प्रेरितां केरां कम्मां 20

मकिदुनिया, यूनान ते त्रोआसे मां पौलुस

1ज़ैखन हंगामो मुक्‍को त पौलुसे चेले कुजाए ते तैन केरो होसलो बधव, ते तैन बिश्शा ज़ोइतां मकिदुनिया इलाके जो च़लो जेव। 2तैस सारे मुल्खे मांमेइं चेलन होसलो देइतां यूनान इलाके मां (ज़ैस जो अखाया इलाको भी ज़ोतन) अव। 3तैड़ी तै ट्लाई महीने राव, ते ज़ैखन तै समुन्दरी ज़िहाज़े मां सीरिया इलाकेरे पासे गानेबालो थियो, त यहूदी केरे लीडरेईं तैस बत्तां मारनेरी साज़िश बनाई, तैस पतो लगो त एल्हेरेलेइ तैनी एन रोड़ू समझ़ू कि मकिदुनिया इलाके मांमेइं जो सीरिया इलाके जो गाए। 4बिरीया नगरेरे रानेबाले पुरूर्सेरू मट्ठू सोपत्रुस, ते थिस्सलुनीकि मांमेइं अरिस्तर्खुस ते सिकुन्दुस ते दिरबे नगरेरो गयुस, ते तीमुथियुस ते आसियारो तुखिकुस ते त्रुफिमुस आसिया इलाके तगर असन सेइं साथी च़ले जे (लूका भी तैन सेइं साथी थियो)। 5पन तैना अग्रोवं गेइतां त्रोआस नगरे मां असन बलगते राए। 6ते अस अखमीरी रोट्टी केरे तिहारे बाद फिलिप्पी नगरे मरां सफर केरतां पंच़ दिहैड़ी मां त्रोआस नगरे मां तैन कां पुज़े, ते रात दिहैड़ी तैड़ी राए।

त्रोआसे मां यूतुखुस ज़ींतानो

7हफतेरे पेइले दिहाड़े असां प्रभु भोजेरे लेई अकोट्ठे भोए, ते पौलुसे होरसां तैट्ठां अग्रोवं गानू थियूं, त एल्हेरेलेइ तै तैन सेइं गल्‍लां केरने लगो ते एध्धी राती तगर तैन शिक्षा देने लगो। 8बेइयें छतरे कमरे मां ज़ैड़ी असां सब अकोट्ठे बिश्शोरे थिये, त तैड़ी काई दीये बलते थिये। 9त अक नौजुवान दैरी मां बिशोरो थियो, ते तैसेरू नवं यूतुखुस थियूं, पौलुसेरो प्रचार ठड्डी तगर शुन्तां तैस निड्ल आई, ते ट्लेइयोवं छतरां उन्ढो खिरको, ते मेरि जेव। 10पौलुस बुन अव ते तै नौजुवान ट्लेइतां तैस सेइं लिपटो ते ज़ोने लगो, “कि डरा नन्ना ऐह ज़ींतोए।” 11फिरी तैनेईं बा गेइतां सेब्भेईं मिलतां रोट्टी खाइ, ते फिरी ट्लेकड़ोने तगर वचन शुनाने लगो, तैखन तै तैट्ठां च़लो जेव। 12लोकेईं तै नौजुवान ज़ींतो घरजो नियो, ते तैन बड़ी खुशी भोइ।

त्रोआस नगरे मरां मीलेतुसेरू सफर

13असां अग्गर गेइतां ज़िहाज़े मां सुवार भोइ जे, ते अस्सुस नगरे जो च़ले जे, ताके तैड़ी पौलुसे भी ज़िहाज़े मां च़ाढ़म, किजोकि पौलुसे पेइले पैदल गानेरो बिस्तार कियोरो थियो। 14ज़ैखन तै असन अस्सुस नगरे मां मैल्हो त तै असेईं ज़िहाज़े मां च़ाढ़ो ते असां मितुलेन नगरे मां आए। 15तैट्ठां असां ज़िहाज़े मां सुवार भोइ जे ते अस खियुस जज़ीरेरे सामने पुज़्ज़े, ते अग्री दिहाड़े असां सामुसे मां पुज़े, ते होरसां अस मीलेतुस नगरे मां आए। 16पौलुसे थापेरू थियूं, कि अवं इफिसुस नगरे मां उतरेलो, किजोकि तै आसिया इलाके मां जादे वक्त बीतानो न थियो चातो, किजोकि तै जल्दी मां थियो, कि अगर भोइसखे, त तै पिन्तेकुस्त तिहारेरे दिहाड़े यरूशलेम नगरे मां राए।

इफिसुस नगरेरे बुज़ुर्गन शिक्षा

17ज़ैखन अस मीलेतुस नगरे मां ओस्से, त पौलुसे इफिसुस नगरेरे कलीसियारे बुज़ुर्गन जो बिस्तार भेज़ो कि तैना एज्जन। 18ज़ैखन तैना तैस कां आए, त तैनी तैन सेइं ज़ोवं, तुस ज़ानतथ कि पेइले दिहाड़ेरां ज़ैखन अवं आसिया इलाके मां पुज़ो, अवं तेइसेरो देंतो अज़ तगर हर वक्त तुसन सेइं साथी केन्च़रां राव। 19मतलब बड़े नेरमी सेइं, ते ऐंखरू बछ़ोड़ी-बछ़ोड़ी, ते तैन अज़मैइश मां ज़ैना यहूदी केरि च़लैकी सेइं मीं पुड़ एई, अवं प्रभुएरी सेवा केरतो राव। 20ते ज़ैना-ज़ैना गल्‍लां तुश्शे लेई फैइदेरी थी, तैना मीं तुसन सेइं बगैर केन्चेरे डरे तुसन सेइं ज़ोई छ़ेड्डी, ते बल्के ज़ैन किछ भी शिखालू दिले सेइं ते घर-घर गेइतां शिखालू। 21बल्के अवं यहूदी लोकां ते यूनानी लोकां केरे दूईयां केरे सामने गवाही देताईं कि तैना परमेशरेरे सामने पापन करां मन फिरान, ते इश्शे प्रभु यीशु मसीह पुड़ विश्वास केरन। 22हेरा हुनी अवं पवित्र आत्मारी गल मेनतां यरूशलेम नगरे जो गाताईं, ते मीं पतो नईं कि तैड़ी मीं पुड़ केरि-केरि गुज़रेली। 23अवं सिर्फ एत्रू ज़ानताईं कि पवित्र आत्मा मीं हर नगरे मां एन ज़ोती राई, कि बन्धना ते मुसीबत मेरे लेई तियारन। 24पन मेरी जान, मेरे लेई कोई कदर कीमत न रख्खे, त बस्सा अवं एन चाताईं कि मेरी दौड़ पूरी भोए ते तैस सेवाई पूरी केरि, ज़ै मीं परमेशरेरे अनुग्रहेरे खुशखबरी पुड़ गवाही देनेरे लेई प्रभु यीशु करां मैल्ही। 25ते हुनी अवं ज़ानताईं, कि तुसेईं अवं ज़ैन मां परमेशरेरे अनुग्रहेरी खुशखबरी हर पासे शुनातो राव, त मीं फिरी न लाहेले। 26एल्हेरेलेइ अवं तुसन साफ-साफ ज़ोई छ़डताईं, कि ज़ैना लोक यीशु पुड़ विश्वास केरने बगैर मरेले, त अवं तैन केरे ज़िमेवार नईं। 27किजोकि अवं बगैर केन्ची डरे तुसन शिखालतो राव, कि परमेशरेरी मर्ज़ी तुश्शे लेई कुने। 28बस्सा अपनो ते सारे विश्वासी लोकां केरो खियाल रखा, ज़ेसेरे लेई तुस पवित्र आत्मारे तरफां च़ुनोरेथ, कि परमेशरेरी कलीसियारी रखवाली केरा, ज़ैना लोक तैनी अपने खूने सेइं घिन्नोरेन। 29अवं ज़ानताईं कि मेरे गानेरां बाद झूठे उस्ताद मारने बालां गिद्दां केरे ज़ेरे तुसन मां एज्जेले, ते ज़ेन्च़रे तैना भैड्डन मारतन तेन्च़रे तैना झूठे उस्ताद तुसन नुकसान पुज़ाले। 30बल्के तुसन मरां भी एरे लोक खड़े भोल्हे ज़ैना सच़ ट्लोड़ मरोड़ केरतां छ़डेले, ताके चेलन अपने पासे केरन। 31एल्हेरेलेइ बींझ़े राथ ते याद रखा, कि अवं ट्लाई साल लेरां देंतो रात दिहैड़ी हर एक्‍की तैन खबरदार केरतो राव। 32हुनी अवं तुसन परमेशरे, ते तैसेरे अनुग्रहेरे वचनेरे सुपुर्द केरताईं, कि ज़ै तुसन विश्वासे मां मज़बूत केरि सकते, ते तुसन तैस जागिरारो हकदार बनेइ सकते, ज़ेसेरो वाधो तैनी कियोरोए ज़ैनी तुस पवित्र कियोरेथ। 33मीं केन्चेरे सोन्ने चैंदरू या लिगड़ां केरू लालच़ नईं कियेरू। 34तुस एप्पू ज़ानतथ कि मीं अपने हथेइं सेइं अपने ते अपने सैथी केरि हर अक ज़रूरत पूरी कियोरीए। 35मीं तुसन सब किछ केरतां हिराव, कि एन्च़रे सेइं कमज़ोरन समैली सकतम, कि प्रभु यीशु मसीहेरी गल्‍लां याद रखम, “कि देनू नेने करां जादे धने।”

36एन गल्‍लां केरे बाद पौलुसे ज़ैधू केरे भारे बिशतां तैन सेब्भन सेइं साथी प्राथना की। 37तैना सब गले मिलतां लेरां देने लगे, ते पौलुसे फुम्मड़ी देने लगे। 38खास केरतां तैना इस गल्‍ली सेइं दुखी थी, ज़ैना तैनी ज़ोवरी थी, कि तुस मीं फिरी कधी न लाहेले, ते तैनेईं तै ज़िहाज़े तगर पुज़व।

Currently Selected:

प्रेरितां केरां कम्मां 20: BHDNT

Highlight

Copy

Compare