम्भां केरि कुर्सी पितलरी, ते कुन्डे ते पेट्टी चैंदरी बनेई, ते तैन केरे च़ोटन पुड़ चाँदी मढ़ी, ते अंगनेरे सब खम्भे चैंदरे पेट्टन मरां ज़ोड़ोरे थिये। 18अंगनेरे दारेरे पड़दे पुड़ बेलबूटेरू कम कियोरू थियूं, ते तै नीले, बैंगनी ते लाल रंगेरे कपड़े; ते बट्टोरे सूक्ष्म सनेरे कपड़े सेइं बनेवरे थिये; ते तैसेरी लम्बाई 20 हथ थी, ते तैसेरी ऊँचाई अंगनेरे कनातेरी चौड़ाइयरी ज़ेरि पंच़ हथ बनाई। 19ते तैन केरे लेई च़ेवर खम्भे, ते खम्भां केरि च़ेवरे कुर्सी पितलरी बनेवरी थी, तैन केरे कुन्डे चैंदरे बनाए, ते तैन केरे च़ोटन पुड़ चाँदी मढ़ी, ते तैन केरि पेट्टी चैंदरी बनेई। 20ते रानेरी ठार ते अंगनेरे च़ेवरे पासेरे सब खुन्डे पितलरे बनेवरो थिये।

धातां केरे बारे मां ज़िक्र

21गवैहरे तेम्बेरू सामान ज़ैन लेवी लोकां केरि सेवा केरनेरे लेई बनावं; ते ज़ेसेरी गिनती हारून याजकेरे मट्ठां ईतामारेरे ज़िरिये मूसेरे ज़ोने सेइं भोवरी थी, तैसेरो ज़िक्र ई आहे। 22ज़ैस-ज़ैस चीज़रे बनानेरो हुक्म यहोवाए मूसे दित्तोरो थियो, ज़ैन यहूदारे गोट्ले बाले बसलेले, ते हूरेरू पोट्लड़ू ते ऊरी नंव्वेरे मैन्हेरू मट्ठू थियूं, तैनी बनावं। 23ते तैस सेइं दानेरे गोट्लेरे, अहीसामाकेरू मट्ठू, ओहोलीआब थियूं, ज़ै नक्‍काशी केरनेबालो ते कढ़ाई केरनेबालो ते नीले, बैंगनी ते लाल रंगेरे ते सूक्ष्म सनेरे कपड़ेरी कढ़ाई केरनेबालो माहिर कारीगिर थियो।

24पवित्र ठारारे सारे कम्मे मां ज़ैन च़ढ़तलरू सोन्नू लग्गू तैन पवित्र ठारारे शेकेलेरे हिसाब सेइं 29 किक्‍कार#38:24 29 किक्‍कार लगभग 991 किल्‍लो।, ते 730 शेकेल#38:24 730 शेकेल लगभग 9 किल्‍लो। थियूं। 25ते मेण्डलरे गनोरे लोकां केरि च़ढ़तलरी चाँदी पवित्र ठारारे शेकेलेरे हिसाबे#38:25 शेकेलेरे हिसाबे लगभग 3400 किल्‍लो। सेइं 100 किक्‍कार, ते 1775 शेकेल#38:25 775 शेकेल लगभग 30 किल्‍लो थी। 26मतलब ज़ेत्रे 20 सालां ते तैस करां जादे उमरारे गनोरे थिये, तैना 603 550 मड़द थिये, ते एक्‍की-एक्‍की मैन्हेरे तरफां पवित्र ठारारे शेकेलेरे मुताबिक अध्धो शेकेल#38:26 अध्धो शेकेल लगभग 5.7 ग्राम।, ज़ै अक बेका भोते, मैल्हो। 27ते तै 100 किक्‍कार चाँदी#38:27 100 किक्‍कार चाँदी लगभग 3400 किल्‍लो। पवित्र ठार ते म‍झ़ेटियें पड़देरे दूईये कुर्सी केरे ढालने मां लेग्गी जेई; 100 किक्‍कारे सेइं 100 कुर्सी बनेई, अक-अक कुर्सी अक किक्‍कारेरी#38:27 अक किक्‍कारेरी लगभग 34 किल्‍लो। बनी। 28ते 1775 शेकेल#38:28 1775 शेकेल लगभग 30 किल्‍लो। ज़ैना बेच़ी जे तैन सेइं खम्भां केरे कुन्डे बनाए जे, ते खम्भां केरि च़ोटां मेढ़ी, ते तैन केरि पेट्टी भी बनेई। 29ते च़ढ़तलरी पितल 70 किक्‍कार ते 2400 शेकेल#38:29 70 किक्‍कार ते 2400 शेकेल लगभग 2425 किल्‍लो। थी; 30इस सेइं मिलापे बाले तेम्बेरे दारेरी कुर्सी, ते पितलरी वेदी, पितलरी झंझरी, ते वेदरू सारू सामान; 31ते अंगनेरे च़ेवरे पासेरी कुर्सी, ते तैसेरे दारेरी कुर्सी, ते रानेरी ठार, ते अंगनेरे च़ेवरे पासेरे खुन्डे भी बनाए।

Currently Selected:

निर्गमन 38: BHDNT

Highlight

Copy

Compare