प्रेरितां केरां कम्मां 22

भीड़रे सामने पौलुसेरो सन्देश

1“मेरे ढ्लाव ते बुज़ुर्गव, मेरी गल शुना, ज़ै अवं अपनि सफैई मां पेश लगोरोईं केरने।”

2ज़ैखन लोकेईं तैस करां इब्रानी भाषा ज़ोती शुनी त तैना च़ुप रेइजे, तैखन पौलुसे ज़ोवं:

3“अवं त यहूदी आईं, ते अवं किलिकिया इलाकेरे तरसुस नगरे मां ज़र्मो, पन इस नगरे मां गमलीएल करां शिक्षा हासिल की, ते अपने दादां-पड़दादां केरे कानून ठीक तरीके सेइं शिखोरोए, ते अवं भी परमेशरेरे लेई एरो मघन थियो, ज़ेरे अज़ तुस आथ। 4मीं मड़दन ते कुआन्शन बेन्धतां, ते कैद केरतां, ई पंथेरे लोक इड़ी तगर सताए, ते तैना माराए भी। 5एप्पू महायाजक ते सब बुज़ुर्ग एस गल्‍लरे गवाह आन, कि मीं दमिश्क नगरे मां रानेबाले यहूदी ढ्लां केरे लेई चिट्ठी एन्होरी थी, ते अवं तैड़ी एस नीती सेइं जेवरो थियो, ते ज़ैना तैड़ी भोन तैन सज़ाह देनेरे लेई बेन्धतां यरूशलेम नगरे जो नेही।

मन बेदलोनेरे बारे मां

(प्रेरित. 9:1-19;26:12-18)

6“अवं ज़ैखन सफर केरते-केरते दमिश्क नगरेरे नेड़े पुज़्ज़ो, त तै दुपहरां केरो मौको थियो। ते अम्बरेरां अक बड़ी लौ आई ते मेरे च़ेवरे पासन बलने लगी। 7ते अवं तल्‍ले बिछ़ड़ी जेव, ते मीं अक आवाज़ शुनी, ज़ै मींजो ज़ोने लगोरी थी, हे शाऊल, हे शाऊल तू मीं किजो सतातस? 8त मीं पुछ़ू, हे प्रभु तू कौन आस? त तैनी मींजो जुवाब दित्तो, अवं यीशु नासरी आईं, ज़ैस तू सतातस। 9मेरे सैथेईं लौ त लाही पन तैनेईं कोई गल न समझ़ी, कि तै आवाज़ मीं सेइं कुन लगोरीए ज़ोने? 10त मीं पुछ़ू, ‘हे प्रभु अवं कुन कम्मेईं?’ प्रभुए ज़ोवं, ‘उठ दमिश्क नगरे मां गा तैड़ी तीं ज़ैन तेरे केरनेरे लेई रखेरूए तैड़ी तीं सेइं ज़ोवं गालू।’ 11मेरे सैथेईं अवं हथ्थेरां ट्लेइतां दमिश्क नगरे मां पुज़व। किजोकि तैस बड़े महिमारे वजाई सेइं मीं किछ न लेइहोवं।

12“तैड़ी अक मैन्हु हनन्याह नव्वेंरो कानूनेरे मुताबिक भक्त मैन्हु अव, ते तैट्ठेरे यहूदन मां बड़ो इज़्ज़तदार थियो। 13तै मीं कां खड़ो भोइतां ज़ोने लगो, ‘हे ढ्ला, शाऊल, अपनि एछ़्छ़ी खोल्‍ल।’ ते मेरी एछ़्छ़ी तैखने खुल्‍ली जेई, ते अवं तैस लहने लगो। 14तैखन तैनी ज़ोवं, ‘इश्शे बुज़ुर्गां केरे परमेशरे तू च़ुनोरोस, ताके तू तैसेरी मर्ज़ी पूरी केरस ते मसीहे लहस ते तैसेरी गल्‍लां शुनस। 15किजोकि तू सैरी लोकन मां तैसेरो गवाह भोल्हो, ते तैन ज़ोलो कि तीं कुन लाहेरूए ते कुन शुनेरूए। 16हुनी च़िर किजो लातस? उठ, ते बपतिस्मो ने ते तेरे पाप माफ़ भोन।’

गैर कौमन मां प्रचार

17“ते ज़ैखन अवं यरूशलेम नगरे मां वापस अव, ते अवं मन्दरे मां प्राथना केरने लगोरो थियो, त मीं दर्शन लावं। 18ते तै लाव ते एन ज़ोतू शुनू कि, ‘लूश केर, ते यरूशलेम नगरे मरां लूशी निस, किजोकि एना लोक मेरे बारे मां तेरी गवाही कबूल न केरेले।’ 19मीं ज़ोवं, ‘हे प्रभु एना लोक ज़ानतन कि अवं हर प्राथना घरे मां गातो थियो, ते केन्च़रे अवं तेरे मन्ने बालन कैद केरतो ते कुटतो थियो। 20ते ज़ैखन तेरे गवाह स्तिफनुस मारने लगोरे थिये, त अवं भी तैड़ी थियो, ते तैसेरे मारने मां खुशी थियो। ते अवं मारने बालां केरां लिगड़ां पहरतो थियो।’ 21ते प्रभुए मीं सेइं ज़ोवं, ‘गा अवं तीं गैर कौमन कां दूर-दूर भेज़ेलो।’”

22सारे लोक तैसेरी गल्‍लां शुन्ने लगोरे थिये, पन ज़ैखन तै इड़ी तगर पुज़्ज़ो त सारे लोक ज़ोरे-ज़ोरे चिन्डां मारने लगे, “ऐह ज़ींतो रखनेरे काबल नईं!” एस मार। 23ज़ैखन लोकां केरि शौर ते चिन्डां च़ेलती रेइ, त तैना चोगे शैरतां धूड़ आसमाने उडारने लगे। 24त फौजी पलटनरे सरदारे पौलुस क़िले मां नेनेरो हुक्म दित्तो, “एस कोड़ेइं सेइं बाथ ते एसेरू बियान घिन्ना ताके पतो लगे, कि लोक किजो चिन्डां मारने लोरेन।” 25ज़ैखन तैना कोड़ेइं सेइं बानेरे लेई पौलुस रेस्सी सेइं बन्धो, त तैनी एक्‍की सूबेदारे सेइं ज़ोवं ज़ै तैड़ी नेड़े थियो। “कुन अक रोमी मैन्हु बगैर कसूरे झ़ुसनो जाइज़े?” 26ज़ैखन तैनी सूबेदारे एन शुनू त तै फौजी पलटनरे सरदारे कां जेव, “तू कुन ज़ोतस? ऐह त अक रोमी मैन्हुए।” 27फौजी पलटनरे सरदारे पौलुसे कां एइतां पुछ़ू, “कुन तू रोमीस?” तैनी ज़ोवं, “हाँ।” 28इन शुन्तां फौजी पलटनरे सरदारे ज़ोवं, “कि मीं रोमी भोनेरी पदवी बड़े पेइंसे देइतां हासिल कियोरीए।” ते पौलुसे ज़ोवं, “पन अवं त ज़र्मनेरो रोमी।” 29ज़ैना लोक पौलुसेरू बियान घिन्ने बाले थिये, तैना नेश्शी जे, फौजी पलटनरे सरदारे भी इन बुझ़तां कि ई रोमीए, ते तैनी तै बन्धो, ते डेरि जेव।

महासभारे सामने पौलुस

30होरसां तै ठीक-ठीक ज़ान्नेरी इच्छा सेइं कि यहूदी तैस पुड़ किजो दोष लातन, एल्हेरेलेइ तैनी तै खोल्‍लो, ते प्रधान याजक ते सारी महासभा अकोट्ठी केरनेरो हुक्म दित्तो, ते पौलुस बुन गेइतां तैन केरे सामने खड़ो कियो।

Currently Selected:

प्रेरितां केरां कम्मां 22: BHDNT

Highlight

Copy

Compare