निर्गमन 30

धूप बालनेरी वेदी

1“फिरी धूप बालनेरे लेई किकरेरी लेकड़री वेदी बनेइयां। 2तैसारी लम्बाई अक हथ ते चौड़ाई भी अक हथ भोए, तै चकोर भोए, ते तैसेरी ऊँचाई दूई हथ भोए, ते तैसेरां शिंगां तैस्से टुक्ड़ेरां बनां गान। 3ते वेदरे बेइयें पल्‍ले ते च़ेवरे पासां केरि पेखड़ी ते शिंगन खालिस सोन्ने सेइं मेढ़ां, ते तैसेरे च़ेवरे पासन सोन्नेरो अक बाड़ बनेइयां। 4ते तैसेरे बाड़ेरे बुनीयें पासेरे आमने सामनेरे हिस्से पुड़ सोन्नेरे दूई-दूई कड़े बनेइतां तैसेरे दूईये पासन लाने, ताके तैन मां डण्डे लेइतां एस छ़ूनेरू कम देले। 5डण्डे किकरेरी लेकड़रे बनेइतां तैन सोन्ने सेइं मैढ़थ। 6ते तू, तैस पड़देरे सामने रेखां, ज़ै गवैहरे सन्दूखेरे सामने, यानी प्रायश्चित बाले ढकनेरे सामने ज़ै करारेरे सन्दूखे बाहे, तैड़ी अवं तुसन सेइं मिलतो रालो। 7ते तैस्से वेदी पुड़ हारून खुशबू बालो धूप बालतो राए, रोज़ झ़ेझ़ां ज़ैखन तै दीये ठीक केरे तैखन तै धूप बाले, 8तैखन ड्लवझ़रे मौके ज़ैखन हारून, दीयन बाले, तैखने धूप भी बाले, ऐह धूप यहोवा परमेशरेरे सामने तुश्शी पीढ़ी-पीढ़ी तगर हमेशारे लेई बालो गाए। 9ते तैस वेदी पुड़ तुस होरि किसमेरो धूप न बैलथ, ते न तैस पुड़ होमबलि ते न अन्नबलि च़ैढ़थ, ते न पीनेरी च़ढ़तली पुड़ देइयथ। 10हारून साले मां एक्‍की बार तैसेरे शिंगे पुड़ प्रायश्चित केरे ते तुश्शी पीढ़ी-पीढ़ी मां साले मां एक्‍की बार प्रायश्चितेरे पापबेलरे खूने सेइं एस पुड़ प्रायश्चित कियूं गाए, एन यहोवारे लेई पवित्र भोल्हु।”

प्राणा केरे प्रायश्चितेरे रुपेइये

11ते तैखन यहोवाए मूसे सेइं ज़ोवं, 12“ज़ैखन तू इस्राएली केरे गिनती केरने लग्गस, तैखन तैना गन्नेरे मौके ज़ैन केरि गिनती भोवरी भोए अपने-अपने प्राणा केरे लेई यहोवारे लेई प्रायश्चित देन, ज़ैस सेइं ज़ैखन तू तैन केरि गिनती केरि राहोरो भोस, तैस मौके कोई आफत तैन पुड़ न लोड़े एवरी। 13ज़ेत्रे लोक गने गान तैना पवित्र ठारारे शेकेलेरे मुताबिक अध्धो शेकेल देन, (ई शेकेल 20 गेरा#30:13 गेरागेरा वज़नेरो सेब्भना घट नाप थी ज़ै 0.6 ग्राम करां घट थी। केरो भोते), यहोवारी च़ढ़तल अध्धो शेकेल #30:13 शेकेल लगभग 7.5 ग्राम।भोए। 14बीह सालां केरे या तैस करां जादे उमरारे ज़ेत्रे गने गान तैन मरां सब यहोवारी च़ढ़तल देन। 15तैखन तुश्शे प्राणा केरे प्रायश्चितेरे लेई यहोवारी च़ढ़तल च़ाढ़ी गाए, तैखन न धनी लोक अध्धे शेकेले करां जादे देन, ते न कंगाल लोक तैस करां घट देन। 16ते तू इस्राएली लोकन सेइं प्रायश्चितेरो रुपेइयो नेइतां मिलापे बाले तेम्बेरे कम्मे मां लेइयां, ज़ैस सेइं तै यहोवारे सामने इस्राएली केरे याद करानेरे लेई निशान राए, ते तैन केरे प्राणा केरो प्रायश्चित भी भोए।”

पितलरी हौदी

17ते यहोवाए मूसे सेइं ज़ोवं। 18“धोनेरे लेई पितलरी अक हौदी ते तैसेरो आधार भी पितलरो बनानो। ते तै मिलापे बाले तेम्बु ते वेदरे मझ़ाटे रखनो ते तैस मां पानी भेरतां रखनू; 19ते तैस मां हारून ते तैसेरां मट्ठां अपने-अपने हथ पव धोन। 20ज़ैखन-ज़ैखन तैना मिलापे बाले तेम्बु मां दाखल भोल्हे तैखन-तैखन तैना हथ पव पैनी सेइं धोन, नईं त मेरि गानेन, ते ज़ैखन-ज़ैखन तैना वेदी कां सेवा केरने, मतलब यहोवारे लेई हबन बालने जो एज्जन तैखन-तैखन तैना हथ पव धोन, नईं त मेरि गानेन। 21ई हारून ते तैसेरे पीढ़ी-पीढ़रे खानदानेरे लेई हमेशारी विधि राहेली।”

अभिषेकेरो तेल

22फिरी यहोवाए मूसे सेइं ज़ोवं, 23“तू रोड़े करां रोड़े खुशबूदार चीज़ां, मतलब पवित्र ठारारे शेकेलेरे मुताबिक 500 शेकेल #30:23 500 शेकेल लगभग 6 किल्‍लो।अपने आप निस्सोरो गन्धरस, ते तैसेरो अध्धो, मतलब 250 शेकेल खुशबूदार दालचीनी ते 250 शेकेल खुशबूदार अगर, 24ते 500 शेकेल तज, ते अक हीन#30:24 अक हीन च़ेवर लीटर ज़ैतूनेरो तेल नेइतां 25तैस सेइं अभिषेक केरनेरो पवित्र तेल, मतलब खुशबूअरे तरीके सेइं तियार कियोरे खुशबूदार तेल बनावेइयां, तै अभिषेकेरो पवित्र तेल भोए। 26ते तैस सेइं मिलापे बाले तेम्बेरू ते गवैहरे सन्दूखे, 27ते सारे सामाने समेत मेज़ेरू, दीवटेरू, ते धूप वेदरू, 28ते सामाने समेत होमवेदरू, ते पाए समेत हौदरू अभिषेक केरां। 29ते तैन पवित्र केरां, ज़ैस सेइं तैना परमपवित्र ठहरन, ते ज़ैन किछ तैस सेइं हुरे तैन पवित्र भोइ गाए। 30फिरी हारूनेरू तैसेरे मट्ठन सेइं साथी अभिषेक केरां, ते एस तरीके सेइं तैन्न मेरे लेई याजकेरू कम केरनेरे लेई पवित्र केरां। 31ते इस्राएली लोकन मेरो ई हुक्म शुनानो, ‘ई तेल तुश्शे पीढ़ी-पीढ़ी मां मेरे लेई पवित्र अभिषेकेरो तेल भोल्हो। 32ई कोन्ची आम मैन्हु केरे जानी पुड़ न छ़डो गाए, ते मिलावट केरतां तैसेरू ज़ेरू किछ न बनावेइयथ, ई पवित्रे, ई तुश्शे लेई भी पवित्र भोल्हो। 33ज़ै कोई एसेरू ज़ेरू किछ बनाए, या ज़ै कोई एस मरां किछ होरि कुले बाले पुड़ लाए, तै अपने लोकन मरां कढो गालो।’”

पवित्र खुशबूदार चीज़ां

34फिरी यहोवाए मूसे सेइं ज़ोवं, “बोल, नखी ते कुन्दरू, इना खुशबूदार-हबन निर्मल लोबाने समेत घिन्तां एजनू, इना सब एक्‍की तोलेरे भोन, 35ते एन केरो धूप मतलब लून मिलेइतां खुशबूअरे रीतरे मुताबिक शुद्ध ते पवित्र खुशबूदार चीज़ां बनावेइयां; 36फिरी तैस मरां किछ पीहतां निक्‍कु केरनू, तैखन तैस मरां किछ मिलापे बाले तेम्बु मां गवैहरे सन्दूखे अग्गर, ज़ैड़ी अवं तुसन सेइं मिलतो रालो तैड़ी रेखथ, तै तुश्शे लेई परमपवित्र भोल्हो। 37ते ज़ै धूप तू बनावालो, मिलवटी मां तैसेरू ज़ेरू तुस अपने लेई किछ न बनावेइयथ, तै तुश्शे सामने यहोवारे लेई पवित्र भोल्हो। 38ज़ै कोई शिंघनेरे लेई तैसेरू ज़ेरू किछ बनाए तै अपने लोकन मरां कढो गाए।”

Currently Selected:

निर्गमन 30: BHDNT

Highlight

Copy

Compare