सभोपदेशक 3

हर गल्‍लरो अपनो वक्ते

1हर एक्‍की गल्‍लरो अक वक्ते ते दुनियाई मां हर एक्‍की कम्मेरे लेई अक वक्ते।

2ज़र्मनेरो भी वक्ते, ते मरनेरो भी वक्ते;

बेनेरो भी वक्ते, ते तैस ढ्लूड़नेरो भी वक्ते;

3लड़ाई मां मारनेरो भी अक वक्ते, ते बझ़ानेरो भी वक्ते,

किछ चीज़ां केरो बुछ़ोड़नेरो भी वक्ते, ते बनानेरो भी वक्ते;

4दुखे सेइं लेरां देनेरो भी वक्ते, ते खुशी सेइं हस्सनेरो भी अक वक्ते,

छाती पिटनेरो भी वक्ते, ते नच़नेरो भी वक्ते।

5घोड़ शारनेरो भी वक्ते, ते घोड़ अकोट्ठे केरनेरो भी वक्ते,

गले लानेरो भी वक्ते, ते गलट्लेरन रुकनेरो भी वक्ते;

6तोपनेरो भी वक्ते, ते हिरानेरो भी वक्ते;

रखनेरो भी वक्ते, ते शारनेरो भी वक्ते;

7छ़िन्दनेरो भी वक्ते, ते सीनेरो भी वक्ते,

च़ुप केरनेरो भी वक्ते, ते ज़ोनेरो भी वक्ते;

8प्यार केरनेरो भी वक्ते, ते बैर केरनेरो भी वक्ते;

लड़ाई केरनेरो भी वक्ते, ते मेल मिलाप केरनेरो भी वक्ते।

परमेशरेरे तरफां दित्तोरू कम

9कम केरनेबाले एपनी मेहनती सेइं कुन फैइदो भोते?

10मीं तै भारी बोझ ज़ै परमेशरे मैन्हेरे कंधन पुड़ रखोरोए कि तैना तैस मां लग्गोरे रान। 11तैनी सब किछ एरू बनेवरूए, कि अपने-अपने वक्ते पुड़ तैन रोड़ू लेइहोते; फिरी तैनी मैन्हेरे मने मां हमेशारू ज्ञान भी पैदा कियोरूए, फिरी भी ज़ैन कम परमेशरे कियोरूए, तैन शुरू करां आखरी तगर सेमझ़ी न सके। 12मीं एन लगते कि मैन्हेरे लेई आनन्द केरनो ते भलियाई केरनेरे अलावा होरू किछ भी रोड़ू नईं। 13ते एन भी परमेशरेरू दाने कि मैन्हु खाए पीए ते एपनी सैरी मेहनती मां सुखी राए। 14अवं ज़ानताईं कि ज़ैन किछ परमेशर केरते, तैन हमेशा बनेरू रालू; कि तैस मरां न किछ बधेइयोए, ते न किछ घटेइयोए, परमेशर एल्हेरेलेइ एन केरते कि लोक तैसेरो डर मन्न। 15ज़ैन किछ भोवरूए तैन पेइलू भी भोवरूए; ज़ैन भोनेबालूए, तैन भी भोइ जेवरूए; ते परमेशर बीतोरी गल्‍ली फिरी पुछ़ते।

अन्यायेरू भारी भोनू

16फिरी मीं दुनियाई मां एन भी लाहेरूए, कि न्याये मां ज़ुलम भोते, ते धार्मिकतारे ठारी पुड़ भी ज़ुलम भोते। 17मीं अपने मने मां ज़ोवं, “परमेशर धेर्मेरो ते दुष्टेरो न्याय केरेलो,” किजोकि तैसेरे तैड़ी एक्‍की-एक्‍की गल्‍लरे बारे मां ते एक्‍की-एक्‍की कम्मेरो वक्ते। 18मीं अपने मने मां ज़ोवं, “एन एल्हेरेलेइ भोते कि परमेशर मैन्हन परखे, कि तैना जानबरेरे ज़ेरेन।” 19किजोकि ज़ेरि मैन्हु केरि हालत भोचे, तेरही जानबरेरी भी हालत भोचे, दूईयां केरि तेरही हालत भोचे, ज़ेन्च़रे अक मरते तेन्च़रे होरो भी मरते, सेब्भन मां अक्‍के सांसे, ते मैन्हु जानबरे करां बेद्धतां नईं; सब किछ बेकारे। 20सब एक्‍की ठैरी गातन; सब मित्ती सेइं बनोरेन, ते सब मित्ती मां मिली गातन। 21कुन मैन्हेरे प्राण निस्तां उबरे गातन, ते जानबरेरे प्राण उन्ढे गेइतां मित्ती मां मिली गातन? एन कौन ज़ानते? 22ते मीं एन हेरू कि मैन्हेरे लेई एस करां रोड़ू होरू किछ भी नईं कि मैन्हु अपने कम्मे मां खुशी राए, किजोकि तैसेरो हिस्सो ईए आहे; किजोकि कौन तैस वापस आनेलो कि ज़ैन किछ तैसेरे मरनेरां बाद भोल्हु हेरे?

Currently Selected:

सभोपदेशक 3: BHDNT

Highlight

Copy

Compare